Thursday, July 6, 2017

Arangkada for July 8, 2017

Leo Lastimosa has attached the following document:
Arangkada for July 8, 2017
Snapshot of the item below:

Langayan na, tapolan pa

        Sa makausa pa, naunhan na sab sa United States Geological Survey (USGS) ang Philippine Institute of Volcanology and Seismology (Phivolcs) sa pagmantala sa mga detalye sa kusog nga linog nga nitay-og sa atong nataran dinhi sa Kabisay-an niadtong Huwebes sa hapon.

        Sayop hinuon ang pasiunang kasayuran sa USGS: Magnitude 6.9 ang una nilang sukod sa pagtay-og ug Jaro, Leyte ang unang gitumbok nga epicenter. Apan sa wa pa makakihol ang Phivolcs, nakurhian na sa USGS ang gikusgon ngadto sa Magnitude 6.5 ug ang epicenter ngadto sa Kananga, Leyte.

                -o0o-

        Sa makausa pa, napamatud-an sa USGS nga mas kugihan silang nisubay sa mga dapit nga kinadul-an sa epicenter pinaagi sa paggamit og interactive nga mapa:

  • Ang unang gitumbok nga epicenter mao ang luna duha ka kilometro sa silangan-amihanang silangan sa Barangay Canhandugan sa Jaro, Leyte; samtang
  • Ang ikaduhang gitumbok nga epicenter sa linog mao luna tulo ka kilometro sa amihanan-amihanang silangan sa Barangay Masarayao sa Kananga, Leyte.

        Sa iyang bahin, ang Phivolcs igo lang nihaklap sa di malihok nga mapa sa Pilipinas nga may puwang tuldok sa ubos sa Tacloban City.

                -o0o-

        Sa makausa pa, nasakpan ang Phivolcs nga nagsalig ra sa mga tawag sa naapektahang mga molupyo sa pasiunang banabana sa gikusgon sa linog. Sa unang lista sa intensity sa ilang website, ang Tacloban, Palo ug Cebu City maoy ginganlan nga labing natay-og, Intensity 5.

        Wa maapil ang Ormoc City ug Kananga nga maoy labing nagusbat. Mahimong wa lang dayon makatawag sa Phivolcs ang ilang mga molupyo. Pagkataudtaod, gilista na hinuong Ormoc ug Kananga ubos sa Intensity 7 ug ang Jaro ug Capoocan ubos sa Intensity 6.

                -o0o-

        Mas suhito bang USGS sa labing hilit nga mga barangay sa Jaro ug Kananga kay sa Phivolcs nga igo lang nisukod sa gilay-on sa Magnitude 6.5 nga linog ug sa nisunod nga gatosan ka aftershocks gikan sa mga dakbayan sa Tacloban ug Ormoc?

        Dili. Mas kugihan lang ang USGS nga nigamit sa bag-ong mga teknolohiya sa mapa aron mas daling masabtan ang kasayuran sa linog. Libre ang Google Maps ug Google Earth. Maong lisod sabton nganong niinsistir ang Phivolcs sa ilang mapa sa panahon pang Mampor. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: