Arangkada for November 4, 2017

Leo Lastimosa has attached the following document:

Arangkada for November 4, 2017

Snapshot of the item below:

Pabilo sa pagpakabana

        Sa kataposan, may nitumaw na nga pabilo nga mahimong mopasilaob sa dugay nang giluom nga pangindahay sa hustisya alang sa inosente nga mga biktima sa duguon nga gubat batok sa ilegal nga drugas. Taliwa sa nasudnong kahadlok sa mga biktima sa mga pagpamatay nga laktod, may mga isog na gyod nga nibarug pagpatigbabaw sa balaod.

Atubangan sa kapin sa 14,000 ka nangligdas nga patayng lawas, kinsa man tuod ang mangahas sa pagsusi sa matag kaso, matag patayng lawas ug matag nagkadugo nga mga detalye? Ang pagkatukod sa bag-ong grupo nimatuod nga bisan ang katalaw may kinutoban.

        -o0o-

Gipahibawo ni kanhi Kongresista Erin Tañada, usa sa convenors sa Mga Manananggol Laban sa Extrajudicial Killings o Manlaban sa EJK, nga nagsugod ang ilang mga tigom human sa bangis nga pagpatay sa mga polis sa Caloocan sa 17 anyos nga si Kian Loyd delos Santos niadtong Agosto ning tuiga.

Nauyonan nila nga di sila mahimo nga mangiyugpos ug magpakahilom hangtod sa hangtod. Nabatyagan nila nga ang ligdong ug mabuot nga katawhan nagkinahanglan lang og lehitimo nga kalihokan nga mohiusa sa tanang naigo ug nahasol sa way pupanagana nga kampanya sa gobyerno pagpangyatak sa tawhanong katungod ug pag-utang og inosente nga mga kinabuhi.

        -o0o-

        Ug tuod man di kasarangan ang kaligdong sa ilang convenors: Dean Pacifico Agabin sa UP Law; IBP Center for Legal Aid head Minerva Ambrosio; UP Professor Victoria Avena; Human Rights Commissioner Roberto Eugenio Cadiz; Kanhi Bayan Muna Representative Neri Colmenares; Dean Jose Manuel Diokno sa DLSU Law;

Dean Tony La Viña sa AdMU; Dean Ernesto Maceda sa PLM law; NUPL President Edre Olalia; Public Interest Law Center President Rachel Pastores; UP Professor Roberto Rafael Pulido; Kanhi Senador Rene Saguisag; UP Professor Evalyn Ursua; Quezon City RTC Judge Cleto Villacorta III; ug kanhi Kongresista Tañada sa Quezon.

                -o0o-

        Ang pag-apil sa batan-on nga mga abogado ug mga tinun-an sa abogasiya motino nga ma-dokumento ang mga kaso sa tanang mga biktima ug mga tagtungod nga modangop nila.

        Maghimo sila og Facebook page ug mag-organisar sa Sugbo ug ubang mga lalawigan sa Kabisay-an ug Mindanao. Uban ang panghinaot nga ang natisok nga binhi sa pagpakabana molipang ug molambo. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.