Arangkada for November 2, 2017

Leo Lastimosa has attached the following document:

Arangkada for November 2, 2017

Snapshot of the item below:

Igo lang nangagpas

        Ang kama-usab-usabon sa panahon naribalan lang sa nag-usab-usab nga banabana sa PAGASA (Philippine Atmospheric, Geophysical and Astronomical Services Administration) sa kahimtang sa panahon sa Kalag-Kalag sa Sugbo ug Kabisay-an:

• Ang orihinal nilang pangagpas niadtong Dominggo, Oktubre 29, mao nga init ang Sugbo hangtod sa Miyerkules, Nobyembre 1;
• Pagka-Lunes, nipasidaan ang PAGASA nga tungod sa low pressure area uwanon ang Sugbo sugod sa Martes sa gabii (Oktubre 31) ug mas uwanon pa gyod sa Miyerkules (Nobyembre 1); apan
• Pagka-Martes sa kadlawon, niangkon ang PAGASA nga tibuok adlaw nang uwan tungod sa LPA.

                -o0o-

        Niangkon ang kadagkoan sa PAGASA nga mas lisod ang pagbanabana sa dagan sa LPA kay lahi sa mga bagyo wa ni klaro nga gikusgon ni direksiyon. Mao nga mas sayo kay sa ilang gitakda ang pagsaka sa LPA gikan sa Mindanao paingon sa Kabisay-an:

• Nasigpatan ang LPA duol sa Surigao City sa Martes sa kadlawon;
• Nitugpa ang LPA sa Sogod, Southern Leyte sa alas-10 sa buntag sa Martes;
• Nakit-an ang LPA duol sa Masbate sa alas-3 sa hapon sa Martes;
• Dayong tungang gabii sa Martes, nitungod ang LPA sa Iloilo;
• Nahimo nang bagyong Ramil ug nipaduol sa Roxas City sa Miyerkules sa kadlawon; ug
• Nitungod si Ramil sa Coron, Palawan sa Miyerkules sa buntag.

                -o0o-

        Maong nasipyat sab ang orihinal nga pangagpas sa PAGASA nga mahimong bagyo ang LPA inig gawas na sa Philippine Area of Responsibility (PAR). Nikusog ang iyang hangin ngadto sa 45-70 ka kilometro matag oras ug nahimo nga tropical depression samtang didto pa sa kasadpang Kabisay-an.

        Mogawas na si Ramil sa PAR karong Biyernes, mas sayo kay sa gitakda.

                -o0o-

        Nitidlom ang gidaghanon sa mga niduaw sa labing dagko nga mga mga minteryo sa Sugbo ug Central Visayas gahapon. Mahimo nga kasagaran nila nabalaka sa pasidaan sa PAGASA nga di igkita ang adlaw ug kinakusgan nga uwan ang mobundak sa Nobyembre 1.

        Di hinuon mabasol ang PAGASA. Nga nihimo sa banabana pinasikad sa nangagi nga susama nga mga LPA ug bagyo, nga susama og gikusgon ug nga nisubay sa susama nga ruta. Apan way makagawong sa LPA o sa bagyo kanus-a mosaka, o mosimang, o mokusog, o matunaw. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 1, 2017

Leo Lastimosa has attached the following document:

Arangkada for November 1, 2017

Snapshot of the item below:

Pagpahiyos sa pension

        Samtang naghinam-hinam na ang mga polis ug mga sundawo sa pagka-doble sa ilang suholan sugod karong bag-ong tuig, nagsugod na og pangluod ang retirado nga mga sakop sa Philippine National Police (PNP) ug Armed Forces of the Philippines (AFP). Kini tungod sa pag-uyon sa mga kongresista ug mga senador sa sugyot sa Malakanyang nga di maapil sa dakong uminto ang pension sa retiradong mga polis ug mga sundawo.

        Gipasabot ni Budget Secretary Benjamin Diokno nga malansang ang mga pension sa PNP ug AFP kay mabangkarota ang nasudnong panudlanan kon i-apil sa dakong uminto nga dugay nang gisaad ni Presidente Rodrigo Duterte.

                -o0o-

        Gibasol na sa retirado nga mga polis si PNP Director General Bato dela Rosa sa kapakyas pag-kampeyon sa ilang kawsa. Nanghunaw nang daan si dela Rosa nga wa siyay mahimo sa pagsukwahi sa rekomendasyon sa Development Budget Coordination Committee (DBCC) nga gidominahan sa economic managers ni Presidente Duterte.

        Wa matagbaw ang mga retirado sa pasalig ni Diokno nga padayon nga gitun-an ang makiangayon nga kausaban sa pension system sa PNP ug AFP kay di makalahutay ang nasudnong panudlanan kon magdungan og tubo ang suholan sa aktibo ug retiradong mga sakop.

                -o0o-

        Usa sa gitun-an nga kausaban mao ang pagbanos sa Government Service Insurance System (GSIS) sa pagduma sa pension system sa PNP ug AFP. Apan nagkinahanglan ang GSIS og abuno nga P7 trilyones gikan sa nasudnong gobyerno aron makalahutay sa dugang nga responsibilidad.

        Apan angayng dawaton sa retiradong mga polis ug mga sundawo nga way forever. Labi na sa ilang gidemanda nga padayon nga magdungan og tubo ang mga suholan sa mga aktibo ug mga pension sa mga retirado.

                -o0o-

        Kon makakuha sa simpatiya sa mga kongresista ug mga senador ang kawsa sa retirado nga mga polis ug mga sundawo, mameligro nga di mahinayon ang uminto sa suholan sa mga naa sa aktibong serbisyo sugod karong Enero 1.

        Kay kinahanglan nang ipasar sa House of Representatives ug sa Senado karong buwana ang hinugpong nga resolusyon nga mogahin og P63.4 bilyones sa inusbawan nga suholan sa mga sakop sa PNP, AFP, Bureau of Fire Protection (BFP) ug Bureau of Jail Management and Penology (BJMP). [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 31, 2017

Leo Lastimosa has attached the following document:

Arangkada for October 31, 2017

Snapshot of the item below:

Duterte ug Akihito

        Gawas nga di maka-usap og bubble gum ni makapamalikas sa iyang pakig-atubang ni Emperador Akihito sa Japan, angay sab nga pahinumdoman si Presidente Rodrigo Duterte sa ubang mga lagda sa paghangop sa giisip nga ginoo sa yuta sa mga Hapones:

• Di siya mahimo nga direkta nga motimbaya ni Emperador Akihito kay ang tukma nga tawag niya mao ang "His Majesty the Emperor of Japan;" ug
• Kon magkatagbo sab sila, kinahanglan nga tawgon ni Duterte si Empress Michiko nga "Her Majesty the Empress of Japan" ug si Prince Naruhito isip "His Imperial Highness."

                -o0o-

        Kon naglibog na hinuon si Presidente Duterte tungod sa kadaghan sa mga tambag ug pasidaan nga iyang nadawat alang sa kaduha na mauswag nilang panag-abot ni Emperador Akihito, wa siya mag-inusara.

Ang iyang gibalikas nga si kanhi US President Barack Obama niyukbo ug nakiglamano ni Akihito niadtong 2009 samtang si kanhi US President George niyukbo apan wa makiglamano ni Akihito niadtong 1989. Pulos gisaway silang Bush ug Obama sa pagpakauwaw sa Estados Unidos. Samtang si Obama gisaway sab kay angay untang nipili lang og usa--pagyukbo o pakiglamano--di sa duha.

                -o0o-

        Mas palaran hinuon si Presidente Duterte kay sa ubang mga pangu sa nasud sa katuigan nga labihan pa kahawod sa Japan ug giila pa ang emperador nga "Anak sa Langit" (gisalikway ni anhing Emperador Hirohito ang iyang titulo isip "Buhi nga Ginoo" sa pagtahan sa Japan sa ikaduhang gubat sa kalibotan niadtong 1946):

• Ang mga nakadawat sa mga suwat ni Hirohito niadto magsul-ob og guwantis una moabli ug mobasa sa iyang mensahe; ug
• Ang mas ubos nga mga opisyal gimandoan pagluhod sa ilang pagduol sa emperador.

                -o0o-

        Sa ilang panag-abot, angay sab nga pahinumdoman si Presidente Duterte nga di siya makatuki og bisan unsa nga isyu nga politikanhon kay hingpit nga gidid-an si Akihito pagpanginlabot sa gobyerno. Pulos may higot ang nahibilin niyang gahom:

• Siya ang motudlo sa Primero Ministro apan mag-agad sa rekomendasyon sa Diet, ang bay balaoranan;
• Siya ang motudlo sa Chief Justice Korte Suprema apan mag-agad sa iduso sa gabinete; ug
• Ubos sa pagtugot sa gabinete, maka-usab siya sa konstitusyon, makapatawag og tigom sa Diet; ug makabungkag sa House of Representatives. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 30, 2017

Leo Lastimosa has attached the following document:

Arangkada for October 30, 2017

Snapshot of the item below:

Lisod ang pagka-turutot

        Ang opisyal nga sama katabian ni Presidente Rodrigo Duterte, nga hapit kada adlaw modiskurso, wa magkinahanglan og tigpamaba. Apan tungod sa kalibogan niya nga mga sulti, may pipila gani nga di motakdo sa kamatuoran, gikinahanglan ang tigpamaba aron mopasabot unsa ang tinuod niya nga gipasabot.

        Mahimo lang epektibo ang tigpamaba kon suhito siya ug hingpit nga gisaligan sa presidente. Nga gituohan sa kadaghanon nga maoy nakahimo sa pastro ug sa negosyante nga si Ernesto Abella nga presidential spokesperson. Karon nitumaw nga si Abella di diay suhito ug wa diay saligi.

                -o0o-

        Gawas sa nagdahunog niya nga tingog, napamatud-an nga di kamaog si Abella sa iyang trabaho. Mas daghan siya og ambot kay sa kasayuran. Bisan taga Davao siya, mahimo nga wa hatagi si Abella og higayon nga makasulti sa presidente aron pagtugkad unsa gyoy naa sa iyang hunahuna.

        Ang hubad ni Abella sa labing kontrobersiyal nga mga sulti sa presidente way kalainan sa pangagpas sa ubang mga tigpaniid. Labaw pa nga taphaw, kon di man makalibog. Kasagaran gisukwahi gyod gani sa presidente o gisapawan og mas masabtan nga katin-awan.

                -o0o-

        Apan ang labing dako nga atraso ni Abella mao ang tono sa kinatibuk-an niya nga panagang: Di angay nga tuohan dayon ang bisan unsa nga isulti ni Presidente Duterte; mas makaayo sa tanang hingtungdan kon huwaton una ang katin-awan ni Abella.

        Ang resulta, nga klarong wa tuyoa ni Abella, mao ang pagtumaw sa di maayo nga hulagway: Ang presidente usahay magpataka diay og sulti, o may mga higayon nga wa kahibawo unsay iyang gipanulti, ug si Abella ang makapasabot sa tinuod niyang mensahe.

                -o0o-

        Gipulihan si Abella ni Kongresista Harry Roque, kinsa motambong sa labing una nga tigom sa gabinete liwas sa Kalagkalag. Abogado si Roque ug mas suhito sa media. Sama ba kasuhito sa panghunahuna ug gisaligan ba sa presidente?

        Nitug-an si Presidente Duterte nga ganahan siya ni Roque kay managsama sila nga bastos og baba. Paabuton nato unsaon pagpasabot ni Roque ang sunod nga balikas ug bugalbugal sa kababayen-an sa presidente. Paabuton sab nato unsaon paghubad ni Roque ang sunod nga hulga sa presidente pagpangyatak sa tawhanong katungod nga gipatuo ni Roque nga iyang gipanalipdan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 29, 2017

Leo Lastimosa has attached the following document:

Arangkada for October 29, 2017

Snapshot of the item below:

Matinahuron nga pasalamat

        Ang wa angkona sa kadagkoan sa Artsidyosesis sa Sugbo mao nga, labaw sa ilang kahadlok nga dumugon sa katawhan ang karosa nga gipahimutangan sa lungon ni Ricardo Kardinal Vidal atol sa prosesyon dayon niyang lubong niadtong Huwebes, nabalaka sila nga di ingon ana kadaghan ang mohatod sa Prinsipe sa Simbahan sa iyang kataposan nga pahuwayanan.

        May sukaranan ang panagana nga ang gidaghanon sa mga niduaw sa usa ka semana nga haya ni Kardinal Vidal sa Cebu Metropolitan Cathedral di garantiya nga malabwan sa mga molinya sa kadalanan sa adlaw sa iyang lubong.

                -o0o-

        Kay mahimo baya nga bisan sa ilang pagbangotan ug kahinugon sa pagtaliwan ni Kardinal Vidal mopili ang katawhan sa pagpabilin sa ilang mga pinuy-anan niadtong Huwebes kay nakaduaw na man sa iyang haya sa nangaging mga adlaw.

        Mahimo man gani nga magiyahan sila sa kayano ug kamapaubsanon sa kinabuhi ni Kardinal Vidal ug mohukom na lang sa pagpangaliya alang niya sa ilang mga kasingkasing ug hunahuna samtang maghimo sa ilang naandan nga mga gimbuhaton sa way paghasol sa trapiko sa kadalanan sa palibot sa iyang lubnganan.

                -o0o-

        Apan nihukom ang mga Sugbuanon ug ang mga dumuduong sa Sugbo sa di pagtago sa ilang gugma alang ni Kardinal Vidal. Nibaha sila sa kadalanan dayong lubong sa iyang patayng lawas nga nakapasalamat sa hilom ang kaparian nga nisugot sila sa mga awhag nga palapdan ang orihinal nga mubo nga ruta sa funeral procession.

        Di paigo sa katawhan nga nakaduaw sila sa haya, bisan kon pipila nila nakahigayon sa pagbalikbalik sa pila ka higayon, wa nila palabya ang talagsaong kahigayonan pagpanimilit sa materyal niyang lawas.

                -o0o-

        Way makaandam sa kamatayon. Bisan ang kaparian nga nahibawo sa kaapiki sa kahimsog ni Kardinal Vidal nakalitan gihapon sa iyang pagpanaw. Apan malampuson nila nga giduma ang haya ug lubong nga nihatag sa tanang kahigayonan sa tukma apan di pinatuyangan nga pagbangotan.

        Mahimo unta silang mohangyo sa Cebu City Hall sa pagtak-op sa tanang dagkong kadalanan alang sa funeral procession. Apan nahibawo ang kaparian nga si Kardinal Vidal ang unang mobadlong nila kon buhi pa. Ug karon nakumbinser na nga ang katawhan di magmakuli pagtunol sa matinahurong pagpasalamat sa ligdong nga pangalagad. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 28, 2017

Leo Lastimosa has attached the following document:

Arangkada for October 28, 2017

Snapshot of the item below:

Kawsa ni San Ricardo

        Alang ni Padre Francisco "Paking" Silva, Santo na si Arsobispo Teofilo Camomot. Bisan wa pa mahingpit ang proseso sa Vatican pagsubli sa iyang mga buhat ug mga pagtulon-an ug sa mga milagro sa pag-ayo sa seryuso nga mga sakit nga gipasidungog ngadto niya.

        Gisandigan ni Padre Paking ang karaang lagda sa Simbahang Katoliko paghimo nga Santo sa mga minatay pinaagi sa lapad nga pagtuaw ug pagpasidungog sa katawhan. Matod niya ang kadaghan sa mga pasyente nga nangangkon nga naluwas sa kamatayon igo nang mga timaan sa kabalaanon ni Arsobispo Camomot.

                -o0o-

        Nakaangkon og lapad nga suporta sa mga Sugbuanon ang awhag ni Kongresista Raul del Mar nga sugdan na sa kadagkoan sa Artsidyosesis sa Sugbo ang pagduso sa kawsa sa pagka Santo ni Cebu Archbishop Emeritus Ricardo Cardinal Vidal.

        Apan may pipila ka sektor nga niawhag nga huwaton lang una nga mahingpit ang nakabuylo na nga kawsa sa pagka Santo ni Arsobispo Camomot. Nga ilang gikabalak-an nga masapawan, ug mahimo gani nga mabalibaran na hinuon sa Vatican, kon ilusad na karon dayon ang sama nga kawsa alang ni Kardinal Vidal.

                -o0o-

        Way lagda nga nagdili sa pagdungan og hikay sa duha o mas daghang kandidato pagka Santo. Di sab maibanan ang kahigayonan nga ma-Santo si Arsobispo Camomot kon i-apas ang kawsa ni Kardinal Vidal.

        Babag hinuon sa dinaliang proseso ang lagda ni Pope John Paul II niadtong 1983 nga palabyon ang lima ka tuig human sa kamatayon sa kandidato aron mas makiangayon nang pagtuki sa kaso kay di na magdibal ang emosyon.

                -o0o-

        Niang kuti nga proseso sa canonization: Sugdan sa obispo ang imbestigasyon; tugotan sa Vatican ang pagtukod sa diocesan tribunal nga maminaw sa mga testimoniya sa maayong mga buhat sa kandidato; iduso sa Vatican ang mga dokumento sa tribunal; itudlo ang postulator nga mohukngay sa mga dokumento ubos sa giya sa Congregation for the Causes of the Saints; nga moduso sa kawsa ngadto sa Santo Papa; nga modeklarar sa kandidato nga "Servant of God."

Mosunod ang beatification base sa milagro human sa kamatayon sa kandidato; nga mohimo niyang "Blessed;" dayon ang canonization base sa laing milagro human sa beatification; ug tawgon na siyang "Saint." [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 27, 2017

Leo Lastimosa has attached the following document:

Arangkada for October 27, 2017

Snapshot of the item below:

Panamilit sa haya

        Sa bisperas sa paglubong sa patayng lawas ni Ricardo Kardinal Vidal, naglikus-likos ang linya sa katawhan sa dakong hawan sud sa compound sa Cebu Metropolitan Cathedral ug sa kadalanan nga naglibot sa simbahan, nga maoy iyang pinuy-anan sa pagsugod pag-alagad sa artsidyosesis 37 ka tuig ang nilabay ug sa iyang patayng lawas sa niaging walo ka adlaw.

        Dayong tungang gabii, kanus-a gitakdang tak-opan nang simbahan aron pagpangandam sa iyang lubong, niabot na ang tumoy sa linya sa katawhan sa dan Colon. Kalapad sa pabawong gugma ug pasidungog sa iyang pagtaliwan.

                -o0o-

        Mao nga labihang dakoa sa akong problema. Giusikan nako ang daghang kahigayonan pagtan-aw sa iyang haya, sa unang mga takna niya sa Cathedral ug sa pagbalhin niya sa San Pedro Calungsod Shrine. Nagdako lang ang hunahuna nga mangadlawon aron di makapasamot sa kahuot sa simbahan.

        Salamat sa pagsige og unya-unya, naapil ko sa kaliboan nga nagkara-kara sa pag-apas sa kataposang mga takna sa iyang haya. Wa koy pailob nga molinya. Apan mauwaw sab ko nga mosal-ot. Maayo na lang nga giingnan ko sa barangay tanod nga mahimo ra kong mosud pagtambong sa misa.

                -o0o-

        Maayo na lang nga nagkita ming Klasmit Yul Julia. Gikuyogan ko niya pag-adto sa kumbento latas sa higanteng lumbay sa nagbuntaog nga mga korona sa buwak. Nakadayeg mi sa kapaspas sa kaparian ug mga layko pagbahin sa kaliboan ug usa ka gimbuhaton pagduma sa haya ug lubong.

        Nagsud-gawas ang mga pari, mga madre, mga negosyante, mga politiko ug kasarangang mga molupyo nga nagda og mga pagkaon, mga sangkap sa choir ug mga ostiyas sa kalawat, nagpasud og mga sakyanan ug nagpasidaan nga may sakop sa gabinete nga umaabot. Way kinutoban ang kutay sa ilang pagtinabangay.

                -o0o-

        Nakabantay sa akong problema si Klasmit Yul, nga nabantog nga nakatambong sa hapit tanang haya sa Dakbayan sa Talisay. Gipasunod ko niya paingon sa mga bintana lapas sa dagkotanan sa kandila nga tungod diay sa altar sa simbahan.

        Labihang bantanga sa haya. Mas duol kay sa cordon sa sud nga nagpugong sa naglinya nga katawhan. Tagsa ra ming nagkita apan sa matag higayon nigasa og pangaliya. Maong bisan uwahi na, daghang salamat, Kardinal Vidal! [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 26, 2017

Leo Lastimosa has attached the following document:

Arangkada for October 26, 2017

Snapshot of the item below:

Maghiusa inay mag-unay

        Di gyod unta angay nga mag-unay ang mga pasahero ug ang mga drayber sa mga sakyanan nga pamasahero. Kay ang pipila ka butang nga ilang gikasungian matabonan sa mas daghan nga kahigayonan nga managsama ang ilang nahimutangan.

        Ang kinabag-an sa mga pasahero ug mga drayber managsama nga gagmay og kita, managsama nga gipahamtangan sa nagsige og taas nga presyo sa mga palaliton, managsama sab nga biktima sa kahakog ug panagkonsabo sa higante nga mga kompaniya sa lana ug managsama nga nabawo sa kainutil sa gobyerno pagpanalipod sa ilang mga interes.

                -o0o-

        Apan ang gobyerno naghimo og mga lakang sa pagbuwang sa mga pasahero ug mga drayber sa mga sakyanan nga pamasahero. Tingali aron mahuyang ang managsama nila nga kawsa. Aron nga di magkahiusa sa pag-awhag nga bungkagon ang bangis nga cartel sa lana ug himuon nga mas makiangayon ang mga lagda sa publiko nga transportasyon.

        Pananglitan, gibuwang sa LTFRB ang mga pasahero ug PUJ drivers pinaagi sa pagtuyo og bungkig sa minimum nga plitehan. Kon mahigot ang mga pasahero ug mga drayber sa lalis sa sensiyo, wa na silay mahibilin nga umoy sa pagtuki sa mas dagko nga mga pakigbisog.

                -o0o-

        Laing maniobra sa pagbuwang maong pagpalapad sa LTFRB sa 20% nga diskuwento sa plitehan sa mga tinun-an bisan sa mga adlaw nga way klase. Uyon ko nga hatagan og diskuwento ang mga tinun-an apan supak ko nga ang mga drayber maoy silotan.

        Dakong inhustisya nga samtang ang mga negosyante makabawi sa 20% nga diskuwento nga ilang gihatag sa senior citizens ug persons with disabilities pinaagi sa tax rebates sa BIR, ang kabos nga mga drayber way kapasahan.

                -o0o-

        Nagpa-pogi ang gobyerno pinaagi sa LTFRB sa pagpangisog sa diskuwento sa plitehan apan ang benepisyo di gikan sa nasudnong panudlanan, nga maoy gikuhaan sa mga diskuwento sa mga botika, kan-anan ug ubang bay patigayon alang sa senior citizens ug PWDs, kon dili gikan sa apiki nang daan nga kita sa mga drayber.

        Mao nga aron di molampos ang mga puwersa sa pagbuwang ang mga pasahero ug mga drayber angayng mohunong na sa wa kinahanglana nila nga away. Hinunoa, maghiusa paghaw-as gikan sa lawom nga gahong nga managsama nilang nalubngan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for October 25, 2017

Leo Lastimosa has attached the following document:

Arangkada for October 25, 2017

Snapshot of the item below:

Baston ni Kardinal Vidal

        Ang mga baston sa mga obispo ug mga kardinal maoy simbolo sa ilang buhatan. Ang ilang mga sungkod kasagaran may gamay nga kaw-it sa ulohan, susama sa mga baston sa mga pastol sa kakaraanan, kay giisip man siya nga pastol sa mga karnero sa Ginoo. Ang kaw-it simbolo sa ilang tahas pagtultol ug pagluwas sa mga karnero nga masaag.

        Ang mga baston nga gitugyan atol sa ilang ordinasyon kinahanglan nga kuptan samtang maminaw sa Ebanghelyo, maghimo sa wali, maghimo sa mga sakramento, magbendisyon sa katawhan ug maglakaw sa prosesyon.

                -o0o-

        Ang mga baston sa mga obispo ug mga kardinal kabahin sa tradisyon sa Kristiyanismo nga nagsugod sa sungkod ni Moises, nga iyang gibitbit samtang nakigsulti sa nagdilaab nga sagbot ug gitawag sab og sungkod sa Ginoo:

• Atol sa Exodus, ang paglingkawas sa Israelitas gikan sa ilang pagka-ulipon sa Ehipto, ang baston ni Moises nihiwa sa Red Sea maong nakatabok sila;
• Samang baston ang iyang gihapak sa bato sa kawalaan nga nakamugna og tubod sa tubig alang sa gipang-uhaw nga Israelitas; ug
• Gipataas niyang baston sa pagpadaog sa Israelitas sa gubat batok sa tribung Amalekites.

                -o0o-

        Usa sa mga baston ni Cebu Archbishop Emeritus Ricardo Cardinal Vidal, nga hinimo sa machine shop sa Don Bosco Technical College sa Mandaluyong City dul-an sa tulo ka dekada nang nilabay, gipada sa Sugbo pinaagi sa ilang tinun-an nga nibakasyon sa Pasko.

        Apan pagtungod sa MV Doña Virginia sa Romblon, nikusog ang huros sa hangin, nidagko ang bawod ug nagtuya-tuya ang barko. Nagyagaw ang mga pasahero, nanguha sa life jackets ug nagsiyagit nga nangaliya.

                -o0o-

        Ang tinun-an nga si Vic Kintanar, nga nahimong sakop sa media sa Sugbo human sa gradwasyon, nipakalma ug nipasalig sa tiguwang babaye nga iyang tapad nga di sila malunod kay iyang dala ang baston ni Kardinal Vidal.

        Gigakos sa babaye ang baston ug nangaliya. Nisunod ang ubang mga pasahero. Gidalidali paghipos ni Vic ang baston sa kahadlok nga magguba kay giilogan na. Pagkataud-taod, nihunong ang huros sa hangin, nigamay ang bawod ug nihapsay ang ilang paglawig. Bisan wa pa sila magkakita ni Kardinal Vidal, ang baston pa lang daan nakapalig-on na sa pagtuo ni Vic. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Kapamilya Job Fair in Bo. Luz and Asturias

Leo Lastimosa has attached the following document:

Kapamilya Job Fair in Bo. Luz and Asturias

Snapshot of the item below:

1. Maayo balita alang sa taga Cebu City! Gatosan ka trabaho ang maaplayan sa Kapamilya Barangay Local Job Fair sa Bo. Luz Sports Complex sa Dakbayan sa Sugbo tibuok adlaw karong Sabado, Oktubre 28, 2017. Good luck, mga aplikante! Proyekto sa DMDP Cebu City, ABS-CBN Cebu, DYLS Lupig Sila! ug DYAB Abante Pa, Bisaya!
2. Atensiyon, mga Kapamilya sa kasadpang Sugbo! Kaliboan ka trabaho ang maaplayan sa Kapamilya Local ug Overseas Job Fair sa Asturias Sports Complex. Ayaw kalimti ang mga panginahanglan. Proyekto sa Munisipyo sa Asturias, ABS-CBN Cebu, DYLS Lupig Sila! ug DYAB Abante Pa, Bisaya!
3. Imbitado ka sa Kapamilya Special Job Fair sa Cebu City Hall Lobby karong Sabado, Oktubre 28, 2017. 100 ka nursing associates o graduates ang gikinahanglan. Dunay P15,000 nga sign in bonus. Proyekto sa Cebu City Call Center Program, ABS-CBN Cebu, DYLS Lupig Sila! ug DYAB Abante Pa, Bisaya!

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.