Mas masabtan na
Mao ni ang banabana sa Philippine Atmospheric, Geophysical and Astronomical Services Administration (PAGASA) sa kahimtang sa panahon sa Sugbo ug Kabisay-an nga gimantala sa ilang Facebook page (facebook.com/PAGASA.DOST.GOV.PH/):
"Panagsang madag-umon ngadto sa madag-umon nga kalangitan inubanan sa pat-ak pat-ak nga pag-ulan ug pagpanugdug ug kilat ang magpasulabi sa tibuok Visayas. Hinay ngadto sa kasarangan nga hangin ang mohuros sa Habagatang silangan ngadto sa Habagatan ang magapasulabi diin ang kadagatan malinawon ngadto sa kasarangan."
-o0o-
May napanid-an ming maayong kausaban: Gawas nga may localized nang forecasts ang PAGASA alang sa nagkalainlaing rehiyon, lahi sa una nga nasentro lang kanunay sa Metro Manila, gihubad na sab ang banabana sa lokal nga pinulongan sa hingtungdang rehiyon.
Apan, pasayloa, nga may buslot gihapon ming nabantayan: Bisan Binisaya nang banabana, wa lang gihapoy pagpasabot nganong labihan kaalimuot sa tibuok adlaw, mo-us-os lang og diyutay ang temperatura inig sawop na sa adlaw sa kilumkilom hangtod sa sayong kadlawon, ug nganong nihunong ang subsob nga uwan.
-o0o-
Ang posibleng katin-awan mao ang synopsis sa forecast nga wa nila apila og hubad sa Binisaya: "Ridge of High Pressure Area (HPA) affecting the eastern section of Visayas." Apan unsa man ang HPA? Di ba sa niaging buwan ra mang nideklarar ang PAGASA nga tinguwan na?
Takos kaayong nipasabot silang PAGASA Visayas Director Oscar Tabada ug PAGASA Mactan Director Al Quiblat: "Temporaryong nabira ang habagat sa bagyo gawas sa teritoryo sa Pilipinas ug gipulihan sa HPA nga maoy nakapahunong sa uwan ug nakapabalik sa kaalimuot."
-o0o-
Nganong wa man isukip sa forecast ang katin-awan? Nganong kinahanglan pa man tang maghasol nilang Tabada ug Quiblat una makasabot sa kahimtang sa panahon? Hinaot nga maapil ni sa gisaad sa PAGASA nga kausaban paghimong mas masabot sa ilang forecasts.
Pipila sa kausaban nga gipasalig sa ulohang buhatan sa PAGASA: Pagpasidaan sa katawhan sa posibleng mga epekto sa bagyo; inay nga igo lang moingon nga giisa nang Signal No. 4, ila nang pun-an nga mahimong matumba ang mga punoan sa kahoy, maguba ang mga taytayan ug kadalanan ug maputol ang suplay sa kuryente. Hinaot nga matakdan sa kamaayong mopasabot nilang Tabada ug Quiblat ang tibuok PAGASA. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment