Wednesday, July 12, 2017

Arangkada for July 14, 2017

Leo Lastimosa has attached the following document:
Arangkada for July 14, 2017
Snapshot of the item below:

Pagarpar sa kuryente

        Sa ilang power situation outlook para gahapon, Hulyo 13, ang National Grid Corporation of the Philippines (NGCP) nipahibawo nga sobra ang suplay sa kuryente sa Kabisay-an: Ang 1,530 megawatts (MW) nga kinatibuk-ang demanda mas gamay kay sa 1,582 MW; sa ato pa, sobra og 52 MW.

        Apan sa pikas nga bahin ang power distributors sa Sugbo nipasidaan nga dako ang kakuwang sa suplay sa kuryente busa mapugos sila pagpahamtang og usa ug tunga ka oras nga rotating brownouts sa ilang mga hurisdiksiyon.

                -o0o-

        Di mahitabo nga pulos sila nagsulti sa tinuod. Kon tinuod ang pangangkon sa NGCP nga sobra ang suplay, di kinahanglan nga mamawong ang Visayan Electric Co. (VECO) sa Metro Cebu, Mactan Electric Co. (MECO) ug Cebu Electric Cooperatives (CEBECO) sa ubang bahin sa probinsiya sa kabalayan sa ilang mga konsumidor.

        Apan nahiagom gyod ang mga Sugbuanon sa rotating brownouts sukad sa kusog nga linog sa Leyte sa Huwebes sa niaging semana. Sa ato pa, sakto diay ang VECO, MECO ug CEBECO. Unsa may sukaranan sa sukwahi nga pangangkon sa NGCP?

                -o0o-

        Nihangyo ko sa mga tagduma sa power distributors sa pagsukip sa ilang mga pahibawo sa rotating brownouts pila ang kinatibuk-an nga suplay ug panginahanglan sa Sugbo ug pila ray ilang bahin aron nga makaangkon og mas tin-aw nga hulagway ug mas makasabot ang mga konsumidor.

        Nangayo sa samang kasayuran ang pipila nila gikan sa NGCP. Apan gibalibaran sila. Ang kadagkoan sa NGCP igo lang nipahibawo sa power distributors pila ra ang suplay sa kuryente nga ilang mabahin-bahin ngadto sa mga konsumidor.

                -o0o-

        Labaw pa ming napakyas pagkuha og katin-awan sa dakong kang-a tali sa inadlawng power situation outlook nga gimantala sa website sa NGCP ug sa aktuwal nga kahimtang sa Sugbo. Nahadlok ko nga nahurot ang panahon sa ilang kadagkoan sa pagsige og patawag og press conference pagpasalig nga dako uyamot ang ilang sakripisyo pagtukaw sa pagsulbad sa dakong kanihit sa kuryente sa Kabisay-an.

        Nakapait sa way kinutobang teknikal nga mga detalye sa NGCP giunsa pag-andam ang ilang kahimanan mao nga kanunay mosangko sa pagkumpisal nga mag-agad ra diay kanus-a mahibalik ang naandang suplay sa Sugbo ug Leyte. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: