Nganong di kanganlan
Kusganong gikondenar ni Padre Roberto Ebisa, SVD, Presidente sa Kapisanan ng mga Brodkaster ng Pilipinas (KBP) Cebu Chapter, ang bangis nga krimen sa pagpanlugos. Labi na sa mga bata. Giluwatan niya ang pamahayag samtang nangu sa kalihokan sa mga magsisibya nga nakapatumaw sa dakong baligho:
Sa usa ka bahin, abogado nga magsisibya ang gipasanginlan nga nanglugos og 13 anyos nga batang babaye; sa pikas nga bahin, ang mga magsisibya sa Sugbo nga gipangulohan ni Padre Ebisa nag-apud-apod og mga hinabang sa mga bata sa bukirang mga barangay sa Dakbayan sa Sugbo.
-o0o-
Gisubli ni Padre Ebisa nga gihatagan og dakong importansiya sa KBP Broadcast Code, ang nagsilbing bibliya sa mga magsisibya, ang pagpanalipod ug pagpalambo sa mga katungod sa mga bata. Gitataw hinuon niya nga di pa angayng hukman ang gipasanginlan sa di pa mapasakaan og pormal nga kaso ug mahusay sa korte.
Giangkon sab ni Ebisa nga way mahimo ang KBP sa pagsusi sa administratibo nga aspeto sa kaso, ni sa pagtawag sa atensiyon sa magsisibya ug sa mga tagduma sa sibyaanan, kay di sila sakop sa KBP. Giawhag niya ang National Telecommunications Commission (NTC) paghimo sa ilang trabaho.
-o0o-
Nakasabot ko sa sukaranan sa kahibung sa pipila ka tigpaminaw nganong may mga sibyaanan nang nihingan sa gipasanginlan nga abogadong magsisibya apan may mga sibyaanan sab, apil nang DYAB Abante Pa, Bisaya! nga nagdumili una sa paghingan niya.
Maong gibahaan mi og mga pangutana: Giduphan ba namong magsisibya? Mangisog ba lang diay mi kon mga opisyal ug mga kawani sa gobyerno ug pribadong mga indibiduwal ang pasanginlan?
-o0o-
Gipasaligan namong mga nangutana nga naglungutlungot sab mi paghingan sa gipasanginlan. Apan segun sa Broadcast Code nga gihisgutan ni Padre Ebisa: Persons who are taken into custody for allegedly committing private crimes (such as indecency or lasciviousness), shall not be identified, directly or indirectly -- unless a formal complaint has already been filed against them (Article 6, Section 14).
Ang nahilambigit nga sibyaanan gipasanginlan og daghan uyamot nga kalapasan sa Broadcast Code. Apan wa mabaraw kay di sakop sa KBP ug inutil ang NTC. Laing baligho nga ang Broadcast Code mao ra say nanalipod sa ilang magsisibya aron di kanganlan. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment