Friday, November 3, 2017

Arangkada for November 5, 2017

Leo Lastimosa has attached the following document:
Arangkada for November 5, 2017
Snapshot of the item below:

Panamilit ni Kardinal Vidal

        Tungod sa pahimangno sa mga doktor ug sa kaubanan niyang kaparian nga tandugon na ang kahimtang sa panglawas ni Ricardo Cardinal Vidal, wa magplano si Padre Lucas Inoc nga magdugay sa iyang pagduaw sa pinuy-anan sa retiradong Arsobispo sa Sugbo sa Sto. Nino Village sa Banilad, Cebu City pila ka adlaw sa wa pa kataposang na-ospital.

        Maong labihan niya nga kahibung sa kadaghan og igsusulti sa iyang giduaw nga naabtan og duha ka oras ang ilang panagtagbo. Gani, gipugngan siya ni Kardinal Vidal aron nga magsawo sila og paniudto.

                -o0o-

        Gihangyo siya sa kardinal nga maoy mangu sa pangaliya sa di pa sila mangaon. Apan sa wa pa siya makasugod og pangaliya, niuna sa pagpasalamat si Kardinal Vidal sa ilang pagkaon ug nga bisan sa iyang balatian makahimo pa siya sa pagkaon.

        Gitandi sa kardinal ang kamaayo sa ilang kahimtang niadtong higayona kon itandi sa uban nga ganahan pa unta nga mokaon apan tungod sa grabeng mga sakit di na makakaon sa kinaham nila nga mga putahe ug sa mga gipanggutom apan wa intawoy pagkaon nga nahukad sa lamesa sa ilang mga pinuy-anan.

                -o0o-

        Dihang gipangutana ni Padre Inoc unsa ang iyang giisip nga labing dako niyang nahimo, gitumbok ni Kardinal Vidal ang 1,000 ka deyakono, 500 ka pari ug 30 ka obispo nga iyang na-ordinahan sa iyang 61 ka tuig nga pagka pari, 46 ka tuig nga pagka obispo ug 32 ka tuig nga pagka kardinal.

        Human nipasalig nga iyang gialagaran ang simbahan sa labing maayo niya nga nahimo, iyang gitugon si Padre Inoc sa pagpaningkamot sab nga hingpit nga kaalagaran ang katawhan sa iyang pagka pari.

                -o0o-

        Human nila og paniudto, nakabantay si Padre Inoc nga naluya na pag-ayo si Kardinal Vidal busa nagdalidali na siya og panamilit. Niangkon ang kardinal nga gikapoy na tinuod siya ug busa ganahan na nga mopahuway.

        Wa na makaseguro si Padre Inoc kon ang gipasabot ba ni Kardinal Vidal mao nga gusto lang siya nga matug o ganahan na gyod nga mopahuway sa dayon. Mao nga wa kapugong sa pag-agas sa iyang mga luha sa sunod nilang kita nga siya na ang nag-bendita sa haya sa kardinal. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: