Arangkada for July 16, 2017

Leo Lastimosa has attached the following document:

Arangkada for July 16, 2017

Snapshot of the item below:

Saad nga wa matuman

        Kadako na sa kausaban sa mga pasalig ni Presidente Rodrigo Duterte sa iyang gubat batok sa ilegal nga drugas. Atol sa kampanya sa piniliayng presidensiyal sa Mayo sa niaging tuig, nipasalig siya ug ang iyang running mate nga si Alan Peter Cayetano nga masulbad nilang problema sa ilegal nga drugas sud sa tulo ka buwan.

        Apan karon niangkon na si Duterte nga mahimong maabtan og lima ka tuig ang iyang kampanya batok sa ilegal nga drugas. Ug wa na siya mopasalig nga hingpit niyang masulbad ang problema.

                -o0o-

        Sa sinugdanan sa kampanya, si Duterte ra ang nagsige og balikbalik sa pagtuki sa kaseryuso sa hulga sa ilegal nga drugas. Ang iyang mga kaatbang nipili sa pagtuki sa ilang mga programa pagsulbad sa kakabos ug pagpalambo sa nasudnong ekonomiya.

        Apan dihang nagsugod na og sulbong ang popularidad ni Duterte, ang iyang mga kaatbang uwahi nang nibalising sa ilang kampanya pagtuki nga may mga plano sab sila batok sa drugas ug kriminalidad. Gani, si Senador Grace Poe nipuhal ni Duterte pinaagi sa pagpasalig nga masulbad niyang kriminalidad sud lang sa usa ka buwan.

                -o0o-

        Mas gituohan sa mas daghang botante si Duterte. Nga wa katuman sa pasalig sa unang tulo ka buwan sa iyang pamunoan. Niluwat og laing pasalig nga maabtan ang gubat sa ilegal nga drugas og unom ka buwan. Dihang napupos ang unom ka buwan, nangayo na sab og dugang lugway nga usa ka tuig.

        Ning higayona, wa na maghisgot si Duterte sa lain niyang pasalig: Nga kon mapakyas pagpapas sa ilegal nga drugas sud lang sa tulo ka buwan, mokanaog siya sa katungdanan.

                -o0o-

        Human sa kapin sa tuig sa Malakanyang, naghisgot na sab si Duterte nga mahimong maabtan ang gubat sa ilegal nga drugas og lima ka tuig. Wa na maghisgot sa pagpapas sa hulga, igo na lang nipasalig nga mapaubos niyang problema sa iyang kinagamyan lima ka tuig gikan karon.

        Way arang ni Duterte. Nagpabiling taas ang iyang popularidad. Bisan unsay iyang isulti ug buhaton. Bisan unsay saad nga di niya tumanon. Ang katawhan padayong motuo niya. Hangtod nga makumbinser silang wa siyay kalainan sa nangaging mga pangu nga wa kapatuman sa gisaad nga kausaban. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.