Sunday, September 17, 2017

Arangkada for September 19, 2017

Lalis sa CHR



Gawas lang sa mga lunod-patay nga mga dumadapig ni Presidente Rodrigo Duterte, wa nay ganahan nga moangkon nga nibotar sila alang sa P1,000 nga budget sa Commission on Human Rights (CHR) alang sa 2018. Pipila sa wa maapil sa listahan sa 32 ka kongresista niinsistir nga mobotar unta sila batok sa paglaslas sa budget nga susama ra og epekto sa pagpapas sa CHR kon nakaapil pa lang sa botasyon.

Way opisyal nga listahan ang House of Representatives sa mga boto kay igo lang gipatingog ug dayon gipabarug ang mga kongresista nga pabor ug supak: 119 ang pabor sa laslas, 32 ang supak ug kapin sa gatos ang wa motingog ni mobarug.

-o0o-

Usa sa law-ay nga bahin sa lalis sa budget sa CHR mao ang pagsukitsukit ni SAGIP Party-list Representative Dante Marcoleta sa Sugbuanong kongresista nga si Raul del Mar nga nanalipod sa CHR.

Gitumbok ni Marcoleta ang kapakyas sa CHR pagpanalipod ni Presidente Rodrigo Duterte dihang nigawas ang editorial sa New York Times niadtong Abril 25 karong tuiga nga nag-ulohan nga "Let the World Condemn Duterte." Nangugat si Marcoleta nga nalapas sa langyawng pamantalaan ang tawhanong katungod ni Duterte.

-o0o-

Sakto sila del Mar ug Kongresista Edcel Lagman sa Albay nga napakyas si Marcoleta sa pagtugkad sa batakan nga kalainan sa ordinaryo nga krimen ug sa kalapasan sa mga tawhanong katungod. Gitumbok ni Marcoleta ang kapakyas sa CHR pagkondenar sa mga pagpanghasi sa Abu Sayyaf, Maute Group ug ubang mga rebelde.

Matod nila takos ang gobyerno nga manalipod sa katawhan gikan sa mga rebelde ug mga terorista. Ang CHR makapanalipod sa katawhan gikan sa pangabuso sa mga opisyal ug ahensiya sa gobyerno.

-o0o-

Gawas nilang del Mar ug Lagman, nisupak sab sa laslas sa budget sa CHR silang Wilfredo Caminero; Aileen Radaza; Jocelyn Limkaichong; Rav Rocamora;  Tom Villarin; Gary Alejano; Lito Atienza; Kaka Bag-ao; Jorge Banal; Jose Christopher Belmonte; Emmanuel Billones; Gabriel Bordado; Arlene Brosas; Ariel Casilao; France Castro; Raul Daza;

Emmi de Jesus; Sarah Elago; Bayani Fernando; Lawrence Fortun; Mark Go; Evelyn Mellana; Rosenda Ann Ocampo; Bai Sandra Sema; Antonio Tinio; Rosanna Vergara; Carlos Zarate; Manuel Zubiri; Edgar Erice; ug Ben Evardone. [30] leo_lastimosa@abs-cbn.com

No comments: