Arangkada for October 13, 2017

Leo Lastimosa has attached the following document:

Arangkada for October 13, 2017

Snapshot of the item below:

Pagbukas sa panghunahuna

Mahimo ra gyod unta nila nga isnabon ang Commission on Human Rights (CHR). Apan nitunga ang mga barangay kapitan sa tigom nga nagtuki sa kontrobersiyal nila nga mga kampanya sa pagpakauwaw sa gidudahan nga mga durugista. Ug nitungha sab ang mga opisyal sa kapolisan.

Angayng pahalipayan si Cebu City Councilor Philip Zafra, ang presidente sa Association of Barangay Councils (ABC) Federation. Gawas nga nitanyag sa iyang buhatan sa ABC building sa South Road Properties isip dapit sa tigom, nidasig pa gyod sa iyang kaubanan sa pagbukas sa ilang mga panghunahuna.

        -o0o-

        Mahimo ra gyod unta nga moinsistir si Kapitan Ahong Chan sa Pajo, Lapu-Lapu City nga igo ra siyang nanalipod sa kinabag-an sa mga molupyo gikan sa iyang gipangmarkahan nga gikaintapan nga drug dens. Mahimo ra sab unta nga mopasabot si Kapitan Imok Rupinta sa Ermita nga igo lang siyang nisunod sa gipasiugdahan ni Chan.

        Apan gipili nila ang pagpaminaw sa sukwahi nga baruganan ni Atty. Arvin Odron, ang regional director sa CHR 7. Niuyon gani nga suspensuhon lang una ang ilang kampanya samtang nangita ang tanang hingtungdan og mas epektibong kampanya batok sa ilegal nga drugas nga di moyatak sa tawhanong katungod ni molapas sa mga balaod.

                -o0o-

        Di gyod unta sila angay nga mahadlok sa CHR. Mahimo ra gani ang kapolisan nga motago sa mga dokumento sa ilang imbestigasyon sa mga kaso, apil nang mga ngan sa ilang mga sakop nga nahilambigit sa mga operasyon nga nisangpot sa pagkamatay sa gidudahan nga mga durugista.

        Apan gipili ni Senior Superintendent Joel Doria, hepe sa Cebu City Police Office (CCPO), ang paghatag og higayon nilang Odron ug CHR 7 Chief Investigator Leo Villarino pagpatin-aw sa kamahinungdanon sa due process bisan sa labing bangis nga mga suspitsado.

                -o0o-

        Tungod sa ilang panag-abot ug panagsulti, nidaog ang tanang hingtungdan. Ang panagpingki sa nagkasukwahi nila nga mga panghunahuna hinaot nga mosangpot sa mas maayo nga mga paagi sa pagtabang di lang sa mga molupyo kon dili hasta na sa mga naungo sa makadaot nga bisyo.

        Way napilde nilang Zafra, Chan, Rupinta, Odron, Villarino, Doria ug kaubanan. Mahimong managlahi lang gyod ang napilian nga mga paagi sa pagtuman sa ilang mga gimbuhaton. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.