Tambal sa uhaw ug gutom
Sa di pa ka mahugno sa sibaw nga mga pasidaan sa kalibotanon nga kagutom ug kauhaw tungod sa pagkagusbat sa atong kinaiyahan, nga mahimong mosangpot sa lapad nga kaguliyang nga makapahitumpawak nato sa hingpit nga kaalaotan, angayng paminawon ang pasalig sa mga siyentipiko nga mahimong maluwas ang atong planeta tungod sa bag-ong mga teknolohiya.
Gitataw nila nga makatabang ang pagpalambo pagbalik sa atong kalikopan ug sa pagdaginot sa tubig ug pagkaon. Apan inay mawad-an og paglaom nga mahimong uwahi nang tanang paningkamot paglikay sa nag-ung-ong nga katalagman, nipasalig sila nga may sukaranan ang paglaom sa mas maayong ugma.
-o0o-
Una nilang gisusi ang kanihit sa tubig: Usa sa matag pito ka molupyo sa labing naapiki nga mga nasud wa nay igong suplay sa tubig nga mainom ug magamit sa inadlawng kalihokan; gani, ang grabeng kanihit maoy gibasol sa minilyon ka bata ug dagko nga nangamatay matag tuig tungod sa mga sakit nga nanukad sa hugawng tubig.
Sunod nilang gituki ang kanihit sa pagkaon: May kanasuran nga naigo sa gubat ug katalagman sa kinaiyahan nga nahulga ang kinabag-an sa mga molupyo sa kamatayon tungod sa labihang kagutom.
-o0o-
Napamatud-an sa ilang pakisusi nga nahilambigit ang duha ka higanteng kanihit: Nausik ang dakong bahin sa 70% sa kinatibuk-ang suplay sa tubig nga gigamit sa agrikultura, nga maoy tinubdan sa pagkaon nga ang kapin sa katunga nausik tungod sa busluton nga sistema sa pag-apud-apod.
Maong ilang gimugna ang smart water grid nga, kay makasukod sa gidaghanon sa tubig gikan sa mga sapa, tubod ug ubang tinubdan ug sa tubig nga tukma sa matag tanom ug lagutmon, gilaomang motapak sa usik.
-o0o-
Apan ang gimugna nga mga teknolohiya di pa magamit ugma dayon. Kay nagkinahanglan pa og dugang pagtuon ug puhonan ug labaw sa tanan pagtinabangay sa nagkalainlaing kanasuran ug mga kompaniya. Mahimo ganing mas mograbe pang kauhaw ug kagutom sa di pa hingpit nga masulbad.
Maong angayng dasonan ang bisan unsang kampanya sa pagdaginot sa tubig ug pagkaon ug paghimong luwas sa ilang mga tinubdan. Ug makatabang sa tanang hingtungdan kon di dayon magkara-kara matag higayon nga may manghudlat nga hapit na matapos nang kalibotan. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment