Arangkada for July 20, 2017

Leo Lastimosa has attached the following document:

Arangkada for July 20, 2017

Snapshot of the item below:

Kon mag-Binisaya ang Sugbo

        Palandonga nga ang nagbuntaog nga bayhon sa Kapitolyo sa Sugbo may higanteng timaan nga "Balay Lalawigan sa Sugbo" ug ang napatik nga "The authority of the government emanates from the people. Erected in MCMXXXVII" butangan sa tukmang hubad nga "Ang gahom sa gobyerno nagikan sa katawhan. Natukod sa 1937."

Palandonga sab nga ang Cebu City Hall butangan og bag-ong higanteng timaan nga "Balay Dakbayan sa Sugbo" ug ang napatik nga "Public Office is a Public Trust" paibabwan sa mas masabtang hubad nga "Ang buhatan sa gobyerno alagad sa katawhan."

        -o0o-

Palandonga sab nga ang Talisay City Hall paibabwan sa mas dakong timaan nga "Balay Dakbayan sa Talisay" ug ang napatik nga "Leadership is for service not for power" ipaubos sa hubad nga "Ang pagpangulo alang sa pangalagad di sa gahom."

Palandonga sab nga ang Mandaue City Hall nga may timaan nga "Mandaue Presidencia" paibabwan sa mas tukma nga timaan nga "Balay Dakbayan sa Mandaue," ang timaan sa Lapu-Lapu City Hall paibabwan sa mas dako nga "Balay Dakbayan sa Lapu-Lapu" ug ang kinatumyan nga munisipyo sa amihanan nga may timaan nga "Bantayan Townhall" paibabwan sa mas dakong "Balay Lungsod sa Bantayan."

        -o0o-

Kinadalian nga epekto sa pagpalapad sa mga pamalandong sa ibabaw ngadto sa tanang dakbayan ug kalungsoran sa Sugbo mao nga mapahinumdoman ang katawhan nga sila ang tinuod nga hawod, nga bisan ang labing gamhanang mga tigbayon ilang kabtangan ug nga bisan ang kinatas-an nga mga opisyal ilang mga suluguon.

Ug hinaot nga mapahindumdoman sab ang mga nagtungkawo sa gahom nga napahimutang sila sa katungdanan tungod sa katawhan ug nga ang pag-alagad lang sa katawhan ang bugtong nilang kapuslanan.

                -o0o-

        Pinaagi lang sa pag-usab sa batakang mga timaan sa mga buhatan sa gobyerno mas makasabot ang labing gagmay ug labing dagkong mga sakop sa katilingban sa tukma nilang papel.

        Palandonga kon ang mas masabtang mga timaan palapdan sa tanang kadalanan ug likoanan, uban pang publikong mga tapokanan ug pribadong mga buhatan. Ang labing gamhanang epekto, matod ni Atty. Leo Zaragoza, ang nasudnong presidente sa Lubas sa Dagang Bisaya (LUDABI) nga maoy nilusad sa kampanya, makaamgo ang katawhan nga di angayng ikauwaw ang paglitok sa atong kaugalingong pinulongan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.