Nagsumpay ang pusod
May mga nagtuo nga ang bugtong kalainan tali sa masaker sa Mamasapano niadtong 2015 ug sa duha na ka sayop nga bombardiyo nga niunay pagpatay ug pagsamad sa mga sundawo sa nagpadayong gubat sa Marawi City mao nga gidawat dayon sa pamunoan ni Presidente Rodrigo Duterte ang responsibilidad ug nangayo og pasaylo sa mga trahedya.
Apan ang pag-insistir nga ang sayop ra ni kanhi Presidente Noynoy Aquino mao ang kapakyas pagpasabot dayon sa publiko sa trahedya wa kapugong sa buhatan sa Ombudsman pag-apil niya sa mga kasong kriminal.
-o0o-
Lisod ang pagtandi sa nabulilyasong mga operasyon sa Mindanao sa duha ka pamunoan: 44 ka commandos sa Special Action Force (SAF) ang namatay sa Mamasapano atol sa pamunoang Aquino; samtang 13 ka sundawo ang nangamatay ug 18 nila ka kauban ang nasamdan sa duha ka friendly fire incidents sa Marawi.
Wa pa hinuon mahibaw-i ang kinatibuk-an nga mga panghitabo sa Marawi. Mahimong inigka human na sa krisis nga mahibaw-an may sukaranan bang mga pasangil nga mas daghang sibilyan ang naangin ug nga may abusadong mga sundawo nga nanglugos sa kababayen-an ug nangawat sa pribadong kabtangan.
-o0o-
Lahi sa Mamasapano nga nag-iyahay ang kapolisan ug kasundalohan, nagtinabangay sila karon sa Marawi ubos ni Presidente Duterte isip commander in chief ug sa chain of command sa Armed Forces of the Philippines (AFP) ug Philippine National Police (PNP).
Laing dakong kalainan mao nga way Heneral Alan Purisima sa Marawi nga nanglawgaw sa operasyon nga magduha na ka buwan karong semanaha ug hingpit nga gisininaan sa martial law sa tibuok Mindanao.
-o0o-
Apil sa depensa ni Aquino sa iyang ipasakang motion for reconsideration sa resolusyon sa Ombudsman mao nga si Purisima ang nag-umol ug naghupot sa tanang kasayuran sa Oplan Exodus sa Mamasapano ug busa makiangayon lang nga gipaapil gihapon bisan suspendido na.
Di ni hisgutan sa mga abogado ni Aquino apan maoy gitumbok sa iyang mga higala nga tinuod nga hinungdan sa iyang pag-unong ni Purisima: Siyay nakaluwas ni Aquino dihang nasamdan sa kudeta nga gipasiugdahan ni karon Senador Gringo Honasan niadtong 1987 ug busa naapil sa labing suod niyang mga sinaligan nga nagsinaaray nga "walang iwanan" (way biyaay). [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment