Arangkada for August 20, 2017

Leo Lastimosa has attached the following document:

Arangkada for August 20, 2017

Snapshot of the item below:

Bililhong katigayonan

        Human sa dul-an sa tunga sa tuig nga kalangay, nadayon na gyod ang among sabot sa pagsubay sa kagahapon sa Sugbo gahapon. Suod nakong higala ganahan nga magpakisayod sa labing makahuloganon nga mga panghitabo sa downtown sa Dakbayan sa Sugbo. Samtang akong asawa gustong mobasa sa mga libro mahitungod sa iyang apohan.

        Tungod sa mas dinalian ug nagkasungi nga mga lakaw, wa magkaabot ang among pundok hangtod gahapon sa buntag. Maong sa kataposan amo na gyong naduaw ang Cebuano Studies Center (CSC) sa University of San Carlos sa Barangay Talamban.

                -o0o-

        Apan di gyod diay sayon ang pagbugtaw og kinaadman. Kini bisan sa akong paneguro nga di mabawo ang among lakaw. Sayo sa niaging semana ako nang gisusi unsay mga panginahanglan sa among lakaw. Giingnan ko nga bisan nagsugod nang USC Intramurals abli ang library. Nahibaw-an sab nako nga nagkinahanglan mig permiso una makasud.

        Namalihug ko sa higala nakong magtutudlo sa USC pagkuha sa among permiso. Apan gipasaligan siya nga wa na kinahanglana ang permiso kay igo na lang ming pangayoan og IDs. Tuod man, wa mi pasudla sa mga guwardiya kay wa mi permiso.

                -o0o-

        Dihang gihikay nang among permiso, giingnan na sang mga guwardiya nga pasudlon mi bisan way permiso. Apan wa matapos didto ang among mga pagsuway.

Bisan sa makuti nga giya sa mga guwardiya, nasaag mi sa pagtungas ug paglibot sa kabahin sa 80 ka ektarya nga luna sa USC sa Talamban. Nga karon mao nay giilang main campus ug ang ang orihinal nga building gitawag na lang nga downtown campus.

        -o0o-

Apan pagsud na namo sa 1.6 ka ektarya ug walo ka andana nga Learning Resource Center gigantihan mi sa lunsay nga kahinangop sa nagbuntaog nga kasayuran nga gibuksan alang sa among pundok.

Sa ikatulong andana, nga maoy nahimutangan sa CSC, nalilian namo di lang ang karaang downtown ug inilang mga molupyo apan apil nang dakong tibhang nga nag-uwang sa mainland ug sa isla sa Kawit sa wa pang South Road Properties (SRP) ug labing mabulukong tinabanay ug labing duguong mga patay nga moribal sa bag-ong mga eskandalo. Karong nakatultol ug nakasuway na, nabalaka kong magsige na mi og balikbalik. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.