Arangkada for October 4, 2017

Leo Lastimosa has attached the following document:

Arangkada for October 4, 2017

Snapshot of the item below:

Pagkausab ni Duterte

        Wa kong kakita sa mga diskurso ni Presidente Rodrigo Duterte karong bag-o, kay naatol nga wa ko sa sibyaanan o lawom nang gabii ang uwahi niyang mga pakigpung, ug igo na lang nakabasa sa transcripts ug sa mga bahin nga gi-post sa social media.

        Nasihag sa bag-o niya nga mga pamahayag ang lahi nga Presidente Duterte. Nawa na ang naandan nga panghagwa sa di pa mo-arangke sa naandan nga mga pamalikas ug mga pasidaan. Mas masuk-anon nang iyang mga diskurso. Mas desperadong tan-awon. Wa nang bayhon sa hingpit nga kamasaligon.

                -o0o-

        Naapektahan ba si Presidente Duterte sa labing bag-o nga mga kontrobersiya nga nahiagoman sa iyang pamunoan? Apan beterano na siya sa mga kontrobersiya sa kapin sa duha ka dekada nang pagduma sa Davao City ug sa kapin na sa tuig nga pagbanos sa Malakanyang.

        Unsa may kalainan sa iyang giatubang nga mga pasangil sa extrajudicial killings, sa P6.4 bilyones nga kontrabando sa shabu ug sa giingon nga tinagoan nga katigayonan sa iyang pamilya? Nganong mora man og wa na sa iyang naandan nga pamayhon ug panghunahuna ang presidente?

                -o0o-

        Usa sa akong nabantayan nga dakong kalainan:

• Ang karaang Duterte igo ra untang mowara-wara sa panghimakak sa Anti-Money Laundering Council (AMLC) nga gikan nila ang bank accounts sa mga Duterte nga nahuptan nilang Senador Antonio Trillanes ug Overall Deputy Ombudsman Melchor Arthur Carandang aron pagbasura sa mga pasangil nga ilegal ang ilang katigayonan; apan
• Ang bag-ong Duterte nikumpisal nga gikan sa AMLC ang mga dokumento nga gikawat sa kabit sa usa ka koronel ug gihatag nilang Trillanes ug Carandang.

                -o0o-

        Nangagpas ang pipila ka tigpaniid nga nahagsa si Duterte sa pagkahibawo nga ang iyang popularidad wa magkahulogan nga ang katawhan andam nga manalipod niya kon maapiki ang iyang pamunoan. Nabantang ni sa kamingaw sa tapok sa iyang mga dumadapig nga napakyas pagtabon sa mas dakong protesta sa iyang mga kaatbang niadtong Septiyembre 21.

        Sakto ang ilang hubad: Ang labing dakong alas sa liderato ni Presidente Duterte mao ang iyang talagsaon nga katakos sa pagpangisog ug pagpanghudlat; di ang makahuloganon nga ideyolohiya ug mga prinsipyo; ug labaw nang di ang kamatinud-anon pagpatuman sa malungtaron ug makiangayon nga kausaban. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.