Marriage counselor in chief
Sa kadaghan ug kadagko sa iyang mga gimbuhaton pagduma sa nasud, nigahin si Presidente Rodrigo Duterte og pila ka takna sa pagsuway paghusay sa panagsungi sa magtiayong Comelec Chairman Andres Bautista ug Patricia Bautista.
Ang pakigtagbo ni Duterte sa magtiayong Bautista sud sa Malakanyang nahitabo niadtong Agosto 1, usa ka semana sa wa pa mabutyag sa media ang ilang panagsungi nga nakatay-og na karon di lang sa ilang mga pamilya ug sa liderato sa Comelec kon dili hasta, ug labi na, sa kaligdong sa lokal ug nasudnong piniliay niadtong Mayo 2016.
-o0o-
Niadtong adlawa, ang unang gipakitagboan ni Duterte mao ang pamilya ni Chairman Bautista. Niboluntaryo siya pagpahibawo nila sa daghan uyamot niyang kasaypanan isip bana ug amahan ug nga kon hatagan og laing higayon daghang mga butang ang iyang usbon.
Dayon nananghid si Duterte nga mobiya kay makigtagbo ni Patricia ug mga abogado sa pikas nga kuwarto. Pila ka adlaw sa wa pang tigom, nagkatagbo na silang Duterte sa kapin sa tulo ka oras kanus-a gipakita ni Patricia ang mga dokumento nga nakakumbinser niya sa tinagoang katigayonan sa iyang bana.
-o0o-
Sunod nga nagtagbo sila na lang si Duterte ug ang magtiayon. Subli niya silang gitambagan sa pagbukas sa ilang panghunahuna aron nga di modako ang ilang away. Nisubli pagbungat si Patricia sa kantidad nga iyang gipangayo. Nisubli sab si Bautista pagtakda pila ray iyang ikahatag.
Giawhag ni Duterte si Bautista nga padak-an ang iyang tanyag. Nihangyo si Bautista nga di lang kausahon og hatag ug nga ang mauyonan nga kantidad data-datahan niya pagbayad.
-o0o-
Labihan ka sekreto sa panagtagbo nga way bisan usa ka sakop sa media nga nakatimaho. Bisan ang mga senador ug mga kongresista nga gipakigtagboan ni Duterte niadtong adlawa mahitungod sa kontrobersiya wa mahibawo giunsa niya pagkakuha ang kasayuran.
Ang unang nibutyag sa panagtagbo mao si Patricia. Nihatag og mas daghang detalye si Bautista. Ang pagkabisto sa panagsungi nagmatuod nga napakyas si Duterte isip mediator ug marriage counselor. Sa iyang pagkonsulta sa mga senador ug mga kongresista, si Duterte nabalaka sa mga implikasyon kon mapamatud-ang kurakot si Bautista. Apan ni-am-am sa iyang kaugalingon nga naproklamar ug nakapanumpa na siya. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment