Arangkada for December 2, 2017

Leo Lastimosa has attached the following document:

Arangkada for December 2, 2017

Snapshot of the item below:

Kabalaka sa bakuna

        Mahimo nga ablihan pagbalik sa Senado ang imbestigasyon sa pagpangompra sa Department of Health (DOH) sa mga bakuna batok sa dengue human sa pag-angkon sa higanteng kompaniya nga nagmugna sa tambal, ang Sanofi Pasteur, nga inay nga makatabang mahimo nga makadaot kini sa mga pasyente nga wa pa sukad matapti og dengue.

        Kini human nahilom ang unang imbestigasyon nga gipasiugdahan ni Senador Dick Gordon sa pasangil sa kahugpongan sa mga doktor nga iresponsable ang pagpamakuna sa DOH bisan wa pa hingpit nga matino ang kaluwas ini alang sa mga pasyente.

                -o0o-

        Gipahunong dayon ni Health Secretary Francisco Duque III ang pagpamakuna sa Sugbo nga gisugdan karong tuiga ug sa upat ka rehiyon sa Luzon--Metro Manila, Central Luzon ug Calabarzon--nga gisugdan sa niagi pang tuig human sa pagkumpisal sa Sanofi sa ilang kasaypanan. Makapanghunaw hinuon si Duque nga igo lang niya nga napanunod ang P3.5 bilyones nga proyekto.

        Makapanghunaw sab ang iyang gisundan nga kanhi health secretaries: Si Paulyn Ubial igo lang ni niya nga gipadayon; samtang si Janette Garin nilusad sa proyekto tungod sa pagtugot sa World Health Organization (WHO).

                -o0o-

        Makahasol hinuon ang nabutyag nga kasayuran nga ang mga pasidaan sa komplikasyon sa Dengvaxia, ang bakuna batok sa dengue, giluwatan sa mga eksperto niadto pang Septiyembre sa niaging tuig. Nganong naabtan man og usa ka tuig ug duha ka buwan una nidason ang Sanofi?

        Ang mga eksperto sa bakuna sa WHO, ang Strategic Advisory Group of Experts on Immunization, nipahamtang og kundisyon sa pagtugot sa Dengvaxia: Angay nga gamiton lang sa mga dapit nga nikatap na pag-ayo ang dengue.

                -o0o-

        Nga nitakdo sa gihimo sa DOH nga pagpili isip pilot areas sa libre nga pagpamakuna sa upat ka rehiyon nga labing daghan og mga kaso sa dengue sa nangagi nga katuigan ug alang lang sa mga bata nga 9 ngadto 14 anyos kay mao ang kasagaran nga mataptan sa makamatay nga sakit.

        Apan lahi ang katin-awan sa DOH. Wa hisguti ang pasidaan sa WHO ug mga eksperto sa komplikasyon sa bakuna. Kon dili igo lang gipasabot nga mahal pa kaayo ang bag-o nga bakuna ug way igo nga pundo ang gobyerno aron mabakunahan ang tanang molupyo. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for December 1, 2017

Leo Lastimosa has attached the following document:

Arangkada for December 1, 2017

Snapshot of the item below:

Kampanya sa kalibog

        Kon naglibog ka sa mga pamahayag ug mga lakang ni Presidente Rodrigo Duterte, wa ka mag-inusara. Kon naglibog ka unsa ang tinuod nga padulngan sa iyang pamunoan, daghan ta. Ambot tinuyo ba, o hasta siya naglibog sab, si Presidente Duterte wa motabang sa pagpatin-aw sa kalibogan pinaagi sa pag-usab-usab sa iyang mga sulti.

        Gihulagway si Presidente Duterte sa iyang mga dumadapig nga maayo nga molibog sa iyang mga kaatbang aron di makababag sa iyang mga tinguha. Apan may sukaranan ang mga kabalaka nga ang presidente mismo naglibog unsa ang iyang gusto.

                -o0o-

        Usa sa kalibogan mao ang iyang atras-abante mahitungod sa revolutionary government:

• Sa sinugdanan, nipasidaan si Presidente Duterte sa pagdeklarar og revolutionary government kon magtinguha gyod ang iyang mga kaatbang pagpukan sa iyang pamunoan;
• Karong bag-o, human nideklarar ang militar nga di sila mopaluyo sa revolutionary government ug sa bisan unsang hulga sa 1987 Constitution, niangkon siya nga makamugna lang ni og dugang labad sa ulo; apan
• Wa niya badlonga ang iyang mga dumadapig nga nagrotesta sa tibuok nasud gahapon aron sa pag-apura niya sa pagdeklarar na og revolutionary government.

                -o0o-

        Lain nga kalibogan mao ang nagkasukwahi niya nga mga plano sa pag-usab sa mga balaod sa nasud:

• Gitukod niya ang consultative committee niadtong Disyembre 2016 nga mosugyot og kausaban sa konstitusyon apan nilabay ang usa ka tuig nga wa siyay gitudlo bisan usa ka sakop; ug
• Gi-apura niya ang Kongreso sa pagpasar sa Bangsamoro Basic Law (BBL) apan sa samang higayon giduso sab niya ang federalismo isip malungtaron nga sulbad sa kaguliyang sa Mindanao.

                -o0o-

        Nahibawo ba gyod si Presidente Duterte unsay iyang gusto? O giladlad lang ang tanan nga alternatibo aron nga mabantang unsa ang labing maayo niya nga kapilian, apil na ang lain niya nga gipasidaan nga pagpalapad sa martial law sa Mindanao ngadto sa tibuok Pilipinas?

        O gipaburot lang ang kalibog aron pagsimang sa atensiyon sa katawhan gikan sa mga pasangil sa kahiwian batok niya ug sa mga sakop sa iyang pamilya? O gilugaw lang gyod ang panghunahuna sa katawhan, labi na sa iyang politikanhon nga mga kaatbang, aron nga di makabantay sa paghikyad na unya sa tinuod nga alas nga iyang gitagoan? [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 30, 2017

Leo Lastimosa has attached the following document:

Arangkada for November 30, 2017

Snapshot of the item below:

Politika ni Bato

        Nabalaka ko nga naglibog na si Direktor Heneral Bato dela Rosa kon hepe pa ba siya sa Philippine National Police (PNP) o nagsugod na og pangampanya sa pagka senador. Kay samtang sa usa ka ginhawa mopasidaan siya sa badlungon nga mga polis, sa sunod nga ginhawa modupa na sab siya sa mga polis nga gipasanginlan nga nag-abuso sa katungdanan.

        Sa wa pay pagsusi sa mga detalye sa labing bag-o nga pasangil nga laktod nga gipamatay sa mga polis ang ilang mga dinakpan, nideklarar si dela Rosa nga kabahin ni sa panimawos sa drug lords sa PNP.

                -o0o-

        Ang daotang balita alang ni dela Rosa mao nga ang tinubdan sa kasayuran sa lain nga mga kaso sa extrajudicial killings (EJKs) di ang iresponsable nga mga politiko kansang hut-ong gusto niya nga sudlan. Kon ang usa sa labing tinahud nga kalibotanon nga kahugpongan sa pagbalita, ang Reuters.

        Nga nakapakita og upat ka anggulo sa CCTV footage sa operasyon sa mga polis sa Barangay 19 sa Dakbayan sa Manila nga nipusil sa tulo ka suspitsado sa ilang mga pinuy-anan.

                -o0o-

        Ang footage nisukwahi sa bersiyon sa Manila Police District (MPD) sa operasyon niadtong Oktubre 11, usa ka adlaw human gidid-an ni Presidente Rodrigo Duterte ang mga polis sa pag-apil sa kampanya batok sa ilegal nga drugas:

• Nagsultianay ang mga suspitsado sa pag-abot sa mga polis sukwahi sa pasangil sa mga operatiba nga namaligya sila og drugas;
• Gipapahawa sa mga polis ang mga silingan ug giwaling ang CCTV nga ilang nakita nga nipunting sa ilang nahimutangan; ug
• Gilangay pagda ang mga patayng lawas ngadto sa tambalanan.

                -o0o-

        Nahadlok si dela Rosa nga ang report sa Reuters makapalangay sa pagbalik sa liderato sa gubat sa drugas ngadto sa PNP. Ambot unsa ang iyang problema nga nagpadayon man diay ang ilang operasyon batok sa drugas bisan sa pagdili kunohay sa presidente.

