Sunday, July 16, 2017

Arangkada for July 18, 2017

Leo Lastimosa has attached the following document:
Arangkada for July 18, 2017
Snapshot of the item below:

Saad batok pangurakot

        Usa sa mga saad ni Presidente Rodrigo Duterte nga lalisunon pa kon iya bang natuman atol sa pagluwat sa ikaduha niyang State of the Nation Address (SONA) sunod semana mao ang pagpapas sa pangurakot. Pasiuna nga mga timaan nagpakita nga:

  • Gawas sa balikbalik nga pasalig wa pay klaro unsaon niya sa pagpatuman ang kampanya;
  • May mga sinaligan siya nga natudlo sa labing gamhanang mga puwesto sa gobyerno nga gilambigit na sa lab-as nga mga pangurakot; ug
  • May mga nakiha ug napriso na sa pangurakot nga nakalingkawas atol sa iyang pamunoan.

                -o0o-

        Sa hapit tanang diskurso ni Duterte, usa sa labing gipakpakan mao ang mga bahin nga nipasalig siya nga way pangurakot nga tugotan ang iyang pamunoan, niawhag siya sa mga opisyal ug mga kawani sa gobyerno nga papahuwayon ang katawhan gikan sa pangurakot ug nipasidaan siya pagpatay sa mga kawatan.

        Apan sa pikas nga bahin may mga diskurso sab siya nga nangangkon nga siya mismo nangurakot sa una apan wa na karon, nga padayon siyang nidawat og mahalong mga regalo ug nga mahimo rang mangawat ang mga opisyal ug mga kawani sa gobyerno basta nga di lang dak-on ug kanunayon.

                -o0o-

        Kanunay nga ipatumoy ni Duterte sa iyang mga pasalig nga mahunong nang pangurakot ang mga pahibawo nga dul-an na sa gatos sa iyang mga tinudlo ang gipanangtang niya sa katungdanan tungod sa pangurakot. Apan gawas sa pipila, wa niya nganli ang mga gipanangtang ug wa sab hisguti ang mga detalye sa anomalusong mga transaksiyon nga ilang gisudlan.

        Makahasol nang daan nga wa magtagad si Duterte pagkiha sa iyang mga tinudlo, maong gawas sa taktak mahimong di nang kapaninglan sa ilang kahiwian, mas makapabalaka pa gyong kalidad ug kaligdong sa iyang mga sinaligan.

                -o0o-

        Di katabang sa kakatuohan ni Duterte ang paglingkawas nilang kanhi Presidente Gloria Macapagal-Arroyo ug kanhi Senador Juan Ponce Enrile. Mahimong naatol lang sa iyang pamunoan apan mahimo sang tinuyo kay pulos niya alyado ang mga nabuhian.

        Karong bag-o naabsuwelto si Janet Lim Napoles, ang gipasanginlang pork barrel queen, sa labing una niyang kasong kriminal, ug girekomendar pa gyod nga mahimong state witness batok sa, wa lang sab tuyoa, politikanhong mga kaatbang ni Duterte. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: