Tinagoang pork barrel
Nabadlong ni Budget Secretary Benjamin Diokno si Presidente Rodrigo Duterte sa iyang pasalig pagdoble sa suholan sa mga polis ug mga sundawo sa unang tuig sa iyang pamunoan. Apan wa patuo si Duterte sa iyang tambag batok sa libreng matrikula sa tanang kolehiyo ug unibersidad nga gipanag-iya sa gobyerno.
Nakumbinser ni Diokno si Duterte nga ang pagpasimang sa pundo nga nagahin na alang sa ubang buhatan sa gobyerno aron idugang sa suholan sa mga polis ug sundawo makalapas sa pagbasura sa Korte Suprema sa Disbursement Acceleration Program (DAP) ni kanhi Presidente Noynoy Aquino.
-o0o-
Apan wa paminawa ni Duterte ang pasidaan ni Diokno nga di kalahutay ang nasudnong gobyerno sa P100 bilyones nga gastohan matag tuig paglibre sa tanang bayranan sa mga kolehiyo sa gobyerno. Mas nituo si Duterte sa pasalig sa mga senador ug kongresista nga P25 bilyones ray gikinahanglan matag tuig.
Klaro hinuong wa pa kadawat si Diokno sa iyang kapildehan. Padayon siya nga nagbagulbol sa kadako sa gasto. Ug nagbalikbalik siya sa pagpasidaan nga wa pay klaro asa kuhaa ang kuwarta aron mahatag ang makasaysayanon nga benepisyo.
-o0o-
Bisan si Duterte, nga gisamokan na tingali sa mga pasidaan ni Diokno, nangambot na lang asa kuhaa ang dakong kuwarta paglibre sa matrikula ug miscellaneous fees sa kabos nga mga tinun-an sa publiko nga mga kolehiyo.
May tubag dayon si Senador Panfilo Lacson nga nakapasamot sa sapot ni Diokno: Sayon ra nga kuhaon ang pundo gikan sa nagbuntaog nga pork barrel nga gipasukip nang daan sa gisugyot nga budget alang sa 2018.
-o0o-
Bisan sa kisikisi ni Diokno nga wa nay pork barrel, mas katuohan si Lacson nga, uban ni anhing Senador Joker Arroyo, malampusong nisalikway sa pork barrel bisan sa wa pa ideklarar nga unconstitutional sa labawng hukmanan.
Gipasabot ni Lacson ang bag-ong dagway sa pork barrel ubos ni Duterte: Gipapili og mga proyekto ang mga kongresista ug senador nga gastohan sa gahin sa tigpatuman nga mga ahensiya. Sa ato pa, mahimo ra gyong laplapan ang pork projects nga kasagaran gitumong lang sa pamolitika sa mga magbabalaod aron ibubo isip puhonan, di angayng isipon nga gastohan, alang sa mas sanag nga ugma sa kabataan. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment