Krimen nga way kriminal
Nasakmit sa Bureau of Customs (BOC) ang 605 ka kilo nga shabu, nga gibanabanang mobalor og P6.4 bilyones, niadtong Mayo 26 ning tuiga, o kapin sa tulo ka buwan nang nilabay. Ang nangu sa ronda mao silang kanhi Customs Commissioner Nicanor Faeldon ug Direktor Neil Estrella sa Criminal Investigation and Intelligence Service (CIIS) sa BOC.
Hangtod karon, nataktak na si Faeldon ug ni-resign na si Estrella sa ilang katungdanan, wa pay nahipos nga klarong kasayuran kinsa ang tinubdan sa shabu gikan sa China ug kinsa ang padulngan unta sa kontrabando dinhi sa Pilipinas.
-o0o-
Ang buwag nga mga imbestigasyon sa House of Representatives ug Senado, bisan sa kaabunda sa ilang resource persons nga naka-detalye sa matag lakang sa pagdunggo ug paggawas sa pantalan sa Tondo, Manila ug pag-abot sa bodega sa Valenzuela City, lain ang gitutokan.
Ang House Committee on Dangerous Drugs niapiki ni Faeldon, nga nibalibad sa promosyon sa rekomendado ni House Speaker Pantaleon Alvarez, ug niawhag nga papason ang BOC. Ang Senado utrong nalipat sa patas-anay og garbo nilang Senate Blue Ribbon Committee Chairman Richard Gordon ug Senador Antonio Trillanes.
-o0o-
Inay mopalawom sa mas una nilang imbestigasyon, nga nakabuylo na duha ka buwan sa wa pang katimaho ang Kongreso, silang Faeldon ug kaubanan niwarawara hinuon sa suwat sa Anti-Smuggling Bureau (ASB) sa China nga nipahalipay nila sa pagsakmit sa kontrabando.
Ang duha ka pahina nga suwat nga pinetsahan og Hulyo 17 ug pinirmahan sa pangu sa ASB nga si Zhang Xiaohui nipasalig nga way Pilipinhon nga naapil ug nga way laing kontrabando nga gipayuhot sa Pilipinas.
-o0o-
Wa magtagad silang Faeldon ug kaubanan pagsusi kinsa ang upat ka taga Mainland China nga gilambigit sa kontrabando ug nadakpan sa ASB aron pagsubay kinsa ang ilang mga kakonsabo nga mao untay mopakatap sa makalilisang nga shabu sa Pilipinas.
Ang kadudahan nilang pangiyugpos ug ang talagsaong pagpakahilom ni Presidente Rodrigo Duterte, nga mas nasuko pang Trillanes kay sa mga sungayan nga nagpayuhot sa shabu, di mga timaan sa gobyerno nga determinadong nangita sa kamatuoran. Kon dili maoy klarong pasundayag sa mga opisyal nga dunay gitipigan nga mga tinagoan nga di nila ganahan nga mahibaw-an. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment