Arangkada for September 4, 2017

Leo Lastimosa has attached the following document:

Arangkada for September 4, 2017

Snapshot of the item below:

Salida sa Senado

        May sukaranan silang Senador Dick Gordon, tsirman sa Senate Blue Ribbon Committee, ug Senate Majority Leader Tito Sotto sa pagbalibad sa mga awhag nga dapiton sa ilang imbestigasyon sa P6.4 bilyones nga shipment sa shabu gikan sa China silang Davao City Vice Mayor Paolo Duterte ug Atty. Mans Carpio, anak ug umagad ni Presidente Rodrigo Duterte.

        Kay bisan sa wa pa makakita og dakong planggana nga kahunawan silang Customs fixer Mark Taguba ug iyang abogadong si Raymond Fortun, gibalikbalik na niya nga wa gyod siyay direktang transaksiyon uban nilang Paolo ug Mans, igo rang giwarawara ang ilang mga ngan sa mga nangangkong sakop sa Davao Group.

                -o0o-

        Apan kon silang Paolo ug Mans kasarangan pa lang nga mga molupyo ning nasura ug kon di pa sila sikit sa Malakanyang, hagbay ra silang giguroy sa mga senador pagpanubag sa ilang mga pangutana.

        Kon sakto pa lang sab sa kaisog ug kaligdong ang mayoriya sa mga senador, kon ang ilang pakisusi managsama pa lang unta og panglantaw bisan kinsa pa ang hingtungdan ug bisan kinsa pa ang maig-an, di na unta kinahanglang mangugat pa si Senador Antonio Trillanes pagdapit nila.

                -o0o-

        Kon wa pa sab mosud sa ilang ulo ang ilang nagbuntaog nga gahom ug influencia, tungod lang sa ilang pagka sumpay og tinai sa presidente, hagbay ra untang niboluntaryo silang Paolo ug Mans pag-atubang sa Senado. Di na unta mabisto nga puti diay og kiting si Gordon kon mas dako kay niya ang puntirya sa imbestigasyon.

        Maong may sukaranan ang mga pagduda nga may gitagoan silang Paolo ug Mans. O nga wa pa mahibaw-i ang hingpit nga kamatuoran.

                -o0o-

        Sa di pa sang kabuylo ang mosunod nga pagpaburot pag-ayo sa importansiya kon moatubang na gyod silang Paolo ug Mans sa mga senador ug kon makahigayon na gyod si Trillanes sa pagbatil nila og pangutana, gamay lang nga pahinumdom:

        Kasagaran sa mga imbestigasyon sa Senado mas daghan og saba kay sa unod; ambot pila ra ka makahuloganong balaudnon ang naumol tungod sa mga pakisusi; ug ambot pila ra ka kaso ang nitunhay tungod sa mga ebidensiya nga ilang nahipos. Way sukaranan ang pagtuo nga lahi ang resulta ning bag-ong kontrobersiya. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.