Bugkos sa mga kaso
Pagkahibawo nako nga taga Barangay San Antonio sa Dakbayan sa Sugbo si Chief Inspector Jovie Espenido dihang niulbo ang sunudsunod nga engkuwentro tali sa kapolisan sa Albuera, Leyte nga iyang gipangulohan ug sa armadong mga sakop ni Albuera Mayor Rolando Espinosa Sr., nidiretso ko og pangangkon nga taga Sugbo siya.
Matag pakighinabi nako niya sa telepono sa mga kontrobersiya sa Leyte, nagbuutbuot ko og paila ni Espenido nga lumad nga taga Dakbayan sa Sugbo. Si Espenido, nga tingali naikog lang o may daghang mas mahinungdanong giatiman, wa magtagad sa pagkurihir nako.
-o0o-
Human sa duguong engkuwentro sa Ozamiz City niadtong Dominggo sa kadlawon, dihang nangangkon na sab ko nga lumad nga Sugbuanon si Espenido, may mga tigpaminaw na sa Arangkada sa DYAB Abante Pa, Bisaya! nga nihatag nako sa tukmang gigikanan sa labing mabulukon karong hepe sa kapolisan.
Taga San Miguel, Surigao del Sur diay ang mga ginikanan ni Espenido. Bisan ang iyang asawa nga si Shiela Bandal di sab maangkon nga taga Sugbo kay taga Tubod, Isabel, Leyte. Sa Sugbo hinuon nagdako ug nag-eskuyla ug nagsugod pagka polis si Espenido.
-o0o-
Unang dako nga kaso nga naapilan ni Espenido mao ang nabantog nga Chiong case dinhi sa Sugbo niadtong 1997, usa ka tuig human siya nahimo nga polis. Gitumbok siya nga usa sa mga nakadakop sa pipila ka sinumbong nga nakonbikto sa pagdagit sa managsuon nga Marijoy ug Jacqueline Chiong.
Nakaangkon og promosyon ang hapit tanan nga nahilambigit sa giingon nga pagkasulbad sa usa sa labing gikagubtan nga kaso sa Sugbo nga nakadapit sa pagtagad di lang sa tibuok nasud kon dili sa ubang kanasuran sa kalibotan.
-o0o-
Ambot nakabantay ba si Espenido sa bugkos sa labing dagko niyang mga kaso:
- Ang Chiong case naglambigit sa gipasanginlan nga drug lord sa Sugbo nga si Peter Lim, kay silang Marijoy ug Jacqueline mga anak ni Dionisio Chiong nga kanhi sinaligan sa mga negosyo ni Lim; ug
- Human niya napuhag ang mga Parojinog sa Ozamiz City, nabisto ang pagpasaka sa kaso batok ni Lim nga bunga sa iyang pagsikop ug pag-imbestigar sa mga batabata sa mga Espinosa kansang sindikato una niyang nabungkag sa Eastern Visayas. [30] leo_lastimosa@abs-cbn.com
No comments:
Post a Comment