Arangkada for November 9, 2017

Leo Lastimosa has attached the following document:

Arangkada for November 9, 2017

Snapshot of the item below:

Evasco, Dino ug Yap

        Kumbinsido ang Bol-anon nga Cabinet Secretary Jun Evasco nga kabahin sa dako nga politikanhong maniobra ang pasangil ni Presidential Assistant Mike Dino nga siya ug ang National Housing Authority (NHA) ang angay nga tulisukon sa kalangay sa pagpatuman sa mga proyekto alang sa mga biktima sa bagyong Yolanda.

        Atol sa ika-upat nga anibersaryo sa bangis nga katalagman gahapon, nisumbalik si Evasco nga ang nagpasiugda sa maniobra mao ang mga politiko sa Bohol nga nahulga sa kahigayonan nga modagan siya pagka gobernador puli sa di na kadagan nga si Gobernador Edgar Chatto.

                -o0o-

        Nideklarar si Evasco sa iyang pakighinabi sa Arangkada sa DYAB Abante Pa, Bisaya! nga di siya modagan pagka gobernador sa Bohol sa piniliay karong 2019. Matod ni Evasco magpabilin siya nga moduma sa gabinete hangtod sa pagkapupos sa termino ni Presidente Rodrigo Duterte.

        Busa giawhag ni Evasco ang mga politiko nga nangintriga niya sa paghunong na sa ilang maniobra. Nipasidaan siya nga inay suportahan niya ang ilang ambisyon sa pagbanos sa pagduma sa Kapitolyo sa Bohol mahimo hinuon siya nga aktibo nga mangampanya alang sa ilang mga kaatbang.

                -o0o-

        Way ginganlan nga mga ngan si Evasco. Gawas sa pag-ingon nga ang mga politiko sa Bohol nga nangintriga niya di tinuod nga Bol-anon. Matod niya tinuod ra nga Bol-anon ang iyang paluyohan nga sunod nga gobernador sa Bohol.

        Niinsistir sab si Evasco nga managhigala sila ni Dino. Bisan nanaway si Dino niya ug bisan ang mga sakop ni Evasco sa Kilusang Pagbabago (KP) maoy nikiha ni Dino tungod sa kapakyas pagtuman sa sugo ni Presidente Duterte pagtiwas sa Yolanda projects.

                -o0o-

        Mga suod ni Evasco nitug-an nga ang nagkonsabo batok niya mao silang Dino ug Kongresista Art Yap sa ikatulong distrito sa Bohol. Matod nila nasuko si Dino tungod sa kasuod nilang Evasco ug Cebu City Mayor Tommy Osmeña.

        Sa pikas nga bahin, gipasanginlan nila si Yap nga nagtinguha paghipos ni Evasco aron di makababag sa iyang pagpuli ni Chatto. Gitumbok nila si Yap nga nipatangtang ni Direktor Salva Diputado sa Department of Agriculture sa Central Visayas aron pag-inutil ni Bohol Vice Governor Dionisio Balite, ugangan ni Diputado, nga mahimong modagan sab pagka gobernador. [30] leo_lastimosa@abs-cbn.com 

Google Docs: Create and edit documents online. Google Inc. 1600 Amphitheatre Parkway, Mountain View, CA 94043, USA You have received this email because someone shared a document with you from Google Docs.