Haw-ang sa pagbiya
Di kasinahan ang nahimutangan karon ni Ombudsman Conchita Carpio-Morales. Di lang usa kon dili duha sa labing dagkong politikanhong lider sa nasud--silang Presidente Rodrigo Duterte ug kanhi Presidente Noynoy Aquino--nikuwestiyon sa labing uwahi niyang sulti ug kaso nga gipasaka.
Gipahilom siyang Duterte tungod sa panaway sa pagdasig pagpamatay sa mga maigo sa kampanya batok sa ilegal nga drugas ug kriminalidad. Samtang nahimangod si Aquino, nga maoy nagtudlo niya sa katungdanan, sa paglambigit ni Morales niya sa Mamasapano massacre sa way paghatag ni Aquino og kahigayonan pagtubag sa mga pasangil ug pagpanalipod sa iyang kaugalingon.
-o0o-
Di sayon nga mahimong puntirya sa kasuko ni Duterte. Nabalhog sa prisohan si Senador Leila de Lima ug napugos ang pamilya nga nanag-iya sa usa ka nasudnong pamantalaan pagbaligya sa ilang negosyo ngadto ni Ramon Ang sa San Miguel Corporation.
Di sab sayon nga mabuyboyan, bisan pasumbingay lang, sa kanhi presidente nga nipahimutang niya sa katungdanan. Bisan ang pagpasabot ni Morales nga ang pagtuman sa katungdanan mas mahinungdanon kay sa utang kabubut-on di makaiban sa kakiwaw sa ilang relasyon ni Aquino, nga nipili pagpanumpa pagka presidente atubangan ni Morales inay ni anhing Chief Justice Renato Corona.
-o0o-
Pormal nga giawhag ni Aquino si Morales sa di paghinayon pagpasaka sa mga kasong kriminal sa Sandiganbayan. Mahimong barugan ni Morales nga may igo siyang mga ebidensiya batok ni Aquino o mahimo sang bakwion ang mga kaso.
Ambot makatabang bang Aquino o makahagit hinuon ni Morales ang paghulagway ni Duterte nga binugo ang pagkiha ni Morales ni Aquino kay mahimong suguon sa presidente si bisan kinsa, bisan suspendidong heneral pa sama ni Alan Purisima.
-o0o-
Kon mapasaka man gyong mga kaso batok ni Aquino sa Sandiganbayan, di nang katiwas si Morales pagduma sa proseksuyon. Kay moretiro na siya sunod tuig, pito ka tuig human siya itudlo ni Aquino.
Hagbay rang naglungutlungot pagpuli niyang mga batabata ni Duterte nga nanghudlat pag-impeach niya. Ang mga nahadlok sa kaligdong ug kaisog ni Morales maka-am-am sa ilang kaugalingon nga usa na lang ka tuig ang ilang agwantahon. Nagduda kong bisan si Aquino, nga nakaila niya, moangkon nga makamugna og dakong haw-ang sa sistema sa hustisya ang pagpahuway ni Morales. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment