Arangkada for October 10, 2017

Leo Lastimosa has attached the following document:

Arangkada for October 10, 2017

Snapshot of the item below:

Sulbad sa pagtibugsok

        Dunay duha ka kapilian si Presidente Rodrigo Duterte atubangan sa dako nga pagtibugsok sa iyang satisfaction rating:

• Pamalandongan ang sentimento sa katawhan ug tubagon ang posible nga mga hinungdan sa pagdaghan sa mga wa na matagbaw sa kapin na sa tuig niyang pamunoan; ug
• Isalikway ang survey, pasanginlan ang Social Weather Stations (SWS) nga nagpaggamit sa iyang mga kaatbang, hudlaton ang mga nangahas sa pagpanaway niya ug tinud-on na gyod pagkiha ug pagpriso sa mga lider sa Liberal Party (LP) ug mga komunista nga iyang gipasanginlan nga nagkonsabo pagpalagpot niya sa katungdanan.

                -o0o-

        Kon tinud-on niya pagtubag ang posibleng mga hinungdan sa pagtidlom sa iyang "very good" rating ngadto sa pagka "good" na lang, posibleng himuon niya ang mosunod:

• Hatagan og hustisya silang Kian delos Santos ug ubang mga biktima sa extrajudicial killings sa iyang gubat batok sa ilegal nga drugas; ug
• Tinud-on na gyod paggukod ang mga responsable sa P6.4 bilyones nga shabu gikan sa China, bahala na kon tinuod nga nahilambigit ang Davao Group ug iyang anak nga si Davao City Vice Mayor Paolo Duterte ug umagad nga si Atty. Mans Carpio.

                -o0o-

        Apan kon isalikway ug balikason niya ang survey nga kabahin sa destabilization plot batok niya, mahimong modangop siya sa mosunod:

• Pakauwawan ang kadagkoan sa SWS, utingkayon ang personal nga mga kinabuhi pamasin nga may masindolan nga mga baho ug kumbinsihon ang mga kliyente pagbiya sa SWS pabor sa mga karibal nga mas mahigalaon sa iyang pamunoan; ug
• Ikiha ug ibalhog sa selda ni Senador Leila de Lima ang ubang kadagkoan sa LP ug mga alyado ni Jose Ma. Sison sa Communist Party of the Philippines (CPP).

                -o0o-

        Kon makat-on si Duterte sa survey ug kurhian ang mga bulilyaso, mahimong mosulbong ang iyang rating ngadto sa "very good" sa sunod survey karong Disyembre.

        Kon manggukod, mahimong mapahilom pagbalik ang pipila ka sektor nga nagsugod na pagtimbakuwas ug pagpakabana. Apan di na mangiyugpos ug motak-om ang kinabag-an. Kansang mga tiyan nagkutoy tungod sa paghuyang sa nasudnong ekonomiya ug pagkagiw ug pagtalaw sa mga negosyante, salamat sa way kinutoban niyang pangaway ug pamalikas ug pagtingob sa tanan niyang atensiyon sa drugas. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.