        Hinaot nga may makahunghong ni dela Rosa nga mas maayo nga susihon ang katinuod sa mga pasangil batok sa mga polis ug ang pagsilot sa mga mapamatud-an nga nakalapas sa balaod. Labaw sa iyang standees nga gipakatap sa tibuok nasud, ang pagtuman sa trabaho maoy makatabang sa bisan unsa niyang ambisyon sa politika. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 29, 2017

Bikil sa BBL

Angay nga manlipaghong sa kauwaw si Presidente Rodrigo Duterte nga wa makalihok ang Bangsamoro Basic Law (BBL) nga iyang giduso sa Kongreso karong tuiga. Bisan sa iyang pasalig nga maaprobahan ang pinalapdan nga BBL isip labing unang presidente nga taga Mindanao, way nahitabo.

Niadto rang Hulyo karong tuiga nga giduso sa Bangsamoro Transition Commission ngadto sa Malakanyang ang draft sa BBL. Nga mao ra sab ang gisumiter ni Presidente Duterte ngadto sa Kongreso. Apan hangtod karon wa lihoka sa mga kongresista ug mga senador.

-o0o-

Kon di pa na igo, nabawo pa gyod ang lab-as nga pasalig ni Presidente Duterte sa pagpasar sa BBL atol sa iyang pagtambong sa Bangsamoro Assembly sa Maguindanao niadtong Lunes:

• Gisalikway na sa mga kongresista nga gipangulohan ni House Majority Leader Rodolfo Farinas ang iyang awhag nga mag-special session ang duha ka bay balaoranan alang sa BBL; ug

• Gihulagway na nga imposible sa mga senador nga gipangulohan ni Senate Majority Leader Tito Sotto ang kahigayonan nga mapasar nila ang BBL karong tuiga.

-o0o-

Makapa-apiki ni sa plano sa Malakanyang nga isumiter na ang BBL ug ang isugyot nga kausaban sa 1987 Constitution alang sa plebisito dungan sa nalangay na nga piniliay sa barangay ug Sangguniang Kabataan (SK) sa Mayo 14 sa sunod tuig.

Di makatabang sa kawsa ni Presidente Duterte ang pag-una sa mga kongresista sa impeachment nilang kanhi Comelec Chairman Andres Bautista ug Chief Justice Maria Lourdes Sereno sa Korte Suprema ug ang padayon pa nga pagtuki sa Senado sa budget alang sa sunod tuig.

-o0o-

Mahimo nga manghunaw ang presidente nga di niya maapura ang mga magbabalaod kay buwag nga sanga sa gobyerno ang Kongreso. Apan iyang mga alyado ang kinabag-an sa mga senador ug mga kongresista ug iyang plataporma ang pinalapdan nga BBL.

Dugang di maayong mga balita alang ni Presidente Duterte: Nideklarar si House Speaker Pantaleon Alvarez sa Arangkada sa DYAB Abante Pa, Bisaya! nga ang bag-ong BBL nasukwahi gihapon sa 1987 Constitution; ug nipahibawo si Chairman Nur Misuari sa Moro National Liberation Front (MNLF) nga di sila mopaluyo sa BBL kay magpaabot na lang sa laing pasalig sa presidente nga federal nga sistema sa gobyerno. [30] leo_lastimosa@abs-cbn.com

Arangkada for November 28, 2017

Leo Lastimosa has attached the following document:

Arangkada for November 28, 2017

Snapshot of the item below:

Paggamit og PUJ cards

        Seryuso ang Department of Transportation (DOTr) sa pagpapas na sa boundary system sa public utility jeepneys (PUJs) dungan sa hingpit na nga pagpatuman sa modernisasyon sa mga sakyanan nga pamasahero. Ang naandan nga inadlaw nga abangan sa mga drayber sa PUJs ngadto sa operators pulihan na og inadlaw nga suholan nga ihatag sa operators ngadto sa ilang mga drayber.

        Atubangan sa nitumaw nga kalibog unsaon ni sa pagpatuman, si Regional Director Ahmed Cuizon sa Land Transportation Franchising and Regulatory Board (LTFRB) sa Central Visayas nipasalig nga ila na ni nga gipangandaman.

                -o0o-

        Atol sa among panag-abot sa mass wedding nga gipasiugdahan sa Association of Concerned Texters (ACT) sa Our Lady of Consolacion Parish-Recoletos sa Laray, San Roque, Talisay City, si Cuizon nipasabot nga ang paggamit og PUJ cards inay cash sa plitehan makatubag sa mga kabalaka nga magkasungi lang ang mga drayber ug operators ubos sa bag-ong sistema.

        Ang cards nga susama sa gigamit sa MyBus sa SM Prime ug Jam Liner sa Metro Cebu molikay sa lalis sa mga drayber ug operators kon pila ang tinuod nga kita sa tibuok adlaw nga pamasahero sa PUJs.

                -o0o-

        Gipasabot ni Cuizon ang mga bentaha sa PUJ cards:

• Tukma na ang plite, di na mangita og sensiyo ang mga pasahero ug di na maglisod ang mga drayber sa pagpanukli;
• Mapatuman na ang diskuwento sa plitehan sa mga tinun-an, senior citizens ug persons with disabilities; ug
• Di na makatago ang mga drayber ug operators sa tinuod nila nga kita ug busa makolekta na sa Bureau of Internal Revenue ang tukma nga buhis.

                -o0o-

        Ginamit ang sistema nga dugay na nga gisagop sa uban nga kanasuran, ang prepaid nga cards ipatungod lang sa sensor sa ganghaan sa PUJs inig sakay ug kanaog nga mopakita pila ang kantidad nga nakuha ug pila ang load nga nahibilin.

        Nitambag si Cuizon nga inay supakon ang modernisasyon sa PUJs ug uban nga mga sakyanan nga pamasahero angay ni nga hangpon sa tanang hingtungdan. Kay mosangpot di lang sa mas sayon ug mas luwas nga pagsakay sa mga pasahero, kon dili sa mas makiangayon sab nga kita sa mga drayber ug operators. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 27, 20017

Leo Lastimosa has attached the following document:

Arangkada for November 27, 20017

Snapshot of the item below:

Braso sa Team Rama

        Si anhing Barangay Kapitan Imok Rupinta sa Ermita sa Dakbayan sa Sugbo giisip nga kanhi Cebu City Mayor Mike Rama nga mao ang braso sa ilang grupo nga Barug Team Rama. Siya ang ilang gitahasan nga mopuli sa namatay nga si Barangay Kapitan George Rama.

        Wa hinuon dayon makaandam si Rupinta sa pagkamatay ni Kapitan Rama dul-an sa tulo ka tuig na ang nilabay. Matod ni Mayor Rama napugos siya og pangisog batok ni Mayor Tommy Osmena ug uban nilang kaatbang aron pagtapak sa dakong haw-ang nga namugna sa pagtaliwan sa iyang ig-agaw.

                -o0o-

        Kay ang matag politikanhon nga partido nagkinahanglan og braso. Gawas sa popularidad sa iyang mga piliunon ug makinarya sa kampanya, nagkinahanglan ang partido og isog nga mga haligi nga di mokakak sa mga panghudlat sa mga kaatbang ug andam sang manghudlat o mogamit gyod og aktuwal nga puwersa.

        Nga mao ang papel ni Kapitan Rama sa BOPK dihang alyado pa sila ni Mayor Osmena ug sa Team Rama dihang nag-oposisyon na si Mayor Rama. Matod ni Mayor Rama takos si Rupinta nga nahimong braso sa ilang grupo.

                -o0o-

        Mao diay to nga wa gyoy mokakak si Rupinta sa daghan uyamot nila nga engkuwentro ni Mayor Osmena sa Carbon ug sa Ermita. Bisan nasuspenso silang Rupinta ug tanang konsehal niadtong Pebrero wa makatarug si Osmena sa hugot nga pagkontrolar ni Rupinta sa iyang teritoryo.

        Pagbalik ni Rupinta sa puwesto niadtong Agosto ug bisan sa mga pasidaan ni Osmena, gidid-an dayon niya ang mga naninda og isda ug gibanhaw ang pagpangolekta og bayad sa mga mamaligyaay.

                -o0o-

        Sa kataposan nilang panagsungi, nga niulbo dihang gipaguba ni Osmena ang outposts sa mga tanod sa Ermita sud sa merkado sa Carbon, nisaad si Rupinta pag-adto sa buhatan sa mayor aron ipasabot ang kapuslanan sa outposts. Apan wa siya motunga. Matod ni Mayor Rama siya ang nipugong ni Rupinta. Kinsa iyang gipasabot nga di maminaw si Osmena niya ug mahimo gani nga binabuyon siya og kasaba atubangan sa media.

        Karon nga wa na si Rupinta niingon si Rama nga siya na sab ang mangisog. Hangtod nga may ikahulip nga bag-ong braso sa ilang grupo. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 26, 2017

Leo Lastimosa has attached the following document:

Arangkada for November 26, 2017

Snapshot of the item below:

Kabilin ni Imok

        Bililhon nga bantayog ni anhing Barangay Kapitan Imok Rupinta ang gamhanan nga kahugpongan sa mga mamaligyaay sa kadalanan. Nga bisan nahiagom sa mga panagsungi dayon niyang kamatay padayon nga nagpayong sa dul-an sa gatos ka kahugpongan.

        Ang Cebu City United Vendors Association (CCUVA) gitukod nilang Rupinta ug kaubanan sa 1984, duha ka tuig sa wa pa moulbo ang rebolusyon nga nipalayas sa diktadura ni Ferdinand Marcos. Sa kinapungkayan sa CCUVA, giingnan ko ni Rupinta nga duna silay kapin sa 100,000 ka sakop.

                -o0o-

        Labihan katalagsaon sa CCUVA nga nadapit ang langyaw nga mga makinaadmanon. Si Gisèle Yasmeen, Ph.D., sa University of British Columbia sa Vancouver, Canada nilista sa pipila ka sakop sa CCUVA:

        Calderon Dollar Association; Calderon Watch & Jewellery Repair & Gold Plating Association, Carcar Stall Owners' Association; Cebu Association of Laborers, Cebu Butchers' Association; Cebu City Muslim Traders' & Vendors' Association; Carbon Integrated Fish & Chicken Association, City Central School; Abellana & Cebu College of Arts & Trade Association; F. Escaño Vendors' Association; F. Gonsales Carton Vendors' Association;

                -o0o-

Fish & Meat Vendors' Association; Freedom Park United Vendors' Association; Fuente Osmeña Barbecue Vendors' Association; Guadalupe Livelihood Center; Juan Luna Sharpers' Association; Laborers & Vendors' Association; Landing Area Vendors' Organization; Leon Kilat Ambulant Vendors' Association; Llorente Fruit Vendors' Association;

Lower Salinas Vendors' Association; Mabolo Sidewalk Vendors' Association; Mabolo United Vendors' Association; Magallanes Leon Kilat Vendors' Association; Mandaue United Sidewalk Vendors' Association; Muslim Traders Vendors Association; North Reclamation Sidewalk Vendors' Association; Osmeña Boulevard Vendors' Sagangs Group; Pelaez & P. Del Rosario Vendors' Association;

        -o0o-

Pier Area Vendors' Association; B. Rodriquez Vendors' Association; Quezon Association; Redemptorist Church Sidewalk Vendors' Association; Santo Niño Assorted Vendors' Association; Santo Niño Sidewalk Vendors' Association; Cebu Downtown Sidewalk Vendors' Association; Sidewalk Vendors' Association Zone I, II, III ug IV; Southern Island Medical Center Vendors' Association; SSS Sidewalk Vendors' Association;

Tabako Vendors' Association; Tabo Sa Banay Vendors' Association II; Tabunok Sidewalk Vendors' Association; Tobacco Sidewalk Vendors' Association; United Ambulant Vendors' Association; United Calderon & Progreso Vendors' Association A ug B; United Vendors' Organization of Carbon Market; Uptown Vendors' Association; Vegetables Ambulant Vendors' Association; Visayan Electric Ambulant Vendors' Association; Warwick Barracks Sidewalk Vendors' Association ug Zamora Vendors' Association. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 25, 2017

Leo Lastimosa has attached the following document:

Arangkada for November 25, 2017

Snapshot of the item below:

Pasidaan sa mga linog

        Hangtod karon, bisan sa kabag-ohan sa panahon ug sa kapaspas sa paglambo sa mga teknolohiya, ug bisan kinsa pa ang mangilad ug manghadlok nimo, wa pa gyoy paagi sa pagbanabana asa ug kanus-a mahitabo ang sunod nga linog ug ang gikusgon ini.

        Lahi sa mga pasidaan sa bagyo, nga maglakip sa mga dapit nga maagian, gikusgon sa hangin, gidaghanon sa uwan ug oras sa pagtugpa sa yuta, wa pay teknolohiya sa pagbatyag sa umaabot nga linog. Maong inay motutok sa hanap nga unahan, may duha ka siyentipiko nga nilingi sa nangagi.

                -o0o-

        Natay-og ang tibuok kalibotan sa ilang nakit-an sa kasaysayan sa labing kusog nga mga kusog sa niagi nga 117 ka tuig: Nisulbong ang gidaghanon sa kusog nga linog (Magnitude 7 pataas) matag 32 ka tuig human sa paghinay og tuyok ug paghiyos sa atong planeta.

Ang geologists nga silang Roger Bilham sa University of Colorado, Boulder ug Rebecca Bendick sa University of Montana nipahibawo sa sangpotanan sa ilang pagtuon atol sa tinuig nga tigom sa Geological Society of America sa Seattle ug nimantala sa kinatibuk-an nga detalye sa Geophysical Research Letters.

        -o0o-

Matod nilang Bilham ug Bendick nitumaw ang labing kusog nga mga linog sa labing menos lima ka tuig human sa paghinay sa lihok sa planeta. Namatikdan ang kataposan nga paghinay sa planeta niadtong 2011.

Maong nipasidaan sila nga mas subsob ug mas kusog ang mga linog nga motay-og sa kalibotan sa mosunod nga lima ka tuig, sugod sa 2018 hangtod sa 2022. Niawhag sila sa kanasuran paghimo sa tukma nga mga pangandam.

        -o0o-

Apan di gihapon nila matino kanus-a mahitabo ang mosunod nga kusog nga mga linog ni ang mga nasud nga sunod nga maigo. Igo lang sila nga nipasidaan nga labing mameligro ang mga nasud nga kinadul-an sa equator: Ecuador, Columbia, Brazil, Sao Tome & Principe, Gabon, Democratic Republic of Congo, Uganda, Kenya, Somalia ug Indonesia.

May mga siyentipiko nga nidason sa pagtuon. Apan may nikuwestiyon sab sa relasyon tali sa paghinay sa lihok sa planeta ug sa gikusgon sa linog. Ang mosunod nga lima ka tuig maoy makahatag sa labing tukma nga tubag. Makatabang sab ang pagpalig-on sa atong buildings ug kabalayan. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 24, 2017

Leo Lastimosa has attached the following document:

Arangkada for November 24, 2017

Snapshot of the item below:

Naunay sa tari

        Mahimo ra gyod unta nga lakturon sa mga kongresista ang proseso sa pag-impeach ni Chief Justice Maria Lourdes Sereno. Kay usa ni ka talagsaon nga higayon nga ang minoriya mopatigbabaw sa mayoriya sa mga sakop sa House of Representatives. 98 ra sa 293 ka kongresista ang gikinahanglan sa pagpada sa articles of impeachment ngadto sa Senado.

        Nipili ang House Justice Committee sa pag-inat sa husay. Nipasabot si House Speaker Pantaleon Alvarez nga maneguro sila nga lig-on ang mga ebidensiya. Apan may sukaranan ang mga pagduda nga gusto lang sila nga mopakauwaw ni Sereno.

                -o0o-

        Kay si Alvarez mismo nagbalikbalik og awhag ni Sereno sa pagpangunay og tambong sa mga husay sa komitiba. Aron nga gawas nga makapanalipod sa iyang kaugalingon ug makasukitsukit pa gyod ni Atty. Larry Gadon ug uban nga namasangil niya.

        Bisan ang Malakanyang, pinaagi ni Presidential Spokesperson Harry Roque, ug nakalimot tingali nga nanghunaw si Presidente Rodrigo Duterte og bisan unsa nga kalambigitan sa impeachment complaints, niawhag ni Sereno sa pagbiya na lang sa katungdanan aron nga di maduhig ang kaligdong sa Korte Suprema ug uban nga mga hukmanan.

                -o0o-

        Maayo na lang nga wa mopaak si Sereno sa paon ni Alvarez. Kay human pasaligi nga maka-cross examine sa mga saksi batok niya kon mangunay sa pagtambong inay nga mopada lang og mga abogado, gideklarar sa mga kongresista nga di diay katugotan ang cross examination.

        Ang nangunay pagbalibag sa tanyag sa cross examination ni Alvarez mao ra sab ang iyang sinaligan nga si House Majority Leader Rodolfo Fariñas. Kinsa nitataw nga kon ganahan si Sereno nga mo-cross examine angay nga mag-kongresista una siya.

                -o0o-

        Apan ang itom nga tinguha sa mga kongresista nisumbalik nila. Naunay sa ilang tari ang mga nagtinguha pagnudnod ni Sereno dihang nabisto nga wa diay direkta nga kasayuran si Gadon sa seryuso niya nga mga pasangil.

        Mirisi. Kay sa nag-aliwaros tingali nila nga tinguha paglaba ni Sereno, nataligam-an sa kadagkoan sa House nga di kaligdong ang alas ni Gadon. Kansang hulga sa niaging kampanya pagpatay sa tanang Muslim apil na ang mga bata ug mga ilaga aron magmalinawon ang Mindanao abunda unta nga pasidaan sa kataphaw sa iyang mga ebidensiya. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.

Arangkada for November 23, 2017

Leo Lastimosa has attached the following document:

Arangkada for November 23, 2017

Snapshot of the item below:

Pagbalikos sa kalibotan

        Wa mag-inusara ang Facebook sa pakutay og mga kable ilawom sa kadagatan aron pagpalapad sa paspas nga koneksiyon sa internet sa nagkalainlain nga bahin sa kalibotan. Siya hinuon ang labing una nga nakiglambigit sa gobyerno sa Pilipinas human sa nabulilyaso nga national broadband network (NBN) project sa ZTE Corporation sa China niadtong 2007.

        Apan ang Facebook nakigtambayayong sab sa iyang karibal nga mga kompaniya, apil na ang Google ug Microsoft, aron mas paspas ug mas taas nga mga kable ang ilang maladlad ilawom sa kadagatan sa mas daghan nga kanasuran sa kalibotan.

                -o0o-

        Sa di pa hinuon mag-ambak-ambak sa pagsaulog ang kadagkoan sa Malakanyang, nga mora og ang Facebook mao ang manluluwas sa Pilipinas gikan sa nagkamang nga internet, angay sila nga pahinumdoman nga ang nag-una nga katuyoan sa Facebook, sama sa Google ug Microsoft, mao ang pagtagbaw sa ilang kaugalingon nga panginahanglan.

        Naamgohan sa Facebook ug ubang higante nga mga kompaniya sa internet nga ang mga kable ilawom sa kadagatan makatabang nila sa tulin ug luwas nga pagda sa pribadong user data lagbas sa nagkatag nila nga data centers sa tibuok kalibotan.

                -o0o-

        Sa kinatibuk-an, duna na karoy 359 ka aktibo nga undersea cable systems nga naglibot sa kalibotan. Ang labing taas nga kutay nagsumpay sa Uropa ngadto sa Australia ug Asya nga may 39 ka landing points ug langyab nga 39,000 ka kilometro.

        Tungod sa paspas nga pagburot sa data nga kinahanglan nila nga dad-on sa tanan nga suok sa planeta, nahukman sa Facebook, Google, Microsoft ug ubang higante nga mga kompaniya nga mas maayo nga sila ang manag-iya kay sa mamalit og mga kable sa ubang mga tinubdan.

                -o0o-

        Labing malambuon nga mga negosyo sa pagpamaligya sa kapasidad sa ilang mga kable ug data centers mao ang Amazon Web Services (AWS) ug ang Micrsosoft Azure Cloud Computing Services. Nabiyaan mao nga nagkara-kara sa pag-apas ang Facebook ug Google.

        Gipasigarbo hinuon sa Google nga ila ang teknolohiya sa pagpada og data nga 10 ka milyon ka higayon nga mas tulin kay sa modem cable. Kini tungod sa coherent optical technology, ang paggamit sa kahayag pagpada og data subay sa fibre optic cables. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.