Mirisi sa pagpalabi-labi
Mga suod ni Vic Ong, tag-iya sa Vic Enterprises nga gihulga nga kandadohan ni Cebu City Mayor Tommy Osmeña human sa duha ka semana nga lugway sa pagpamutos, nipasalig nako nga buotan siya ug di garbuso. Matod nila naikog pag-ayo si Ong sa kahasol nga namugna sa ilang negosyo sa trapiko ug sa ilang kasilinganan.
Gitataw sab nila nga naningkamot ang kompaniya sa pagmenos sa kaabog sa ilang operasyon ug sa pagkabara sa trapiko sa pagsud-gawas sa ilang mga trak, gani gikagisan dayon nila ang nagsapaw-sapaw nga lapok sa kadalanan nga ilang gigamit.
-o0o-
Mahimong gawas nga buotan si Ong nangandam pa gyong daan alang sa kinabuhing dayon. Nabantang sa kapin sa 230,000 nga nikuyog sa Grand Marian Procession pagtimaan sa ika-100 ka tuig nga sumad sa kataposang pagpakita sa Mahal nga Birhen sa Fatima, Portugal niadtong Oktubre 13 ang namungingi nga tarpaulins sa center island sa Osmeña Blvd. nga nagpahibawo sa hingpit nga pagsuporta sa Vic Enterprises sa relihiyuso nga kalihokan.
Mahimong ang langit maoy labing nasuhito sa uban pang maayo niyang mga buhat. Apan angay gihapon sila nga palayason gikan sa Mabolo.
-o0o-
Dihang nagsugod na og tubo ang ilang negosyo pipila ka tuig ang nilabay, gitambagan si Ong sa pagpalit og mas dako nga luna sa hawan pa nga reclamation area sa Mandaue City. Apan wa siya mopatuo.
Hinunoa, namalit hinuon sa kasilinganang mga luna sa Mabolo pagpahiluna sa nagkalapad nilang patigayon. Angayng pahalipayan si Ong sa paglambo sa iyang negosyo. Apan angayng paninglan sa pagpalabi sa kuwarta kay sa kahapsay sa kadalanan ug kahimsog sa iyang mga silingan.
-o0o-
Gawas nga gisigaan sa mata sa usa sa mga anak ni Ong si Mayor Osmeña, nga maoy garantiya nga maserado gyod sila, nipasidaan sila nga ang paghunong sa dako nilang operasyon: Makapa-apiki sa construction boom sa Sugbo ug makapagutom sa kaliboan kansang panginabuhi nagsandig nila.
Di mabalda ang mga konstruksiyon sa Sugbo ug kasilinganang mga isla kay naghinam-hinam nang ubang hardware shops paghulip sa bisan unsang haw-ang sa suplay. Ug di sila manaktak og mga trabahante kay igo rang ibalhin ang operasyon sa napalit nang mga bodega sa habagatan ug amihanang Sugbo. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment