Dayon sa Grand Halad
Santos nga Misa ang mosugod sa Grand Halad sa Kapamilya, ang labing dakong piyesta sa libre nga mga pangalagad sa Sugbo, nga himuon tibuok adlaw karong adlawa sa Cebu Technological University (CTU) Main Campus sa kinasang-an sa mga dan M.J. Cuenco ug R. Palma sa Dakbayan sa Sugbo.
Si Msgr. Ruben Labajo sa Cebu Metropolitan Cathedral niingon nga sakop sa ilang parokya ang dapit nga himoan sa Grand Halad mao nga iyang gihangop ang kahigayonan nga katilingbanon nga pangaliya pinaagi sa Misa ang moabli sa higanteng kasaulogan sa paghinatagay.
-o0o-
Ika-21 na ni nga Grand Halad nga gipahigayon kaduha matag tuig: Matag Hunyo aron pagtimaan sa anibersaryo sa DYAB Abante Pa, Bisaya! ug matag Nobyembre isip sayo ngga pinaskohan alang sa labing nagkinahanglan nga mga molupyo sa Sugbo ug kasilinganang mga lalawigan.
Matag pangandam sa Grand Halad, kuyawan mi nga gipul-an na ang katawhan sa panag-abot sa mga motabang ug sa mga tabanganan. Apan sa matag higayon makugang gihapon mi sa mainiton nila nga pagtampo pagmatuod nga bisan unsa kakabos mahimong makatabang ug bisan unsa ka-adunahan mahimong magkinahanglan og tabang.
-o0o-
Bisan sa lapad nga kadaot nga ilang nahiagoman sa makalilisang nga linog niadtong Otubre 15, 2013, ang CTU Main Campus wa magmakuli sa pagpagamit sa lapad nilang luna ug sa tanan nilang kahimanan alang sa Grand Halad.
Nakasuway na mi sa nagkalainlain nga venue apan among gipasabot silang CTU President Rosein Ancheta Jr. ug kaubanan nga magsige mi og balik sa ilang eskuylahan kay mao ang labing duol ug sayon nga tultulon sa labing nagkinahanglan og tabang.
-o0o-
May nisugyot nga mas hapsay ang Grand Halad kon mang-rehistro ming daan ug manghatag og priority numbers. Aron tawgon lang ang mga numero ug mag-ulhos-ulhos sila og abot inay nga magdungan ug maghuot. Apan matinahuron mi nga nibalibad.
Dul-an sa 20,000 ka taga Sugbo ug kasilinganang lalawigan ang kasagarang motambong sa Grand Halad. Unsaon man sila paglistang daan? Kon mauwahi og abot ang No. 1, kapugngan bang mahimangod nganong nauna og atiman ang No. 51? Ug makasal-ot ba sa nagsunod nga No. 86? Maong nidangop mi sa labing makiangayong lagda: Ang unang niabot maoy unang maatiman. [30] leo_lastimosa@abs-cbn.com
| Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs. |  |
No comments:
Post a Comment