Arangkada for August 6, 2017

Leo Lastimosa has attached the following document:

Arangkada for August 6, 2017

Snapshot of the item below:

Way bisan gamayng duda

        Ang lapad nga kalibog sa tinuod nga relasyon nilang Presidente Rodrigo Duterte ug sa ginganlan niyang drug lord nga si Peter Lim--kay human niya hulgaa nga patyon nanggawas ang mga hulagway sa ilang panagkita sa victory party ni Duterte sa Mandaue City ug sa ilang pagpanluhod og kasal sa Lapu-Lapu City--wa makaapektar sa determinasyon ni Supt. Royina Garma, hepe sa CIDG 7, sa pagsusi sa pasangil sa presidente batok ni Lim.

        Matod ni Garma ang bugtong niyang giya mao ang sugo sa presidente sa tanang buhatan sa gobyerno pagpangita og mga ebidensiya batok ni Lim.

                -o0o-

        Gipasabot ni Garma nga ang nanggawas nga mga hulagway nilang Duterte ug Lim pulos nakuha sa wa pang kalingkod ang presidente sa Malakanyang: Ang letrato sa victory party sa Adnama Building sa Mandaue nakuha sa Hunyo 8, 2016; samtang ang letrato sa kasal sa Shangrila Mactan nakuha sa Hunyo 25, 2016.

        Si Garma nga nagsugod og pamolis sa Davao nitataw nga di mobalibad si Duterte pagpahulagway uban ni bisan kinsa. Maong di angayng hatagan og laing kahulogan ang iyang mga hulagway uban ni Lim dinhi sa Sugbo pila ka adlaw sa wa pa makalingkod sa katungdanan.

                -o0o-

        Sa pagbanos nang Duterte sa Malakanyang, niingon si Garma nga nakadawat na ang presidente isip commander in chief sa sensitibo nga kasayuran sa dakong papel ni Lim sa negosyo sa ilegal nga drugas.

        Maong wa na mosugot si Duterte nga magtagbo silang Lim sa pribadong tigom. Sunod nilang panag-abot gisibya na sa nasudnong telebisyon sud sa headquarters sa PDEA sa Davao City.

                -o0o-

        Bisan ang pakigkita ni Duterte kang Lim giisip nga pribilihiyo. Kay gibalibaran man sa presidente ang samang mga hangyo sa uban niyang gipasanginlan sama nilang kanhi Cebu City Mayor Mike Rama ug Daanbantayan Mayor Vic Loot.

        Apan alang ni Garma wa siyay bisan gamay nga pagduda sa kamatinud-anon sa pasidaan ni Duterte nga tinud-on si Lim kon mapamatud-ang drug lord. Mahimo nga may nakahunghong ni Garma, nga usa sa labing sinaligan sa presidente, sa pasidaan ni Duterte sa Sugbuanon nga negosyante nga gipasanginlan nga maoy naghikay sa ilang tigom ni Lim sa Davao: "Palayo na ana niya!" [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.