Arangkada for August 2, 2017

Leo Lastimosa has attached the following document:

Arangkada for August 2, 2017

Snapshot of the item below:

Nalangay nga kapaspas

        Human sa kapin sa tuig nga way lihok bisan gamay ang kaso sa negosyante nga si Peter Lim, nga gipasanginlan ni Presidente Rodrigo Duterte nga drug lord, nikalit lang og kalami ang kontrobersiya.

16 ka tuig human unang ginganlan si Lim nga usa sa drug lords sa Sugbo sa expose ni kanhi Kongresista Antonio Cuenco sa habagatang distrito sa Dakbayan sa Sugbo, nga way bisan usa ka kaso nga napasaka batok niya ug nangamatay hinuon ang duha ka kanhi batabata nga nangahas pagsaksi batok niya, makapakugang ang kalamboan sa niaging 48 ka oras.

                -o0o-

        Simbako nalipat ka sa nikalit lang kapaspas nga mga lihok pamunoan ni Presidente Duterte batok ni Lim, palihug subaya ning mosunod:

• Niadtong Dominggo, gipahibawo ni Supt. Royina Garma, hepe sa Criminal Investigation and Detection Group (CIDG 7) nga imbestigahon nila si Lim ug daghan na silang nahipos nga ebidensiya batok niya;
• Niadtong Lunes, giapil si Lim sa Lookout Bulletin sa Department of Justice (DOJ) aron mabantayan kon mogawas sa Pilipinas; ug
• Gahapon, Martes, giluwatan sa DOJ ang subpoena sa preliminary investigation sa kasong drug trading nga gipasaka batok niya.

                -o0o-

        Labihan kakalit sa pagkiha ni Lim nga nihit ang detalye gikan sa tabian untang si Justice Secretary Vitaliano Aguirre. Igo lang gipahibawo nga paatubangon si Lim sa alas-10 sa buntag karong Agosto 14 sa preliminary investigation nga dumalahon nilang Assistant State Prosecutors Aristotle Reyes ug John Michael Humarang.

        Way bisan gamayng hisgot unsay sukaranan sa iyang kasong conspiracy to commit illegal drug trading nga nadawat sa DOJ gikan sa Major Crimes Investigation Unit (MICU) sa CIDG niadtong Hulyo 5.

                -o0o-

        Nasihag hinuon sa nihit nga detalye nga igo lang gilumpong si Lim nilang Kerwin Espinosa, ang niangkong drug lord sa Eastern Visayas, ug Peter Co, ang gitumbok nga orihinal nga negosyante og shabu sa New Bilibid Prison.

        Mahimong gipasikad ang kaso sa mga testimoniya ni Kerwin atubangan sa mga senador ug mga kongresista. Mahimo sang mogamit sa mga ebidensiya nga nahipos sa imbestigasyon ni Chief Inspector Jovie Espenido, sa wa pa siya ilabay sa Ozamiz City, ni anhing Albuera, Leyte Mayor Rolando Espinosa Sr. ug sa nadakpang mga batabata ni Kerwin. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.