Arangkada for November 3, 2017

Leo Lastimosa has attached the following document:

Arangkada for November 3, 2017

Snapshot of the item below:

Pag-usab sa pension system

        Si Budget Secretary Benjamin Diokno, nga maoy gitulisok sa kalangay sa pagpatuman sa saad ni Presidente Rodrigo Duterte pagdoble sa suholan sa mga polis ug mga sundawo ug sa plano paglansang sa pension sa retirado nga mga polis ug mga sundawo, igo lang nidason sa kabalaka sa iyang gipulihan nga si kanhi Budget Secretary Butch Abad nga di makalahutay ang gobyerno kon di usbon ang pension system.

        Gilusad gyod gani ni Abad ang pagtuon sa Department of Budget and Management (DBM) Government Service Insurance System (GSIS) aron pagpangita sa tukma nga kausaban.

                -o0o-

        Bisan sa wa pa mo-isa sa alarma si Abad, mas una nga nipasidaan sa posible nga pagka bangkarota sa pension system ang presidente sa Retirement and Separation Benefits System (RSBS) nga si retired Rear Admiral Emilio Marayag.

        Apil sa gisugyot sa Armadong Kusog nga kausaban: Pagpasaka sa retirement age gikan sa 56 ngadto sa 58; di na pasakaan sa sunod nga mas taas nga ranggo ang mo-retiro nga mga sakop; pagpapas sa RSBS; pa-amuton na ang mga sakop sa pension fund; ug pag-iban sa mga benepisyo sa mga retirado.

                -o0o-

        Giluwatan sa Armadong Kusog ang mga sugyot niadtong Hulyo 2011. Gipahibawo ni Abad ang pagtuon sa DBM ug GSIS niadtong Oktubre 2011. Apan napupos na lang ang termino ni kanhi Presidente Noynoy Aquino wa pa gyoy napatuman nga kausaban sa pension system.

        Ang hinungdan? Ang kusganon nga pagsupak sa aktibo ug retirado nga mga polis ug mga sundawo. Nga nahigam na ug busa di na ganahan nga motahan sa naandan nila nga mga suholan ug mga benepisyo.

                -o0o-

        Nga mao say nahiagoman ni Diokno karon tungod sa iyang pag-awhag sa Kongreso nga di i-apil sa dakong uminto sa suholan sa aktibong mga polis ug mga sundawo sugod karong Enero 1, 2018 ang pension sa retirado nga mga polis ug mga sundawo.

        Mahibaw-an sa mosunod nga mga adlaw mas lig-on ba og lutahan si Diokno kay nilang Abad ug Marayag. Ug kon mas isog ba si Presidente Duterte kay ni kanhi Presidente Aquino pag-usab sa pension system. Nga giumol ni kanhi Presidente Ferdinand Marcos pagsuway pagkuha sa buta nga suporta sa kapolisan ug militar. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.