Arangkada for July 7, 2017

Leo Lastimosa has attached the following document:

Arangkada for July 7, 2017

Snapshot of the item below:

Nahudlat, Your Honor

        Sa ilang pagpatigbabaw sa deklarasyon ni Presidente Rodrigo Duterte sa martial law sa Mindanao, ang mayoriya sa mga mahistrado sa Korte Suprema nihatag niya og duha ka dagkong pakapin:

• Una, nisugyot sila nga mahimo ra gyod nga ipahamtang ni Duterte ang martial law sa tibuok Pilipinas bisan pa kon sa Marawi City ra niulbo ang aktuwal nga kaguliyang; ug
• Ikaduha, gitataw nila nga ang gahom ni Duterte sa pagpahamtang sa martial law hingpit ug busa di mahimo nga hilabtan o higpitan sa Kongreso, sa Korte Suprema o ni bisan kinsa.

                -o0o-

        Nakapasamot kadako sa baligho mao nga nipasalig ang 11 ka mahistrado sa Korte Suprema nga angay nga mabalaka ang mga nisupak sa martial law sa Mindanao kay ang 1987 Constitution nitakda og safeguards aron nga di maabusohan ang martial law nilang Duterte ug sa iyang mga sinugo. Nisukwahi hinuon ning maong pasalig ang ilang pagtahan sa duha sa labing mahinungdanong safeguards:

• Gisalikway nila ang panginahanglan sa joint session sa Kongreso pagsubli sa martial law; ug
• Hingpit nga gitahan ang ka-independente sa Korte Suprema pinaagi sa pag-angkon nga ang ilang gahom sa pagsubli wa maglakip sa paghigpit sa deklarasyon ni Duterte.

                -o0o-

        Ang bisan unsang nahibilin sa panagana ni Presidente Duterte peligrong hingpit nga mapapas ning pagdason nang daan sa labawng hukmanan sa iyang pasidaan sa pagpaubos sab sa martial law sa Kabisay-an ug sa Luzon tungod sa kahigayonan nga moawas ang terorismo sa Marawi sa ubang bahin sa nasud.

        Kuyaw sab nga madasig ang mga utok og pulbora sa mga heneral sa pagbanhaw sa gitan-ogan nilang mga damgo sa pagsakmit og politikanhong gahom ginamit ang martial law.

                -o0o-

        May sukaranan ang paniid sa tigpaminaw sa Arangkada sa DYAB Abante Pa, Bisaya! Mas gamhanan diay kay sa Korte Suprema ang MTRCB (Movie Television Review and Classification Board) kay maka-usab man o makadili gyod sa mga pelikulang ilang gi-review.

May sukaranan sang mga pangagpas nga ang 82 ka pahina nga desisyon sa Korte Suprema mao lay pantalya sa tinuod nilang mensahe: Di sila ganahan nga maoy sunod nga hulgaon, balikason, binastosan, bugal-bugalan ug, labaw sa tanan, ma-impeach. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.