Pagtago sa kangitngit
Di makapanera sa tanang pultahan ug bintana sa Pilipinas si Presidente Rodrigo Duterte ug magpatuyang pagpanginsulto ug pagpamalikas ug pagpasidaan sa ubang kanasuran ug kalibotanon nga kahugpongan sa di pagpanghilabot giunsa niya pag-ihaw ug paghipos ang tanang gipasanginlan nga mga babag sa iyang gubat batok sa ilegal nga drugas.
Kusganon niyang gibalibaran ang mga imbestigador sa United Nations (UN) nga nagtinguha sa pagsusi nganong niabot na og kapin sa 14,000 ang nangamatay sa duguon niyang gubat. Apan di niya hingpit nga kapugngan ang ubang kanasuran sa paghimo og pakisusi.
-o0o-
Gisalikway ni Foreign Affairs Secretary Alan Peter Cayetano ang rekomendasyon sa United Nations Human Rights Council (UNHRC) nga susihon sa UN Special Rapporteurs ang mga pasangil sa extrajudicial killings (EJKs) ug ubang pangabuso sa pamunoang Duterte.
Ang pangisnab sa Pilipinas nga pulos binuang ang sukaranan--wa silay salig ni Rapporteur Agnes Callamard ug kon moari gyod kinahanglang mag-debate una silang Presidente Duterte ug Callamard--mahimong mosangpot sa atong pagkataktak gikan sa UNHCR.
-o0o-
Kon palagputon ang Pilipinas gikan sa UNHCR, masumpay na ta sa listahan sa mga nasud nga way pagtahud sa tawhanong katungod. Nga kuyawng makaputol sa ekonomikanhon natong mga transaksiyon sa ubang mga sakop sa UN nga nihatag og dakong importansiya sa human rights.
Puno ni sa posibleng pagbabag sugod sa Enero sa bag-ong tuig sa 6,200 nato ka produkto nga tungod sa General System of Preference (GSP+) nakasud nga way buhis sa higanteng merkado sa European Union (EU) nga gisigehan gihapon og balikas ni Presidente Duterte.
-o0o-
Apan bisan sa kahugot sa pamalibad ug kahingpit sa pagkontrolar ni Presidente Duterte sa militar ug kapolisan, nalutsan sila sa mga magbabalaod sa EU. Nga nangimbestigar sa gidudahang EJKs sa Metro Manila ug nakahinabi sa mga tagtungod sa mga biktima ug human rights groups.
Pagmatuod nga di katabonan sa gobyerno ang mga panghitabo, nanawag ang mga magbabalod sa EU sa mga sakop sa kalibotanong media sa hawanan mismo sa Senado sa Pilipinas aron pagsaway sa laktod nga pagpatay sa gidudahang mga durugista ug pagpahilom sa mga isog nga nanaway sa pamunoang Duterte nga silang Chief Justice Maria Lourdes Sereno, Ombudsman Conchita Carpio Morales ug Senador Leila de Lima. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment