Arangkada for September 11, 2017

Leo Lastimosa has attached the following document:

Arangkada for September 11, 2017

Snapshot of the item below:

Labad sa pagbalitok

        Sa makausa pa, nakaamgo ang mga politiko nga ang ilang bisyo sa kasayon rang makabalitok sa mga partido gawas nga makahatag nila sa tumang kasayon pagsipsip ni bisan kinsang magtungkawo sa gahom makamugna sab og higante nga labad sa ulo.

        Tungod sa makapakugang nga pagkatudlo ni Cebu City Councilor Hanz Abella isip commissioner sa 7th Division sa National Labor Relations Commission (NLRC), mahimong mahibalik ang mayoriya sa Cebu City Council sa Team Rama. O, tungod sa kamabalhinon sa politikanhong mga baruganan, mahimo sang magpabilin sa Bando Osmena Pundok Kauswagan (BOPK).

                -o0o-

        Ang pasiunang pagtuo nga basiyo nga buyot ang mahibilin sa BOPK kon hingpit nang mobiya si Abella sa City Council, kay gawas nga mawa ang usa ka boto nilang mayoriya mapun-an sab og usa ang Team Rama nga ubos sa balaod maoy morekomendar og ipuli isip orihinal nga partido ni Abella, usa ra diay ka tumoy sa kontrobersiya.

        Ang pikas tumoy mao nga ang pagkapaso sa BOPK, human nakapahimus sa pagbalitok ni Abella, mahimong mahiagoman sab sa Team Rama. Kay ang ilang mga sakop nibalitok na sa PDP-Laban ni Presidente Rodrigo Duterte.

                -o0o-

        Kon tinuod nga di ang Partido Panaghiusa sa Panerbisyo-Team Rama (PPP-TR) ang gidaganan nilang Abella ug kaubanan kon dili ang United Nationalist Alliance (UNA), di taga Cebu City ang makaduso sa iyang puli kon dili taga Makati City.

        Ug si kanhi Bise Presidente Jejomar Binay, haring gangis sa UNA, wa mahimuot nga mora siyang nuog nga gisalibay sa suok dihang ang mga sakop sa PPP-TR naglumba og panumpa sa PDP-Laban atubangan ni House Speaker Pantaleon Alvarez sa Agosto sa niaging tuig.

                -o0o-

        Ang alas ni kanhi Cebu City Mayor Mike Rama mao nga, human pasanginli nga drug protector, wa siya mobalitok sa PDP-Laban. Busa makapangangkon nga nagpabiling matinud-anon nga alyado ni Binay sa Sugbo sa iyang pagduso sa kinakusgang niyang dumadapig sa habagatang distrito puli ni Abella.

        Apan si Binay wa matawo gahapon. Nahibawo siya nga si bisan kinsang iduso ni Rama di itudlo ni Duterte. Busa mahimong morekomendar si Binay og laing ngan nga mas madawat sa Malakanyang. Nga mahimo sang mas ganahang mobotar uban sa BOPK kay sa Team Rama. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.