Arangkada for June 19, 2017

Leo Lastimosa has attached the following document:

Arangkada for June 19, 2017

Snapshot of the item below:

Nakatamay sa kamatuoran

        Kon ang taho sa ahensiya sa pagbalita sa gobyerno ipanghimakak sa mga opisyal sa administrasyon, motumaw ang mosunod nga implikasyon: Mas maglibog ang katawhan kay ang taga gobyerno na man ang nagkasungi; ang mga tigbalita sa gobyerno wa nay kalainan sa pribadong media nga maoy kanunayng tulisukon nga nagpataka; mosamot ang pagduda nga ang pipila ka ahensiya sa gobyerno maoy nagpakatap og fake news.

        Ang Philippine News Agency (PNA) maoy nasentro sa kontrobersiya. Di ni una ug peligrong di maoy kataposan sa mga bulilyaso nga gipasangil batok sa ilang mga tigbalita.

                -o0o-

        Labing uwahing tulisok batok sa PNA naggikan mismo sa Malakanyang. Silang Presidential Spokesman Ernesto Abella ug Health Secretary Paulyn Ubial nihimakak sa taho sa PNA nga 59 ka sibilyan ang nangamatay sa evacuation centers sa Mindanao, mas daghan kay sa mga molupyo nga nakalas sa gubat sa Marawi.

        Apan ang PNA abunda og detalye: Gikutlo nila si Ubial nga nagkanayon nga sa 20,627 ka indibiduwal o 4,249 ka pamilya nga namakwet gikan sa Marawi, 19 ang nangamatay sa sud ug 40 ang nangamatay sa gawas sa evacuation centers.

                -o0o-

        Niinsistir silang Ubial ug Abella nga way bisan usa nga namatay sa 68 ka evacuation centers sa Iligan ug Lanao del Sur, Lanao del Norte ug Misamis Oriental. Matod ni Ubial sa 638 ka bakwet nga nangasakit, 300 ang na-ospital ug way namatay.

        Di kapasangil si Abella nga mga kaatbang sa administrasyon ang nagpakatap sa sayop nga kasayuran. Di sang kalikay si Ubial sa pagduda nga nagdalidali pag-usab sa iyang numero aron di manghilam-os sa kauwaw ang administrasyon sa kapakyas pagtabang sa makaluluoyng mga bakwet.

                -o0o-

        Wa mabantog ang PNA sa kapaspas ni sa kadagko sa mga balita. Kasagaran maunhan ug malabwan sa pribadong media. Kinabag-an sa mga taho kinuha sa press releases sa mga ahensiya nga gisukip sa mas dagkong mga balita sa propesyonal nga media.

        Nga nasayop ang PNA pagbutang sa hulagway sa langyawng mga sundawo sa balita sa awhag pagpangaliya sa kasundalohan ug kapolisan sa Marawi, nga wa man unta gukda og kumpetinsiya ug busa way sukaranang magkara-kara, mopasihag unsa ray bili nga gigahin sa pamunoan sa pagpatigbabaw sa kamatuoran. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.