Arangkada for October 24, 2017

Leo Lastimosa has attached the following document:

Arangkada for October 24, 2017

Snapshot of the item below:

Atraso ni Kiko

        Bisan kapila na siya kurhii, nagpadayon pagpasangil si Presidente Rodrigo Duterte nga si Senador Kiko Pangilinan ang responsable sa pagdahan sa mga bata nga kriminal tungod sa iyang pagpasar sa balaod nga nipausbaw ngadto sa 15 anyos sa edad sa criminal liability.

        Gawas sa pagka mayor sa Davao City, si Duterte nahimo sang kongresista ug busa nahibawo nga ang balaudnon (bill) di makairog tungod lang sa usa ka magbabalaod. Mapasar lang kon dasonan sa mayoriya sa mga senador ug mga kongresista ug mapatuman lang kon aprobahan sa presidente.

                -o0o-

        Gawas pa, ang karaang balaudnon nga gipangamahanan ni Pangilinan, ang Juvenile Justice and Welfare Act (Republic Act 9344) niadtong 2006 giusab na sa Republic Act 10630 niadtong 2013 nga nagtakda sa mosunod:

• Gipaubos gikan sa 15 anyos ngadto sa 12 anyos ang edad sa criminal liability alang sa bangis nga mga krimen (ang mga bata nga makapatay o makapanlugos tanggungon na sa youth centers nga kinahanglang tukuron sa local government units); ug
• Gigahinan na og kuwarta ang pagtukod og Comprehensive Juvenile Justice and Welfare System ubos sa Department of Social Welfare and Development (DSWD).

                -o0o-

        Di na mabasol silang Pangilinan ug ubang mga magbabalaod sa kapakyas sa Malakanyang pagpatuman sa ilang napasar nga mga balaod:

• Si kanhi Presidente Gloria Macapagal Arroyo ang angayng tulisukon sa kapakyas sa hingpit nga pagpatuman sa balaod niadtong 2006; ug
• Si kanhi Presidente Noynoy Aquino ang angayng paninglan sa utro sang kapakyas pagpatuman sa inusab ug mas komprehensibo na unta nga balaod niadtong 2013.

                -o0o-

        Kon ipa-utingkay ni Presidente Duterte kinsa ang nidason sa orihinal nga balaudnon ni Pangilinan niadtong 2006, nga mao gyod ang iyang gikalagotan pag-ayo, makugang siya nga naapil sa listahan sa mga senador ang labing suod niyang mga alyado: Joker Arroyo, Rodolfo Biazon, Pia Cayetano, Miriam Defensor Santiago, Franklin Drilon, Loi Ejercito, Jinggoy Estrada, Juan Ponce Enrile, Juan Flavier, Dick Gordon, Ping Lacson, Lito Lapid, Jamby Madrigal, Jun Magsaysay, Serge Osmena, Nene Pimentel, Ralph Recto, Bong Revilla, Mar Roxas ug Manny Villar.

        Kon wa pang kabantay si Duterte, way senador nga nisupak sa balaod nga gitumong pagluwas sa mga bata gikan sa mga prisohan sa banggiitan nga mga kriminal. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.