Bikil sa BBL
Angay nga manlipaghong sa kauwaw si Presidente Rodrigo Duterte nga wa makalihok ang Bangsamoro Basic Law (BBL) nga iyang giduso sa Kongreso karong tuiga. Bisan sa iyang pasalig nga maaprobahan ang pinalapdan nga BBL isip labing unang presidente nga taga Mindanao, way nahitabo.
Niadto rang Hulyo karong tuiga nga giduso sa Bangsamoro Transition Commission ngadto sa Malakanyang ang draft sa BBL. Nga mao ra sab ang gisumiter ni Presidente Duterte ngadto sa Kongreso. Apan hangtod karon wa lihoka sa mga kongresista ug mga senador.
-o0o-
Kon di pa na igo, nabawo pa gyod ang lab-as nga pasalig ni Presidente Duterte sa pagpasar sa BBL atol sa iyang pagtambong sa Bangsamoro Assembly sa Maguindanao niadtong Lunes:
Gisalikway na sa mga kongresista nga gipangulohan ni House Majority Leader Rodolfo Farinas ang iyang awhag nga mag-special session ang duha ka bay balaoranan alang sa BBL; ug
Gihulagway na nga imposible sa mga senador nga gipangulohan ni Senate Majority Leader Tito Sotto ang kahigayonan nga mapasar nila ang BBL karong tuiga.
-o0o-
Makapa-apiki ni sa plano sa Malakanyang nga isumiter na ang BBL ug ang isugyot nga kausaban sa 1987 Constitution alang sa plebisito dungan sa nalangay na nga piniliay sa barangay ug Sangguniang Kabataan (SK) sa Mayo 14 sa sunod tuig.
Di makatabang sa kawsa ni Presidente Duterte ang pag-una sa mga kongresista sa impeachment nilang kanhi Comelec Chairman Andres Bautista ug Chief Justice Maria Lourdes Sereno sa Korte Suprema ug ang padayon pa nga pagtuki sa Senado sa budget alang sa sunod tuig.
-o0o-
Mahimo nga manghunaw ang presidente nga di niya maapura ang mga magbabalaod kay buwag nga sanga sa gobyerno ang Kongreso. Apan iyang mga alyado ang kinabag-an sa mga senador ug mga kongresista ug iyang plataporma ang pinalapdan nga BBL.
Dugang di maayong mga balita alang ni Presidente Duterte: Nideklarar si House Speaker Pantaleon Alvarez sa Arangkada sa DYAB Abante Pa, Bisaya! nga ang bag-ong BBL nasukwahi gihapon sa 1987 Constitution; ug nipahibawo si Chairman Nur Misuari sa Moro National Liberation Front (MNLF) nga di sila mopaluyo sa BBL kay magpaabot na lang sa laing pasalig sa presidente nga federal nga sistema sa gobyerno. [30] leo_lastimosa@abs-cbn.com
No comments:
Post a Comment