Sunday, August 6, 2017

Arangkada for August 8, 2017

Leo Lastimosa has attached the following document:
Arangkada for August 8, 2017
Snapshot of the item below:

Kabilin nga pundo

        Ambot nganong nanghulga pa ang mga opisyal sa Private Hospitals Association of the Philippines (PHAP) nga modangop sa Korte Suprema aron pagkuwestiyon sa legalidad sa Republic Act No. 10932, o ang hiningusgang balaod batok sa pagpangayo sa mga ospital og deposito sa mga pasyente nga dinalian ang kahimtang (Strengthened Anti-Hospital Deposit Law).

        Inay magpaugat angayng dasonan ang baruganan sa ligdong nga mga tagduma sa mga ospital nga niangkon nga ang nag-una nilang tahas mao ang pagluwas og mga kinabuhi di ang pagtumpi og ginansiya.

                -o0o-

        Sa kredito ni Presidente Rodrigo Duterte gipirmahan niya ang balaod bisan kon ang mga tigpasiugda mao ang mga pangu sa oposisyon. Wa hinuon ning kapugong sa iyang mga dumadapig sa pagpabuhagay sa tanang pahalipay ngadto niya nga morang siya ra ang bugtong nakahunahuna sa benepisyo.

        Kay di gyod mga itoy ni Duterte ang duha ka haligi sa Akbayan Party-list nga maoy nagmatuto sa balaod: Silang Senador Risa Hontiveros nga maisugong nibarug batok niya sa Senado ug Kongresista Tom Villarin, ang ni-petisyon sa Korte Suprema pagkuwestiyon sa legalidad sa martial law sa Mindanao, sa House of Representatives.

                -o0o-

        Gipasabot nilang Villarin ug Hontiveros nga di maalkanse ang mga ospital sa hingpit nga pagpatuman sa balaod nga mopahamtang nila og mas dakong multa ug priso:

  • Matod ni Villarin kon di makabayad ang mga pasyente abagahon ang ilang gasto sa Philippine Health Insurance Corp. (PhilHealth); ug
  • Matod ni Hontiveros ang mga pribadong ospital nga motuman sa balaod makadawat og tax incentives gikan sa Bureau of Internal Revenue (BIR).

                -o0o-

        Ang bag-ong balaod nga gipirmahan ni Presidente Duterte makapahimus sa dakong pundo nga gibilin sa iyang gikasilagan nga pamunoan ni kanhi Presidente Noynoy Aquino. Kansang bugtong buhis nga gipahamtang, ang Sin Tax Law sa bino ug sigarilyo, nakamenos sa bisyo ug nakatigom pa gyod og P140 bilyones niadtong 2015 alang sa health services.

        Maong mas dako nang pundo sa PhilHealth. Nga di lang makatapal sa bayranan sa labing kabos nga may emergency cases. Makabayad pa gyod sa mga benepisyo sa tanang senior citizens kon simbako ma-ospital nga wa pang kahingpit sa membership documents. Bugtong panginahanglan mao rang pagsangko nila sa pangedarong 60. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: