Thursday, June 15, 2017

Arangkada for June 16, 2017

Leo Lastimosa has attached the following document:
Arangkada for June 16, 2017
Snapshot of the item below:

Lami apan makamatay

        Sakto si Senador Cynthia Villar. Di tungod kay siya ang labing adunahang sakop sa Senado. Ug di tungod sa pagtuo nga mga kabos ang naigo sa iyang awhag nga idili na ang unli-rice. Kon dili tungod kay tinuod ang iyang pangangkon: Nga makadaot ang white rice ug makaayo ang brown rice.

        Sakto sab si Villar nga di niya mapugos pinaagi sa pagpasaka og balaudnon ang mga kan-anan ni ang mga kustomer sa paghunong sa pinatuyangan nga pagkonsumo sa white rice. Isip negosyante, siya ang labing nahibawo nga di magawongan ang gawasnong patigayon. Klaro hinuong nikakak sab sa kadaghan sa mga botante nga nisukwahi niya.

                -o0o-

        Ang brown rice, nga mao ang white rice sa wa pa balikbalika og galing ug nahukasan sa nahibiling tipaka sa tipasi, mas daghang fiber ug nutrients. Mas ubos sab ang glycemic index kay sa white rice ug busa di makapasaka sa ang-ang sa asukar sa dugo.

        Nakaplagan sab sa pagtuon sa Harvard University nga ang mas subsob nga pagkaon og brown rice makapatidlom baleg 10% sa kahigayonan sa diabetes. Samang pagtuon nga namantala sa The Archives of Internal Medicine nagbutyag nga ang pagkaon og white rice makadugang bale og 20% sa kahigayonan sa diabetes.

                -o0o-

        Unsa may alas sa brown rice? Gitumbok sa mga eksperto sa pagkaon nga ang nahibilin nga mga tipaka sa tipasi nisangpot sa kaabunda sa magnesium ug ubang mahinungdanong nutrients nga labing epektibo nga makasagang sa diabetes.

        Kining maong benepisyo mapapas sa white rice. Bugti sa iyang kahamis ug kalami, kay lunlon nang puti ug wa nay bisan gamay na lang lama sa tipasi, ang well-milled o fancy rice nipahamtang sa bangis nga tunglo sa diabetes pinaagi sa pag-usbaw sa kahigayonan baleg 11% matag plato.

                -o0o-

        Nakugang ko nga may mga opisyal sa gobyerno nihulagway sa unli-rice nga makapalingkawas sa mga kabos gikan sa kagutom ug makapalahutay nila sa bug-at nga mga gimbuhaton.

        Kansang mga tiil ang wa magtugkad sa yuta? Kang Villar o sa mga nanaway niya? Ang binilyon ni Villar mahimong nakatabang niya pag-diskubre sa mga benepisyo sa mahalong brown rice. Ang ka-ignorante sa mga nanaway niya maoy nakapakatap sa kapugngan untang mga sakit. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: