Mga hilo sa pagkaon
Sukwahi sa atong pagtuo nga makaayo ang tanan nga utanon, may pipila nila nga makadaot sa atong panglawas. Kay di man sila makalihok ni makadagan, pipila nila niusab sa ilang mga sangkap aron pagpanalipod sa ilang kaugalingon gikan sa mga tawo ug mga hayop nga mokaon nila.
Kay nag-una man sila nato, nakakaplag na ang mga tanom og lig-on nga mga panagang. Ilang alas ang lectins, protina nga wa lang nihatag nato og mga sakit apan nigguba pa gyod sa sistema sa komunikasyon sa atong tinai ug immune system.
-o0o-
Mao ni ang makapakugang nga kasayuran sa libro nga "The Plant Paradox" nga sinuwat ni Dr. Steven Gundry, cardiothoracic surgeon nga karon espesyalista na sa paggamit sa pagkaon isip panagang sa mga sakit.
Lisod palabyon ang sangpotanan sa iyang pagtuon: Kon mohunong ka og kaon sa mga utanon nga may liso nga maoy bangis nga niatake sa atong panglawas ug modangop sa mga pagkaon nga makapahibalik sa atong lawas sa iyang naandan nga kahimtang, maayo ka sa mga sakit ug mogamay pa gyod ang imong tiyan.
-o0o-
Gisugyot nako sa ako nga mga kauban ang libro, nga girekomendar sa suod nako nga higala, apan gitas-an ra sila. Bisan sa saad nga kaayuhan sa panglawas, wa silay panahon sa pagbasa. Mao nga nahinangop pagkabasa sa blog ni Dr. Gundry nga libre nga nimantala sa labing mahinungdanon nga bahin sa iyang pagtuon.
Nisugyot siya sa paglikay sa mosunod: Batong, bugas humay ug mais, mani, kasoy, kalbasa, tawong, patatas, tamatis ug prutas (nga sama og kadaot sa candy ug ice cream). Kon ganahan gyod nila, palihug paniti ug kuhai og liso, o i-pressure cooker, o ipaubos sa fermentation.
-o0o-
Gidasig ta niya sa pagkaon og daghan sa mosunod: Kamote, balanghoy, ube, gabi, butig, berde nga mga utanon sama sa repolyo, litsugas, agbati, kamunggay, kinsay, broccoli, cauliflower, asparagus, ahos, sibuyas ug uhong.
Girekomendar niya ang abokado (kay way asukar), okra (kansang pilit nga duga makagapos sa lectins), olives ug extra virgin olive oil. Kon ganahan og kan-on, pilia ang puti inay brown rice ug puti nga harina inay wheat bread. Kon mingawon og chocolate, pilia ang may labing menos 90% nga cacao. [30] leo_lastimosa@abs-cbn.com
No comments:
Post a Comment