Alas sa BPI

Nga nagbarug pa ang Bank of the Philippine Islands (BPI) human sa duha ka adlaw nga pagka-inutil sa ilang automated teller machines (ATMs) ug online banking services sa niaging semana maoy labing sipa nga ebidensiya sa talagsaong kalig-on sa 166 ka tuig na nga institusyon.

Kon taphaw nga mga bangko pa ang naigo bisan sa mas gamay nga bulilyaso, hagbay ra untang gidumog sa mga kliyente, gitilok og bakwi ang tanang deposito, gihikawan sa tanang pagsalig ug gitalikdan nga wa nay nahibilin nga bisan gamay na lang nga umoy.

-o0o-

Sa atong panahon, nga ang labing gamay nga mga huhungihong, bisan wa pay sukaranan, makagusbat na dayon og kadungganan, makapaukyab na dayon sa katawhan ug makaputol sa diplomatikanhong relasyon sa kanasuran, di gyod unta kasugakod ang BPI.

Kay may sukaranan ang iyang mga kliyente nga magduda. Labi nang mga nawagtangan og kuwarta ug ang mga nabawo sa dinaliang mga transaksiyon. Wa katabang ang wa pagkatuman sa pasalig sa BPI nga masulbad ang problema sa usa lang ka adlaw, kay nainat ang kalbaryo sa ikaduha pa gyong adlaw.

-o0o-

Sa labing unang higayon, nitingog si BPI Chairman Jaime Augusto Zobel de Ayala mahitungod sa kontrobersiya. Iyang gipasalamatan ang mga kustomer sa ilang gipakita nga taas nga pailob atol sa temporaryo nga pagkabalda sa mga serbisyo sa bangko niadtong Huwebes ug Biyernes.

Lain nga angayng pasalamatan ni Zobel de Ayala mao ang kaligdong sa BPI nga ilang natumpi ug napalig-on sa daghan na uyamot nga katuigan. Kon laksot pa unta ang ilang kasaysayan, hagbay ra unta sila nga na-goodbye-bunot.

-o0o-

Usa ka lokal nga opisyal sa Sugbo nipasusi sa mga negosyo sa iyang hurisdiksiyon. Ganahan siyang mahibawo kinsa nila ang nakalapas sa mga lagda sa gobyerno, gikan sa pagtuman sa parking ordinance, pagpreserbar sa kalimpiyo sa pagkaon ug pagbayad sa tukmang buhis.

Daghan siyang nasakpan nga nagbinuang. May mga gipasidan-an nga kandadohan nga nidalidali pagtul-id sa ilang kalapasan. Ang mga nikuwestiyon sa iyang sugo, nga naglakip sa mga labing dagko ug mga labing adunahan, gipasakaan gyod og mga kaso sa hukmanan. Wa maapil sa iyang listahan sa mga badlungon ang BPI ug igsuon nga mga kompaniya. [30]