Arangkada for September 15, 2017

Leo Lastimosa has attached the following document:

Arangkada for September 15, 2017

Snapshot of the item below:

Lipatlipat sa CHR

        Sa mga nisupak sa paglaslas sa budget sa Commission on Human Rights (CHR) sa 2018, usa sa labing kusganon mao ang pasidaan ni Kongresista Raul del Mar sa amihanang distrito sa Dakbayan sa Sugbo: Ang pag-inutil sa ahensiya nga gitukod sa 1987 Constitution mao ang pagsalikway sa tanang kalibotanong kauyonan nga gisudlan sa Pilipinas sa pagpatigbabaw ug pagpanalipod sa tawhanong mga katungod.

        Lahi sa mayoriya sa mga kongresista sa Sugbo ug ubang bahin sa Pilipinas, nga naglumba pagtila sa lapalapa sa pamunoan ni Presidente Rodrigo Duterte, si del Mar nipasundayag og talagsaong kaisog ug kaligdong.

                -o0o-

        Sa kadako sa binuang sa paggahin lang og P1,000 sa CHR sa tibuok tuig sunod tuig, nga mosangpot sa pagka-inutil sa kampanya pagsusi sa mga pasangil sa mga pangabuso sa kapolisan ug militar ug sibilyan nga mga opisyal batok sa labing kabos, gamay ug way ikasukol nga mga molupyo, sa way paghisgot sa ilegal nga pag-iban sa suholan ug mga benepisyo sa gatosan ka mga kawani sa CHR sa tibuok nasud, may sukaranan ang mga pagduda nga gitumong ang lakang paglipat sa katawhan gikan sa mas dagkong eskandalo nga nibalikos sa Malakanyang.

                -o0o-

        Nahibawo silang House Speaker Pantaleon Alvarez, nga maoy nagpasiugda sa maniobra, ug Presidente Duterte, nga nanghunaw og responsibilidad apan hingpit nga nipaluyo sa nangalisbo nga laslas, nga bisan ang labing suod nilang mga alyado sa Senado di modason sa binuang.

        Kay matanggong man ang nasudnong budget kon di magkauyon ang duha ka bay balaoranan, dako ang kahigayonan nga paukyab ra ang paglaslas apan segurong mahibalik ang orihinal nga gahin alang sa CHR sa di pa matapos kining tuiga.

                -o0o-

        Kon mao, unsaon man sa katawhan aron di malipat? Ipadayon ang pagtunglo sa pag-apiki sa CHR, kay di man angayng palabyon ang panglapas sa pamunoan o ni bisan kinsa, apan di angayng molingiw sa mas dakong hulagway.

        Nga mao ang inanay nang pagkakaplag sa katawhan sa ilang tingog. Nagpakahilom sila sa unang tuig kay nihatag sa tanang kahigayonan sa gisaad nga kausaban sa pamunoang Duterte. Apan kay wa may ikapakita gawas sa nangligdas nga mga patayng lawas, nituyhakaw ang pagpakabana nga di mahimong barawon sa bisan unsang maniobra. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.