Thursday, November 10, 2022
Saturday, September 14, 2019
Thursday, August 22, 2019
Arangkada for August 23, 2019
Unsaon pagluwas ang sapa
Bisan sa kaabunda na sa mga pagtulon-an sa nangagi nga susama nga mga kampanya sa pagpanlimpiyo sa mga sapa nagdumili ang lokal nga mga opisyal sa Sugbo sa pagkat-on. Gisubli nila ang samang mga paagi nga napamatud-an nang pakyas ug nagpaabot lang gihapon og lahi nga sangpotanan.
Ambot tungod ba lang sa kamubo sa ilang panumdoman. O nagtuo lang nga mas kamao kay sa ilang gipulihan. O nahibawo nang daan sa sangpotanan apan mas maayo na lang nga mapakyas kay sa wa silay ikapakita sa katawhan nga pagsuway pagsulbad sa suliran.
-o0o-
Ang lapad nga pagpanguha sa mga basura sa mga sapa gihimo na sa local government units, nasudnong mga ahensiya sa gobyerno ug pribadong kahugpongan sa Butuanon ug Subangdaku sa Mandaue City, sa Mahiga sa utlanan sa Cebu City ug Mandaue ug uban pa.
Bisan pulos napakyas gikopya na sab karong bag-o sa bag-ong mga tagduma sa Cebu City Hall sa sapa sa Guadalupe. Tuod man, pila ka adlaw human sa pagpanlimpiyo, sama sa Butuanon, Subangdaku ug Mahiga, nagtipun-og ra sab dayon ang lab-as nga mga basura sa sapa sa Guadalupe.
-o0o-
Sa pikas nga bahin, abunda sab ang mga pagtulon-an sa malampuson nga pagpanlimpiyo sa mga sapa sa ubang bahin sa nasud ug sa kalibotan. Ug ang mga tigpasiugda sa kalamposan wa maghinakog ug hingpit nga nakigsawo sa ilang kasinatian. Apan nganong wa sunda dinhi sa ato.
Hinaot nga di tungod kay ang malampuson nilang proyekto di sama kasayon ug kapaspas sa pagtapok og mga boluntaryo, pagsudlay sa sapa sud sa pila ka takna ug pagpasigarbo sa media sa tinoneladang basura nga ilang nahipos.
-o0o-
Angayng makat-onan sa mga nagpakabana sa atong mga sapa ang mga pagtulon-an gikan sa mga naglimpiyo sa sapa sa Maningning sa Barangay Sta. Ana sa Taytay, Rizal. Labihan nila kamalampuson nga ang proyekto gisunod na sa ubang kanasuran sa ASEAN.
Ang mosunod maoy ilang gihimo:
- Gipaminaw nila ang mga molupyo duol sa sapa (wa sila maghakot og gatosan ka boluntaryo gikan sa ubang dapit) unsay labing maayong paagi sa pagpanlimpiyo; ug
- Nagpasiugda sila og mga panginabuhi alang sa mga molupyo nga makalahutay ug molambo lang kon magpabiling limpiyo ang sapa. [30] leolastimosa@gmail.com
| Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
Tuesday, June 4, 2019
Arangkada for June 6, 2019
Padayon ang kalibog sa suka
Wa koy nailhan bisan usa sa lima ka brands sa suka (Surebrand, tulo ka Tentay ug Chef's) nga ginganlan sa Food and Drug Administration (FDA) nga peke. Busa ang labing uwahi nilang pahibawo wa makaiban sa akong kalibog unsay tinuod ug unsay peke sa mga suka sa among kusina.
Wa mag-apura ang FDA sa pagpasabot sa mga konsumidor nga nabalaka sa gibutyag sa Philippine Nuclear Research Insitute (PNRI), ubos sa Department of Science and Technology (DOST), nga peke ang 288 sa 360 ka brands sa suki nga ilang nasusi.
-o0o-
Igo lang nipahibawo ang FDA nga ang lima ka peke nga suka ilang nasakpan human susiha ang 39 ka brands nga ilang nakuha sa mga tindahan. Naalarma ko sa kalangay sa ilang laboratory testing sa mga suka.
Kay kon nakasusi lang sila og 39 ka brands sa niaging tulo ka semana, kana kon nilihok dayon sila human nabisto ang findings sa PNRI niadtong Mayo 10 ning tuiga, maabtan sila og 27 ka semana, o tunga sa tuig, una masubli ang tanang 360 ka brands nga nasusi sa PNRI.
-o0o-
Hangtod karon, daghan nga mahinungdanong kasayuran ang gitago sa FDA gikan natong mga konsumidor:
- Ang 288 ka brands sa suka nga nakaplagan sa PNRI nga gisagolan og synthetic ascetic acid;
- Pila sa 360 ka brands sa suka nga nasusi sa PNRI ang rehistrado sa FDA; ug
- Ang 34 ka brands nga nasusi sa laboratoryo sa FDA nga napamatud-an nga tinuod (kay lima ra man ang peke).
-o0o-
Wa ni isulti sa FDA apan klaro nga wa sila mobilib sa kasayuran sa PNRI. Mao nga inay ipa-recall dayon ang peke nga mga suka, naghimo ang FDA sa ilang kaugalingon nga pakisusi. Madugangan ang atong kalibog kon managlahi ang ilang findings:
- Ang PNRI nipasalig nga ang ilang isotope analytical techniques maoy labing epektibo sa pagsusi sa mga kemikal nga gisagol di lang sa suka kon dili apil na sa toyo, patis ug ketchup; apan sa pikas nga bahin
- Ang FDA niingon nga gigamit nila ang testing sa Permanganate Oxidation Number (PON) nga maoy opisyal nga paagi nga giila sa Association of Analytical Chemists (AOAC) sa pagsusi sa kalidad sa suka. [30] leo_lastimosa@abs-cbn.com
| Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. | |
Saturday, May 18, 2019
Arangkada for May 20, 2019
Kapuslanan sa mga magtutudlo
Di taas ang pagginhawa og luag sa mga magtutudlo sa mga eskuylahang publiko human sa kutas nila nga pagduma sa mga presinto sa lokal ug nasudnong piniliay niadtong Mayo 13. Malinga na sab sila sugod karong adlawa sa Brigada Eskwela, ang tinuig nga pangandam sa classrooms alang sa sunod nga tuig tingtungha.
Wa silay panahon sa paglangay-langay. Kay duha ka semana na lang ang paabuton ug pormal nang ablihan ang klase karong Hunyo 3. Apan tuguting molingi ko pagbalik sa kalidad sa ilang pagtabang sa mga botante tibuok adlaw niadtong Lunes.
-o0o-
Ang pagbansay-bansay sa mga magtutudlo nasentro sa mga butang nga wa silay mahimo:
- Ang dinali-daling pagtudlo nila sa information technology (IT) way mahimo sa pagpugong sa pagpalyar sa tulo ka tuig nang vote counting machines (VCMs), sa wa pa masuwayi sukad nga voter registration verification machines (VRVMs) ug sa baratuhon nga secure digital (SD) cards; ug
- Ang pagtudlo nila sa tukma nga pagmarka sa opisyal nga mga balota way nahimo sa pagpugong sa pag-apud-apod sa Comelec sa sayop nga marking pens nga mahimong nakapasamot sa aberiya sa VCMs.
-o0o-
Ang labing dagkong bulilyaso sa piniliay ila sa kadagkoan sa Comelec, sa sayop nga mga lagda sa ilang pagsubasta sa mga panginahanglan sa piniliay ug sa paggamit nila sa wa magtakdo nga mga makina ug mga teknolohiya nga nisangpot sa:
- Wa kinahanglana nga kahasol ug kalangay sa mga botante;
- Kalangay sa iskutenyo sa resulta ug proklamasyon sa mga mananaog; ug
- Pagdugang sa mga sukaranan sa mga pagduda sa kaligdong ug kamakiangayon sa piniliay.
-o0o-
Duna hinuon mi nakit-an nga buslot sa niaging piniliay nga di kinahanglan nga gastohan sa Comelec og binilyon ka pesos aron matapakan ug may kapuslanan ang pagbansay-bansay sa mga magtutudlo. Mahimo silang tudloan sa labing batakang mga lagda sa crowd control sa umaabot nga mga piniliay.
Gawas sa pipila nga nagpakabana sa kalisod sa mga botante, labi na sa senior citizens, persons with disability ug mabdos nga kababayen-an, kasagaran sa mga magtutudlo nitingob sa ilang pagtagad sa mga panginahanglan sud sa mga presinto. Pinasagdan ang mga botante nga, samtang ang kinabag-an malinawong nagpaabot sa ilang turno, gisal-otan sa linya sa mga way pailob. [30] leo_lastimosa@abs-cbn.com
| Google Docs: Create and edit documents online. Google LLC, 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. | |