Tigdupa sa fake news
Kon manghunaw ang tanang tagduma sa Facebook page nga gitumbok sa mga polis nga responsable sa pagpakatap sa sayop nga kasayuran nga may bombang nakit-an ug napahungaw sa kapolisan sa Lapu-Lapu City, may sukaranan ba ang pagpasaka og mga kasong kriminal batok nila?
Matod sa mga imbestigador sa kapolisan bisan og manghimakak ang tanang administrador sa FB page mahimo silang pasakaan og kaso sa paglapas sa Anti Bomb Joke Law (Presidential Decree No. 1727, nga hinimo pang kanhi Presidente Ferdinand Marcos) ug sa Cybercrime Prevention Act sa 2012. Husayunon pa hinuon makabarug bang mga kaso sa korte.
-o0o-
Kay may mga administrador sa gikuwestiyon nga FB page nga niinsistir nga gihimo silang administrador nga way pagtugot gikan nila. Nga bisan gihatagan na sa gahom pagmantala og mga hulagway ug mga balita sa kontrobersiyal nga page, wa silay kasayuran kinsa gyod ang tinuod nga nagbuot unsay angay ug di angay nga ipagawas.
Mahimong di gyod mailhan sa mga polis kinsa ang nag-post sa fake news nga tinuod nga bomba ang nakit-an sa SWAT sa Maximo Patalingjug Avenue kon ang nailhan nga mga administrador pulos mahimong mga Pilato nga mangita og planggana nga kapanghunawan og bisan unsang kalambigitan.
-o0o-
Sa pikas nga bahin, makakita og alas ang imbestigasyon kon may usa o pipila sa mga administrador ang kusion sa ilang konsiyensiya ug mokumpisal kinsa ang tinuod nga utok di lang sa labing uwahi nga bomb joke kon dili hasta na sab sa nangagi pa nila nga mga pangilad.
Kon mahitabo na, mapugos gyod ang mga pasanginlan sa pag-atubang sa mga kaso nga ipasaka batok nila ug makaangkon og mas lig-on nga sukaranan ang mga polis sa pagduso sa mga kaso ug pagpatagam sa mga sad-an ug pagpasidaan sa ubang mga way laing lingaw.
-o0o-
Apan ang labing dakong babag sa kampanya batok sa fake news mao ang social media users nga motuo sa bisan unsang imantala sa mga FB accounts, groups ug pages nga susama nila og politikanhong baruganan.
Pipila nila manalipod pa gani sa fake news bisan napamatud-an nang bakak. Pinaagi sa pagpangugat nga ila ning panimawos sa mga politiko ug media organizations nga utro sang bakakon. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment