Arangkada for October 18, 2017

Leo Lastimosa has attached the following document:

Arangkada for October 18, 2017

Snapshot of the item below:

Silang Bebot ug Chito

        Inihap na lang ang malipayon nga mga adlaw sa Sugbuanon nga tagduma sa Road Board nga si Executive Director Luisito "Chito" Clavano. Mao ni pasidaan sa iyang higala nga si House Speaker Pantaleon "Bebot" Alvarez atol sa Arangkada sa DYAB Abante Pa, Bisaya! gahapon sa buntag.

        Matod ni Alvarez higala gihapon sila si Clavano apan di niya duphan ang mga anomaliya sa Road Board. Niingon siya nga susihon pa may mga transaksiyon ba nga makaduot ni Clavano. Apan seguro na nga mapapas ang Road Board sa wa pay Pasko karong tuiga.

                -o0o-

        Wa dayon motuo si Alvarez sa pasangil sa mga kongresista nga gikapnan og 20% nga komisyon ang ilang mga proyekto nga gigastohan sa pundo sa Road Board. Apan dihang ang iya na mismo nga mga proyekto maoy gibunalan og mga komisyon, niulbo na siya.

        Nipasaka dayon si Alvarez sa iyang bersiyon sa balaudnon ni Senate President Koko Pimentel sa pagpapas sa Road Board. Niingon siya nga gipasaligan na sila ni Budget Secretary Benjamin Diokno nga mahimo rang papason ang Road Board nga di mapiang ang inahang buhatan sa Department of Public Works and Highways (DPWH).

                -o0o-

        Nisugyot si Alvarez nga ang binilyon ka pesos nga makolekta gikan sa Road User's Tax, inay lumloman lang sa Road Board, nga mao ray magbuot unsaon paggasto ug unsay mga proyekto nga gastohan, himuon na nga kabahin sa nasudnong panudlanan ug maapil na sa tinuig nga budget nga umulon sa House of Representatives ug sa Senado.

        Kini human gibisto sa Commission on Audit (COA) ang P91 bilyones nga anomaliya gikan sa 2001 ngadto sa 2012. Dakong bahin sa pundo nahurot sa suholan ug mga benepisyo sa mga opisyal nga naapil na sa regular nga budget.

                -o0o-

        Niangkon si Alvarez nga wa dayon masusi ang mga anomaliya sa Road Board tungod sa paggamit sa mga nangilkil sa ngan ni Davao City Vice Mayor Paolo Duterte, anak ni Presidente Rodrigo Duterte. Matod ni Alvarez giapil pa gani og gamit ang iyang ngan hangtod nga nitiyabaw siya.

        Nipasidaan si Alvarez nga kon may mobarug batok ni Clavano nga makapakita og mga ebidensiya angayng mag-andam na og piyansa ang suod niyang higala. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.