Saturday, November 4, 2017

Arangkada for November 6, 2017

Leo Lastimosa has attached the following document:
Arangkada for November 6, 2017
Snapshot of the item below:

Piyesta sa bakak

        Human sa pag-us-os sa rating ni Presidente Rodrigo Duterte sa nasudnong survey sa Social Weather Stations nga gipagawas sa niaging buwan, nisulbong ang gidaghanon sa fake news nga gipakatap sa nagkalainlain nga plataporma sa social media. Klaro nga organisado ang kampanya sa iyang mga dumadapig kay sila ra sab ang nagtinabangay sa pagsaw-anay ug pagpakatap sa sayop nga kasayuran aron pagtino nga mabasahan sa labing daghan.

        Labihan nila kamalampuson nga bisan ang lehitimo nga mga sakop sa media naapil og kailad. Kana kon di kabahin sa higanteng makinarya sa propaganda ang inila nga mga kolumnista nga nidason sa fake news.

                -o0o-

        Mabahin sa duha ka matang ang nagbaha nga fake news sa mga dumadapig ni Presidente Duterte sa nangaging mga adlaw:

  • Una, bakak nga mga pasangil batok sa giisip nga mga kaatbang sa pamunoang Duterte (sama sa sayop nga mga taho nga gitawag ni US President Donald Trump si Senador Antonio Trillanes nga "little narco;" ug
  • Ikaduha, bakak nga mga pangangkon sa giinugurahan nga mga proyekto (nga naggamit og mga hulagway sa mga proyekto sa ubang kanasuran) ug ubang kalamposan sa pamunoang Duterte.

                -o0o-

        Bisan nabisto na nga sayop ang ilang kasayuran, usa lang ka kolumnista ang nangayo og pasaylo ug nikumpisal nga nangomedya ra siya apan wa kasabot ang mga nakabasa sa iyang lindog apil na ang mga dumadapig ni Presidente Duterte.

        Nga ang kinabag-an nagpakahilom sa iresponsable nila nga pagdason sa mga bakak. Naglaom tingali nga mataligam-an ra ang ilang kasaypanan kay matabonan sa abunda nga kampanya sa kalibog nga gipasiugdahan sa makalilisang nila nga makinarya.

                -o0o-

        Pipila gani sa labing kanahan nila magpaugat pa og lusot nga mahimo ra sila nga momantala sa sayop nga kasayuran kay "blogger" ra sila ug di lehitimo nga mga sakop sa media.

        Luyo sa pabaga ang mas yawan-on nga pagtuo: Nga ang mayoriya sa ilang mga dumadapig labihan kabugo nga di makabantay sa way pupanagana nila nga kampanya sa pagpangilad; ug nga ang nahibilin nga may gamay nga pangutok lunod patay na nga nagpaluyo ni Presidente Duterte nga andam sila nga mokalawat bisan sa labing nangalisbo nga mga bakak basta mohaom lang sa ilang politikanhon nga baruganan. [30] leo_lastimosa@abs-cbn.com 

Google Docs: Create and edit documents online.
Google Inc. 1600 Amphitheatre Parkway, Mountain View, CA 94043, USA
You have received this email because someone shared a document with you from Google Docs.
Logo for Google Docs

No comments: