Arangkada for August 21, 2017

Leo Lastimosa has attached the following document:

Arangkada for August 21, 2017

Snapshot of the item below:

Kalbaryo sa business permit

        Mirisi ang Rico's Lechon. Human sa usa ug tunga ka dekada nga pagtumpi sa dako nilang ginansiya, siyaro wa gyod makahapsay sa ilang mga dokumento? Sila gihapoy matulisok bisan kon tinuod pang mga pasangil nga:

• Makaluluoy silang biktima sa panimawos ni Cebu City Mayor Tommy Osmena tungod sa ilang pagpalayas sa iyang umagad;
• Biktima sab sila sa tokar-tokar nga pagpatuman sa City Hall sa nag-usab-usab nga mga lagda; ug
• Biktima pa gyod sa nag-alintabo nga kasina sa mga karibal nga naligsan sa paspas nila nga paglapad ug talagsaon nilang kalamposan.

                -o0o-

        Nahibung ang mga suod ni Enrico Dionson, tag-iya sa Rico's, ngano nga mora siyang gahapon pa nagsugod sa negosyo. Nga samtang ang uban nakigsuod sa mga opisyal, nga bisan wa pay mahatag nga pabor karon apan mahimong makatabang sa umaabot, gisalikway na hinuon ang kinakusgan nilang koneksiyon.

        Mahimong gitugyan nang Dionson ang negosyo sa duha niya ka anak babaye nga gikatahong di sama kadali nga ikasabot. O tingali nalipat nga ang inilang mga artista ug nasudnong mga politiko nga ilang giulog-ulogan di diay mao ang mohatag og business permit nila.

                -o0o-

        Apan sa tarung nga kalibotan di gyod unta magkinahanglan og politikanhong koneksiyon ang lehitimong mga negosyo. Di gyod unta ka magkinahanglan sa umagad sa mayor aron makapalambo sa imong litsonan ug ubang patigayon.

        Apan sa tarung nga kalibotan kinahanglan sab kang motuman sa batakan ug makiangayong mga lagda. Di gyod unta angay nga magsalig sa umagad sa mayor ug ubang mga koneksiyon aron makalusot sa mga lagda nga gitumong pagpanalipod sa panudlanan sa gobyerno ug sa kahimsog sa publiko.

                -o0o-

        Angay sab hinuong sublion ni Mayor Osmena ang wa kinahanglanang kalbaryo sa pagkuha sa Mayor's Business Permit: 21 ang kinatibuk-ang panginahanglan sa tulo ka hugna nga proseso. Maong may mga komaniya nang nikuha og mga kawani o ni-outsource sa mga kompaniya pag-andam sa mga panginahanglan sa tibuok tuig.

        Di kinahanglang mangita si Osmena og laing sumbanan. Ang Naga City sa Camarines Sur makahatag og mayor's business permit gikan sa 30 minutos ngadto sa duha ka oras. Tungod sa sistema nga igo lang gisunod ni anhing DILG Secretary Jesse Robredo gikan niya. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.