Kinutoban sa kahawod
Kon imong paminawon si Presidente Rodrigo Duterte, way arang niya. Mora gyod nga mahimo niya bisan unsay iyang gusto. Gibut-an niya ang Ombudsman unsa ang mga kaso nga angayng imbestigahon. Karong nangahas ang Ombudsman pagsusi sa iyang katigayonan, nihulga siya pag-imbestigar nila ug pagbilanggo nila kon di magpa-imbestigar.
Bisan ang Korte Suprema iyang gipasidan-an sa di pagpanghilabot sa martial law nga iyang gideklarar sa Mindanao kay ang militar ray iyang tuohan. Nahunong lang ang pagpanaway dihang gipatigbabaw sa mayoriya sa mga mahistrado ang legalidad sa iyang deklarasyon.
-o0o-
Ang kamatuoran mao nga bisan sa nagbuntaog niyang gahom di makapanghilabot si Duterte sa Ombudsman ni sa Korte Suprema. Bisan siya pa ang may gahom sa pagtudlo sa Ombudsman ug sa iyang mga luyuluyo, ingon man sa chief justice ug ubang mga mahistrado sa Korte Suprema.
Di kabuot si Presidente Duterte unsay mga kaso nga imbestigahon sa Ombudsman, unsay mga kaso nga husayon sa Korte Suprema ug labaw na gyod unsa ang ilang resolusyon ug desisyon sa mga kaso, bisan si Duterte pa ug ang mga sakop sa iyang pamilya ang hingtungdan.
-o0o-
Ang ka-independente ug ka-managsama sa tulo ka sanga sa gobyerno naa ra hinuon sa papel. Mahimong lahi kaayo ang aktuwal nga padagan. Pananglitan, ang ka-independente sa Kongreso nawani tungod sa makabungog nga mayoriya ni Presidente Duterte sa House of Representatives ug sa Senado.
Nga mahimo niyang suguon pag-impeach nilang Ombudsman Conchita Carpio Morales ug Chief Justice Maria Lourdes Sereno. Apan kon mopili sila pagtuman sa ilang trabaho, bisan si Duterte way mahimo.
-o0o-
Gipahinumdoman sa mga eksperto sa balaod si Presidente Duterte nga ilegal ang iyang pagpa-imbestigar sa kadagkoan sa Ombudsman. Labi na gyod ang iyang pagpanghulga nila. Giisip nila ang mga lakang ni Duterte nga pagpangyatak sa demokratikanhong mga institusyon.
Nataligam-an ba lang ni Duterte nga demokrasya pa ang Pilipinas bisan sa gibalikbalik na niya nga mga pasidaan pagdeklarar og diktadura? O nabalaka na nga mabutyag sa Ombudsman, salamat sa kaisog ni Overall Deputy Ombudsman Melchor Arthur Carandang, ang kinatibuk-an nga katigayonan sa iyang pamilya nga kaniadto ra niya gisaad nga ipahibawo sa katawhan apan hangtod karon padayon ug masuk-anon nga gitagoan? [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment