Saturday, August 5, 2017

Arangkada for August 7, 2017

Leo Lastimosa has attached the following document:
Arangkada for August 7, 2017
Snapshot of the item below:

Gilamoy sa Customs

        Dihang gitudlo ni Presidente Rodrigo Duterte ang rebeldeng sundawo nga si Nicanor Faeldon isip tagduma sa Bureau of Customs (BOC), nakumbinser ko nga namasin siya nga ang kakuwang og kasinatian ni Faeldon sa pagduma og dagkong organisasyon matapakan sa determinado niya nga pagbarug ug pag-alsa gyod gani og armas batok sa mga pangurakot sa nangaging mga pamunoan.

        Maong nagpaabot ko og dakong lahugay sa BOC. Tungod lang kay ang bag-ong tagduma may talagsaong kaisog nga nakaaghat niya pag-apil sa Oakwood mutiny sa Hulyo 2003 ug pag-adto niya sa Spratlys sa Enero 2016.

                -o0o-

        Apan human sa kapin sa tuig niyang pagduma, way kasikas sa BOC. May pipila ka opisyal nga napulihan, apil nang kolektor sa Sugbo ug ubang dagkong pantalan, apan way dagkong kausaban nga nahitabo.

        Way dagkong opisyal nga nakasohan, way dagkong kaso sa nangaging smuggling nga nasulbad ni gipasanginlang smugglers nga nadakpan. Nikalit ba lang kamapailubon si Faeldon aron sa pagpatuman sa mas malungtarung kausaban? O natinuod ang gikabalak-an sa kadaghanan nga, sama sa iyang mga gisundan nga nagtinguha sab unta paglimpiyo sa BOC, gilamoy siya sa kahakog?

                -o0o-

        Wa magdugay pag-abot ang tubag: Gipatawag sa House of Representatives si Faeldon tungod sa pinayuhot nga P6.4 milyones nga balor sa shabu gikan sa China nga nasakpan human nakalusot sa pantalan.

        Nabanhaw ang kadasig sa saad sa kausaban ni Faeldon dihang nabutyag nga mahimong nanimawos rang mga kongresista kay iyang gisalikway ang opisyal nga gitugpo ni House Speaker Pantaleon Alvarez alang sa promosyon. Bahala na kon ang unang nisukol mao ang Sugbuanong BOC chief of staff nga si Atty. Mandy Anderson ug si Faeldon igo lang nilaban niya.

                -o0o-

        Apan wa kabuylo ang katawhan pag-abiba alang nilang Faeldon ug kaubanan kay nakabawos dayong mga kongresista, nga klarong daghang espiya sa BOC ug mahimong nagsabasaba kay nayatakan ug nalaktawan sa bag-ong liderato.

        Nakakuha dayon ang mga buaya sa Kongreso og dokumento sa pagkontrata sa BOC og inilang mga atleta isip intelligence agents nga may suholan nga hangtod P50,000 ang buwan. Nabalaka kong nakasugat sa tukmang presyo ang bisan unsang nahibilin nga prinsipyo ug kaisog nilang Faeldon ug ubang kanhi rebeldeng mga sundawo. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: