Arangkada for October 2, 2017

Leo Lastimosa has attached the following document:

Arangkada for October 2, 2017

Snapshot of the item below:

Unsa may gitagoan?

        Way makapugos nilang Presidente Rodrigo Duterte ug sa mga sakop sa iyang pamilya sa pagtahan sa ilang katungod pagpabiling pribado sa ilang bank accounts. Makapasalipod sila sa Republic Act 1405 nga nagdili sa pagbisto o pagsusi sa mga deposito sa mga bangko.

Segun sa balaod, sekreto ang tanang deposito sa mga bangko sa Pilipinas, ug di mahimong tan-awon o imbestigahon ni bisan kinsa nga indibiduwal, o gobyerno, o opisyal, o buhatan. Kon mapamatud-an nga silang Senador Antonio Trillanes ug ubang gipasanginlan nakalapas sa katungod sa mga Duterte, mahimong mapriso sila og di molapas sa lima ka tuig o/ug mamultahan og P20,000.

-o0o-

Gitakda sa samang balaod nga mapakita lang sa publiko ang bank accounts sa mga Duterte kon:

• Si Presidente Duterte ug ang mga sakop sa iyang pamilya mohatag og sinuwat nga pagtugot;
• Mahimo na nga mga ebidensiya sa mga kaso sa impeachment sa House of Representatives ug sa Senado;
• May sugo sa korte sa mga kaso sa pagpanuburno o pagpabaya sa katungdanan sa mga opisyal o kawani sa gobyerno; ug
• May mga kaso nga ang gideposito nga kuwarta maoy sentro sa kontrobersiya.

-o0o-

Bisan sa gibalikbalik nga saad sa presidente pag-abli sa iyang bank accounts, di makalili ang mga magbubuhis pila gyod ang kinatibuk-an niya nga katigayonan kon di siya mopirma og sinuwat nga pagtugot. Mahimong magduda hinuon ang katawhan sa kapulihay nganong hangtod karon wa niya tumana ang saad.

Di makatabang sa kawsa sa presidente ang iyang mga pasiaw matag higayon nga paninglan sa iyang saad: Kay ganahan siya nga maningkamot si Trillanes ug di magsalig lang niya sa paghatag og mga ebidensiya sa mga pasangil batok sa iyang pamilya.

                -o0o-

        Laing sukaranan sa pagduda sa pasalig ni Duterte nga wa siyay ilegal ug tinagoan nga katigayonan mao ang nag-usab-usab niyang sulti--gikan sa pangangkon nga kabos ang iyang pamilya ngadto sa pagbutyag nga dako diay ang kabilin sa ilang mga ginikanan.

        Makapasamot sa kalibog sa mga magbubuhis nga human nipasalig nga pasagdan niya ang Ombudsman sa pagsusi sa tanang pasangil batok niya ug sa iyang pamilya karon nanghulga na nga iyang ipa-imbestigar ang Ombudsman ug ipadakop ang mga opisyal nga mosupak sa imbestigasyon. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 1, 2017

Leo Lastimosa has attached the following document:

Arangkada for October 1, 2017

Snapshot of the item below:

39 ka nasud ug 7 ka itoy

        Kuyaw nga mahurot ang mga balikas ni Presidente Rodrigo Duterte ini. 39 gyod ka nasud ang nisaway sa laktod nga mga pagpamatay ug pagpangyatak sa tawhanong katungod sa Pilipinas sukad sa iyang pagbanos sa Malakanyang.

Gisang-at ang hinugpong nila nga pamahayag atol sa ika-36 nga sesyon sa United Nations Human Rights Council sa Geneva, Switzerland. Tagsa-tagsaon ba sila ni Duterte sa pag-insulto tungod sa ilang pagbuyag sa iyang gubat batok sa ilegal nga drugas? O mapugos siya pagsubli sa duguong kampanya nga nikalas na og kapin sa 13,000 ka kinabuhi?

-o0o-

Nahimo ang talagsaon nga lakang sa kanasuran, nga naglakip sa labing suod nga mga alyado sa Pilipinas, human nanghambog si Foreign Affairs Secretary Alan Peter Cayetano nga nakumbinser niya ang UN General Assembly nga gilusad ni Duterte ang gubat sa drugas aron pagpanalipod sa tawhanong katungod.

Abtik hinuon si Cayetano ug Presidential Spokesperson Ernesto Abella nga nisumbalik sa 39 ka nasud nga nalingla lang sila sa sayop nga kasayuran. Kuwang na lang nga ilang tulisukon ang namirma nga mga nasud nga mga ilarunon ug mga biktima sa fake news.

-o0o-

Apan lisod tuohan nga pulos bugo, taphaw ug way tarung kabuot ang nagpakabana nga kadagkoan sa mosunod nga mga nasud:

Australia, Austria, Belgium, Bulgaria, Canada, Croatia, Cyprus, Czech Republic, Denmark, Estonia, Finland, France, Georgia, Germany, Greece, Iceland, Ireland, Italy, Latvia, Liechtenstein, Lithuania, Luxembourg, Macedonia, Malta, Moldova, Montenegro, Norway, Poland, Portugal, Rumania, Slovakia, Slovenia, Spain, Sweden, Switzerland, The Netherlands, United Kingdom, Ukraine ug United States.

        -o0o-

        Sa di pa sila bugalbugalan ni Presidente Duterte, angay niyang konsultahon ang iyang mga alyado nga apil sa 16 ka senador nga kusganong nikondenar sa extrajudicial killings: Senate President Pro Tempore Ralph Recto, Senate Minority Leader Franklin Drilon, Pangilinan, Aquino, Joel Villanueva, Hontiveros, JV Ejercito, Antonio Trillanes IV, Win Gatchalian, Panfilo Lacson, Grace Poe, Nancy Binay, Francis Escudero, Sonny Angara, Loren Legarda ug Leila de Lima.

        Human nagdumili pagpirma, nagdalidali pagsaway sa EJKs ang pito nga gipasanginlang iyang mga itoy sa Senado: Senate President Aquilino Pimentel III, Senate Majority Leader Vicente Sotto III, and Senators Manny Pacquiao, Cynthia Villar, Richard Gordon ug Juan Miguel Zubiri. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 30, 2017

Leo Lastimosa has attached the following document:

Arangkada for September 30, 2017

Snapshot of the item below:

Managlahi nga panglantaw

        Nabaraw ang sayo nga pagsaulog ni Senador Antonio Trillanes sa kalamboan nga gipahibawo sa buhatan sa Ombudsman sa imbestigasyon sa kasong plunder nga iyang gipasaka batok ni Presidente Rodrigo Duterte sa niaging kampanya sa piniliayng presidensiyal sa Mayo sa niaging tuig.

        Gisukwahi sa Anti-Money Laundering Council (AMLC) ang pahibawo sa Ombudsman nga nakuha na nilang ang mga dokumento sa mga transaksiyon sa bangko ni Duterte pinaagi sa AMLC ug nga ang mga dokumento susama sa mga ebidensiya nga gisumiter ni Trillanes usa ka tuig ug upat ka buwan nang nilabay.

                -o0o-

        Ang katalagsaon sa pahibawo ni Overall Deputy Ombudsman Arthur Carandang nga nakabuylo na ang ilang imbestigasyon sa katigayonan sa presidente ug sa mga sakop sa iyang pamilya, kay di man kasagaran nga moboluntaryo sila og kasayuran sa mga kaso nga padayon pa nilang gisusi, gisumbalik sa mas talagsaon nga panghimakak sa AMLC.

        Wa lang isalikway sa AMLC ang pahibawo ni Carandang, nga kuwang na lang og diyutay nga pasanginlan nila nga bakakon, kon dili gibasura pa gyod nila ang mga ebidensiya nga kaniadto ra nga gipasigarbo ni Trillanes.

                -o0o-

        Niang duha ka labing mahinungdanon nga bahin sa opisyal nga pamahayag sa AMLC:

• Gitun-an pa nila ang awhag sa Ombudsman, nga pinetsahan og Agosto 17 apan nadawat nila pagka Septiyembre 6 na karong tuiga, nga imbestigahon ang mga transaksiyon sa mga bangko sa mga Duterte; ug
• Gihulagway nila nga sayop ug lipat-lipat ang nahimutang sa mga dokumento ni Trillanes nga pagpatung-patong sa mga pundo nga nisud ug nigawas sa bank accounts sa mga Duterte.

                -o0o-

        Tinuod bang pasangil ni Presidente Duterte nga pabur-pabor ang mga imbestigasyon sa Ombudsman ug nga siya karon ang labing uwahi nga napilian nga apikihon? Tinuod ba sang mga pagduda nga nadutlan ang kadagkoan sa AMLC sa mga panghudlat ni Duterte maong gi-absuwelto na siyang daan?

        O posible ba kaha nga managlahi lang ang mga hubad sa Ombudsman ug sa AMLC sa mga dokumento nga ilang gihuptan? Kay samtang nagtutok ang mga imbestigador sa Ombudsman sa anggulo sa posibleng pangurakot ni Duterte, ang AMLC nisentro sab sa ilang atensiyon sa kahigayonan gigamit ang bank accounts sa mga Duterte sa money laundering? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 29, 2017

Leo Lastimosa has attached the following document:

Arangkada for September 29, 2017

Snapshot of the item below:

Katigayonan ni Duterte

        Ang mokabat og usa ka bilyon ka pesos nga mga transaksiyon sa bangko ni Presidente Rodrigo Duterte ug sa mga sakop sa iyang pamilya nga nakit-an sa buhatan sa Ombudsman ug sa Anti-Money Laundering Council (AMLC) wa magmatuod sa mga pasangil nga kawatan siya.

        Apan nisukwahi ni sa pangangkon sa presidente atol sa kampanya nga labihan kapobre sa iyang pamilya nga wa silang kapalit og tambal alang sa masakiton niyang inahan nga si Soledad, ang nangu sa taga Davao pagbarug batok sa diktadurang Marcos ug maoy nagsugod sa iyang pamolitika, nga namatay niadtong 2012.

                -o0o-

        Ang pahibawo sa mga imbestigador sa Ombudsman nga nitakdo ang mga dokumento sa mga transaksiyon sa bangko nga ilang nakuha gikan sa AMLC sa nahauna nga mga dokumento nga gisang-at ni Senador Antonio Trillanes ngadto sa ilang buhatan niadtong Mayo sa niaging tuig wa magmatuod nga may ilegal nga katigayonan si Presidente Duterte.

        Apan nisalikway ni sa pangangkon sa presidente ug sa iyang mga dumadapig nga nagpataka lang si Trillanes ug nga minau-mao ra ang mga dokumento nga iyang gibandilyo sa mga sakop sa media ug sa graft investigators sa Ombudsman.

                -o0o-

        Makapakugang ang kalamboan sa kaso nga gipahibawo sa Ombudsman kay mora man og way nahitabo bisan kapin na sa tuig nga napasaka ni Trillanes ang kaso ug nanghunaw pa gyod si Ombudsman Conchita Carpio Morales kay paryente silang Duterte.

        Gawas pa, naapsan nang kaso sa presidential immunity ni Duterte nga manalipod niya sa bisan unsang kasong kriminal hangtod sa pagkapupos sa unom ka tuig niyang termino unya sa udtong tutok sa Hunyo 30, 2022.

                -o0o-

        Bisan managlahi ang tumong sa duha ka imbestigasyon--ang Ombudsman mosusi sa anggulo sa pangurakot samtang ang AMLC mosusi sa aspeto sa money laundering--mag-abot sila sa pagtino kon diin gikan ang katigayonan ni Duterte ug sa iyang pamilya: Kabilin; o ginansiya sa negosyo; o kinawat; o kita sa smuggling, drugas o sugal.

        Kon may makaplagan silang kalapasan sa balaod, magamit ang imbestigasyon sa impeachment complaint batok ni Duterte. Apan kutob na lang sunod tuig si Ombudsman Morales ug gihudlat na sa presidente ang AMLC. Gawas pa, hingpit ang iyang mayoriya sa House of Representatives ug sa Senado. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 28, 2017

Leo Lastimosa has attached the following document:

Arangkada for September 28, 2017

Snapshot of the item below:

Kahibudngang pagtak-om

        Kahibudngan nang daan ang kahilom ni Presidente Rodrigo Duterte sa P6.4 bilyones nga balor sa shabu gikan sa mainland sa China nga nakalusot sa Bureau of Customs (BOC). Mas makapakugang ang iyang pag-insistir nga ang nagbaha nga shabu sa Pilipinas wa maggikan sa China kon dili gikan sa Taiwan.

        Di kasarangan ang iyang pagpakahilom. Kay mahimo man nga nataligam-an lang tungod sa kadaghan sa iyang mga giatiman isip labing taas nga opisyal sa nasud. Bisan kapila na tawga ang iyang atensiyon, determinado siya nga nagdumili sa pagtuki sa eskandalo.

                -o0o-

        Tungod ba kay gilambigit sa kontrabando ang mga sakop sa iyang pamilya? Tungod ba kay may nitumaw nga mge ebidensiya sa pakisusi sa Senate Blue Ribbon Committee nga mahimong nakagawas ang kontrabando gikan sa kustodiya sa BOC tungod sa gikaintapan nga Davao group?

        Nga gipasanginlang nagpayuhot og mga ukay-ukay, bugas humay ug luho nga mga sakyanan sa pantalan sa Davao sa mayor pa ug nipalapad sa ilang raket sa tibuok nasud karong nagtungkawo na siya sa Malakanyang. Ug nga giingong gipangulohan sa iyang anak nga si Davao City Vice Mayor Polong Duterte ug umagad nga si Atty. Mans Carpio.

                -o0o-

        Way napresentar si Duterte nga bisan usa ka gramo sa shabu nga gikan sa Taiwan. Apan gibalikbalik pagtumbok ang Bamboo Gang sa Taiwan nga maoy nagpabaha sa shabu dinhi sa ato.

        Hingpit niya nga giisnab di lang ang kapin 600 ka kilo nga shabu gikan sa China nga gipayuhot niadtong Mayo ning tuiga kon dili hasta ang mas dakong kontrabando nga 890 ka kilo nga shabu gikan sab sa China nga nasakmit sa San Juan City niadtong Disyembre sa niaging tuig.

                -o0o-

        Ang duha ka kontrabando sa shabu di mugna lang sa hunahuna sa iyang politikanhong mga kaatbang. Ang kontrabando niadtong Mayo nasakmit sa BOC nga gipangulohan sa iyang pinangga nga si Nicanor Faeldon. Samtang ang kontrabando niadtong Disyembre nasakmit sa National Bureau of Investigation (NBI) nga gipangulohan sa iyang tinudlo nga si Dante Gierran.

        Hadlok ba lang si Duterte nga manukmat sa suod niyang mga lider sa China? O mas hadlok siya nga mapiskan sa nangalisbo nga mga transaksiyon ang hinigugmang mga sakop sa iyang pamilya? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 27, 2017

Leo Lastimosa has attached the following document:

Arangkada for September 27, 2017

Snapshot of the item below:

Pagkabanhaw sa tingog

        Atol sa kinapungkayan sa popularidad ni Presidente Rodrigo Duterte, kanus-a ang tanan niyang sulti ug lihok gi-abibahan sa katawhan nga puno sa paglaom nga matinuod ang iyang gisaad nga dagkong kausaban paghimo sa katilingban nga mas makiangayon alang sa tanan, way nangahas sa pagbaraw niya.

        Ang pipila nga naghupot og sukwahi nga baruganan, sa wa pa moluwat og bisan unsang pamahayag, naneguro pagpahipi sa deklarasyon nga hingpit silang nagsuporta sa hiningusgan nga kampanya sa pamunoang Duterte batok sa kriminalidad ug pangurakot apan igo lang nisugyot og lahi nga paagi sa pagpatuman ini.

                -o0o-

        Bisan ang Simbahang Katolikong, kansang mga pari ug mga obispo nahiagom sa mga balikas ug bugal-bugal ni Presidente Duterte tungod sa pipila nila nga nakapanamastamas og mga bata ug mga babaye sa ilang mga parokya, nipili sa pagpakahilom inay sa pagpanalipod sa ilang kaugalingon.

        Bisan si Bise Presidente Leni Robredo ug ubang mga lider sa oposisyon nilikay sa pagluwat og mga pamahayag nga direktang mohagit sa mga baruganan ni Duterte ug mainampingon sa ilang pagpasabot sa panginahanglan sa pagpatigbabaw sa tawhanong katungod ug sa sistema sa hustisya.

                -o0o-

        Klarong gilikayan nila nga masugamak sa gidangatan sa mga wa kamatngon sa dakong risgo sa pagsungag sa pamunoang Duterte. Sama ni Senador Leila de Lima. Nga nabalhog sa bilanggoan tungod lang sa nagkasungi nga mga testimoniya sa mga konbiktado sa New Bilibid Prison nga pulos gipasaligan og immunity sa liderato sa House of Representatives.

        Tuod man, silang de Lima ug mga pari ug mga obispo nga wa magtagad paghapaw-hapaw sa ilang sinultihan nahiagom sa way kinutoban nga kauwawan. Naangin pa ang inosente nga mga higala ug mga sakop sa ilang pamilya.

                -o0o-

        Apan karong bag-o, tungod sa sunudsunod nga pagpatay sa mga bata sa gubat sa drugas, inanay nga nakaplagan pagbalik sa nagpakabana nga mga sektor sa katilingban ang ilang tingog. Ug nakugang si Duterte sa kapintok ug kalanog sa hiniusa nilang tingog.

        Labing lisod lalison ang iyang mga alyado sa 16 sa 23 ka senador nga niawhag pagtapos sa extrajudicial killings nga silang Joel Villanueva, Ralph Recto, JV Ejercito, Sherwin Gatchalian, Panfilo Lacson, Grace Poe, Nancy Binay, Francis Escudero, Sonny Angara ug Loren Legarda. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 26, 2017

Leo Lastimosa has attached the following document:

Arangkada for September 26, 2017

Snapshot of the item below:

Pamakak nga way kinutoban

        Pagdaog nang Presidente Rodrigo Duterte sa piniliay sa Mayo sa niaging tuig, gibadlong ang iyang mga dumadapig nga nanghudlat ug nagbugalbugal ug nagbutang-butang pinaagi sa social media sa napilde niya nga mga kaatbang.

        Gihangop sa iyang mga kaatbang ug sa ilang mga dumadapig ang lakang ni Duterte. Giisip nga simbolo sa inanay na nga pagkausab ni Duterte gikan sa kandidato nga naningkamot pagpaukyab sa lunod patay niya nga mga dumadapig ug paghimo nga mas lig-on pa sa ilang suporta. Ngadto sa pagka amahan sa tibuok nasud ug sa tanang katawhan.

                -o0o-

        Usa ka tuig ug duha ka buwan human sa iyang pagbanos sa Malakanyang, si Duterte ug ang mga sakop sa iyang gabinete gawas nga napakyas iresponsable nilang mga dumadapig nasakpan pa gyod sa pila na ka higayon nga nigamit sa sayop nga kasayuran nga ilang gipakatap sa social media.

        Apil sa nakuryente si Justice Secretary Vitaliano Aguirre. Kinsa nipakita sa hulagway sa social media sa mga senador sa oposisyon nga giingong nagtigom pagpasiugda sa gubot sa Marawi City. Apan ang nahulagwayang tigom lain diay og tuyo ug didto makuha sa Iloilo.

                -o0o-

        Labing uwahi nga nabiktima si Presidente Duterte. Kinsa nikubit sa posts sa social media sa iyang mga dumadapig nga gipangulohan ni Presidential Communications Assistant Secretary Mocha Uson sa giingong bank accounts si Senador Antonio Trillanes.

        Dihang napamatud-an ni Trillanes nga peke ang bank accounts, napugos si Uson sa pagdalidali og tangtang sa iyang post. Apan si Duterte nidason sa pasangil. Nga iyang gibalikbalik sa iyang mga diskurso pagmatuod nga kawatan si Trillanes.

                -o0o-

        Dihang napamatud-an na sang Trillanes nga bakak ang pasangil ni Duterte, way pupanagana nga giangkon sa presidente nga gimau-mao ra niya ang mga numero sa bank accounts. Wa magtagad pagpangayo og pasaylo sa nabisto niyang bakak.

        Nganong wa na man managana silang Duterte ug kaubanan pagpakatap sa bakak nga kasayuran? Kay human sa usa ka tuig ug duha ka buwan nga pagtungkawo sa gahom, nakumbinser sila nga motuo gihapon ang ilang mga dumadapig sa bisan unsang bakak, basta mohaom lang sa linya sa ilang propaganda nga sila ray takos nga makapadayon sa pagpatuman sa dagkong kausaban nga sa kataposan niabot na. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 25, 2017

Leo Lastimosa has attached the following document:

Arangkada for September 25, 2017

Snapshot of the item below:

Tinuod nga hawod sa Sugbo

        Si Alita Pulga, officer in charge sa Land Transportation Office (LTO) sa Central Visayas, ang usa sa nakapahimus sa kalibog ni Presidente Rodrigo Duterte kinsa ang paminawon sa nagkasungi niyang mga sinaligan sa Sugbo. Kasaligan namong tinubdan nagbutyag nga di si Pulga apan managlahi ang mga ngan nga nga girekomendar ngadto ni Duterte nga mobanos sa liderato sa LTO 7 gikan nilang:

• Cabinet Secretary Leoncio Evasco Jr.;
• Kalihim Adelino Sitoy, presidential adviser on legislative affairs ug pangu sa Presidential Legislative Liaison Office; ug
• Presidential Assistant Michael Lloyd Dino.

                -o0o-

        Laing tinubdan nibutyag nga dako ang tingog ni Evasco kinsa ang matudlo sa labing mahinungdanon nga mga katungdanan dinhi sa Sugbo ug sa rehiyon. Gawas lang kon may sukwahi nga mga rekomendasyon si Dino. Ug kon sama sa kaso sa LTO may lain sang itugpo si Sitoy.

        Sa nag-ung-ong nga paghulip sa nabakanteng katungdanan ni kanhi Cebu City Councilor Hanz Abella, kon si Dino lang ang paminawon sa presidente, seguro na nga matudlo ang iyang bayaw nga si Renato Osmena Jr. Apan mahimong mosukwahi sa iyang kabubut-on si Evasco.

                -o0o-

        Samang tinubdan nipasabot nga ang pagtudlo ni Abella sa National Labor Relations Commission wa moagi ni Evasco. Nga gikatahong nakugang ug nahimangod kay nakapapas man sa mayoriya sa Cebu City Council sa iyang suod nga si Cebu City Mayor Tommy Osmena.

        Isip konsuylo sa paglaktaw niya, si Evasco, nga maoy gitahasan ni Duterte nga magsilbi nga iyang taytayan sa mga hangyo ni Mayor Osmena, ang gikataho nga gitugyanan sa Malakanyang pagbuot kinsay irekomendar ngadto sa presidente nga ipuli ni Abella.

                -o0o-

        Napilian ni Evasco nga ipuli ni Abella iyang sinaligan sa Sugbo sa kampanya ni Duterte sa niaging piniliay, di sakop sa Team Rama ni sa Bando Osmena Pundok Kauswagan. Kinahanglan nga maningkamot ang duha ka pundok pag-usab sa iyang hunahuna.

Ang pangu sa United Nationalist Alliance, kanhi Bise Presidente Jejomar Binay, niduso na ni Renato Osmena Jr. Apan di makadaot sa politikanhong interes ni Binay ang pagduso sa laing ngan nga irekomendar ni Evasco aron tinuod nga may kapilian ang presidente. Busa sa di pa magsaulog si Renato Jr., angay una siyang mo-amen sa kanhi pari nga si Evasco. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 24, 2017

Leo Lastimosa has attached the following document:

Arangkada for September 24, 2017

Snapshot of the item below:

Pagdagkot og kandila

        Magdagkot ko og kandila. Kay maoy labing yano nga paagi sa pagpadayag sa akong kahingawa sa mga panghitabo sa atong nasud. Kay maoy labing luwas nga paagi sa pagpadayag sa akong pagsupak sa laktod nga mga pagpamatay ug pinatuyangan nga paghudlat sa demokratikanhong mga institusyon.

        Kay maoy labing sayon nga paagi sa pagprotesta batok sa lapad nga pagbinastos, pagbugal-bugal ug pagbuong sa mga kadungganan sa katawhan nga nangahas pagsukwahi sa pamunoan, o bisan way gihimo apan nahimo lang babag sa mga tinguha sa mga nagtungkawo, nga nahubog na, sa gahom.

                -o0o-

        Magdagkot ko og kandila. Kay maoy labing laktod nga paagi sa pagpahasubo sa nagbangotan nga mga pamilya sa inosenteng mga biktima, nga wa hatagi og kahigayonan pagpatin-aw ni pagpanalipod sa ilang kaugalingon, sa laktod nga mga pagpamatay sa bangis ug duguon nga gubat batok sa ilegal nga drugas.

        Kay maoy labing malukpanon nga paagi pagpangayo og hustisya alang sa tanang napukan sa kangitngit. Kay maoy labing malaumon nga paagi sa pagpangindahay nga makaangkon na unta og dinalian nga banagbanag ang labing ngiob nga bahin sa kagabhion sa atong nasud ug katawhan.

                -o0o-

        Magdagkot ko og kandila. Kay maoy labing isog nga lakang nga akong madangpan atubangan sa hiningusgang kampanya sa pagpanghadlok ug pagpatak-om sa mga nagtinguha sa pagbaraw sa gisaad nga kausaban, nga inay mohatod nato sa kalamboan abunda na mang timaan nga monudnod nato sa kaalaotan.

        Kay labing makiangayon nga paagi pagpasabot sa akong baruganan sa way pagdani og lalis ug panagsungi sa akong suod nga mga silingan ug mga higala.

                -o0o-

        Magdagkot ko og kandila. Paghangop sa pagtimbakuwas sa nagkalainlaing sektor sa pagpakabana bisan sa tanang panggukod nga mahimo nilang mahiagoman. Pagpalanog sa tingog nga nakaplagan sa katawhan nga nahigmata na human sa pasiuna nga katalaw ug panagana.

        Magdagkot ko og kandila sugod karong alas-8 sa gabii hangtod sa mosunod nga 40 ka gabii dungan sa pagbagting sa mga kampanaryo sa mga simbahan. Uban ang pangilaba nga mokuyanap ang hingpit nga kahayag sa paglingkawas gikan sa kangitngit sa pagkutlo sa mga kinabuhi ug pagyatak sa tawhanong katungod. Ug pangaliya nga ang singgaak sa mga lingganay makagusbat sa bagtok nga tentasyon sa pagpakahilom ug pagpangiyugpos. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for September 23, 2017

Leo Lastimosa has attached the following document:

Arangkada for September 23, 2017

Snapshot of the item below:

Nabitik sa mga palusot

        Ambot may nahibilin pa ba sa listahan sa mga palusot nga wa pa magamit sa Malakanyang sa mga kontrobersiya nga namugna sa mga sulti o mga lakang ni Presidente Rodrigo Duterte sukad sa pagbanos niya sa Malakanyang usa ka tuig ug tulo ka buwan nang nilabay.

        Kinaham nga panagang sa mga tigpamaba ug mga magtatambag ni Duterte mao nga angayng sabton ang iyang gigikanan: Nagdako siya sa usa sa labing himalikas nga distrito sa Dakbayan sa Davao ug ang mga pasiaw sa mga Bisaya usahay lisod nga sabton sa mga Tagalog.

                -o0o-

        Mao ni ilang palusot dihang nagbaha na ang mga balikas ni Duterte sa hapit matag adlaw niyang diskurso ug bisan atol sa iyang State of the Nation Address (SONA) ug dihang nainsulto ang kababayen-an ug ubang hut-ong sa mga insulto ug bugalbugal nga iyang gibakwi isip komedya.

        Dihang nitumaw ang makalibog niyang mga pamahayag, giawhag nila media sa kaulohan sa pagpangutana sa media sa Davao nga kamaong mobasa sa iyang mga lihok aron matugkad unsay tinuod niyang gipasabot. Apan ang media sa Davao mismo nikumpisal nga utro sab silang naglibog.

                -o0o-

        Dihang nasakpan ang sayop niyang mga pamahayag, nga ang pipila napamatud-an gyod nga dagkong bakak, apil nang iyang pag-angkon nga nag-imbento lang og mga numero sa bank account nga iyang giingong gi-depositohan sa kinawat nga katigayonan ni ni Senador Antonio Trillanes, niawhag ang Malakanyang nga sabton ang lahi niyang estilo.

        May pakapin pang pasidaan nga nahibawo si Duterte sa iyang gibuhat. Ug nga posibleng ang pagluwat og sayop nga kasayuran tinuyo ug kabahin sa mas dakong taktika pagbisto sa kahiwian sa iyang mga kaatbang.

                -o0o-

        Sa laktod, gitambagan ta sa Malakanyang nga si tuohan si Presidente Duterte. Ambot tinuyo ba o wa lang kamatngon nga mao ni gidangatan sa tanan nilang palusot, ilang gipintal si Duterte nga tinuorayng kalibogan.

        Nga di seryusuhon ang tanang sulti kay mahimong lain ang gipasabot. Nga mahimong motuyo og panglingla aron di mabantayan ang tinuod niyang katuyoan. Human sa usa ka tuig ug tulo ka buwan nga pagtugyan sa nasud ngadto sa pangu nga mahimong mousab sa iyang hunahuna bisan unsang orasa sa bisan unsang hinungdan, makasalig ba ta niya? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.