Arangkada for October 6, 2017

Leo Lastimosa has attached the following document:

Arangkada for October 6, 2017

Snapshot of the item below:

Inhustisya sa suholan

        May sukaranan ang mga negosyante sa Sugbo ug Central Visayas nga mobalibad sa lab-as nga petisyon sa mga mamumuo alang sa laing uminto sa minimum nga suholan. Igo lang sila nga nisandig sa lagda sa Regional Tripartite Wages and Productivity Board (RTWPB) 7 nga makapausbaw lang sila sa suholan usa ka tuig human sa kataposan nga uminto.

        Ang kataposang uminto sa minimum nga suholan sa Sugbo ug sa rehiyon napatuman niadto lang Abril karong tuiga. Sa ato pa, ang RTWPB 7 unya na makatakda og laing usbaw  sa Abril sa sunod tuig.

                -o0o-

        Ang pait nga kamatuoran mao nga wa mabantog ang mga sakop sa RTWPB 7 sa kapaspas sa ilang lihok. Kasagaran abtan sila og siyam-siyam gikan sa pagdawat sa mga petisyon sa labor groups hangtod sa pagtakda og wage orders.

        Mao nga kon subayon ang kutay sa ilang mga deliberasyon sa nangagi nga mga uminto sa suholan nagkataas ang gintang sa tinuig nga uminto. Sa way paghisgot nga ang RTWPB 7 maoy usa sa labing tihik sa pagdugang sa suholan sa mga anak sa singot. Maong nabiya na ta pag-ayo sa ubang rehiyon sa nasud, labi na sa Metro Manila.

                -o0o-

        Gani, salamat sa katapolan ug kalangayan sa mga sakop sa RTWPB 7, sa niaging upat ka tuig katulo ra makatilaw og uminto sa suholan ang mga mamumuo sa Sugbo, Bohol, Siquijor ug Negros Oriental.

        Nahimong P340 ang inadlawng suholan dinhi sa ato niadtong 2014. Dayon nisaka ngadto sa P353 niadtong Oktubre 2015. Way uminto sa suholan sa 2016. Ang sunod nga uminto napatuman pagka Abril 2017 na.

                -o0o-

        Kon sa Abril pa sunod tuig tukion sa RTWPB 7 ang uminto sa suholan, manguros na lang tang daan. Peligrong maabtan og pila ka buwan ang ilang public hearings una magkasabot pilay itakda nga uminto.

        Napatuman na karong buwana ang labing uwahi nga P21 nga uminto sa Metro Manila. Kansang minimum nga inadlawng suholan nga P512 labaw na og P146 sa suholan sa Sugbo nga nalansang pa sa P366. Gawas kon may ebidensiya ang RTWPB 7 nga puthaw ang tiyan sa mga mamumuo sa Sugbo, angay silang manubag sa dakong inhustisya sa suholan nga ilang gipahamtang. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.